YINI leseyehlukile kulesitfombe? Sekunebantfu kuso. Yindvodza yekucala nemfati wekucala. Badalwa ngubani? NguNkulunkulu. Uyalati yini ligama lakhe? NguJehova. Ligama lalendvodza ngu-Adamu, lomfati yena ngu-Eva.

Nayi indlela Nkulunkulu Jehova ladala ngayo Adamu. Watsatsa lutfuli lwemhlabatsi wase ubumba ngalo Adamu. Waphefumulela umoya wekuphila etimphumulweni takhe, waba ngumuntfu lophilako.

Bekunemsebenti Nkulunkulu Jehova abewulungiselele Adamu kutsi awente. Wamtjela kutsi atetse emagama tonkhe tinhlobo tetilwane. Kungenteka Adamu waba nesikhatsi lesenele sekutibuka letilwane, kungako abengakwati kukhetsa emagama latifanela kahle. Ngalesikhatsi Adamu asetsa letilwane kukhona lakubona. Uyati kutsi kuyini?

Letilwane betihamba ngatimbili. Bekunendlovu lendvuna nalensikati, kunelibhubesi lelidvuna nalelisikati. Kodvwa Adamu yena abete umsiti. Kungako-ke Jehova wamenta kutsi ehlelwe butfongo lobukhulu. Jehova wabese ukhipha lolunye lwetimbambo ta-Adamu, walusebentisela kumentela umfati.

Wajabula Adamu ngaloko. Ungacabanga nje kutsi ngisho na-Eva abejabule kangakanani nakabekwa ensimini lenhle kutsi ahlale kuyo. Besebangaba nebantfwana bahlale nabo ngekujabula.

Jehova abefuna bo-Adamu na-Eva baphile phakadze. Abefuna bente umhlaba wonkhe ube muhle njengensimi yase-Edeni. Bo-Adamu na-Eva bajabula kakhulu nabacabanga ngekwenta loko. Wena bewungakujabulela yini kuhlanganyela ekwenteni umhlaba ube yinsimi lenhle? Kepha kujabula kwabo-Adamu na-Eva kwatsatsa sikhatsi lesincane. Ase sibone kutsi kungani.