UYAWATI yini lamadvodza Jakobe lakhuluma nawo? Sekahambe emalanga lamanyenti, wahlangana nalamadvodza ngasesicojeni eluse timvu tawo. Wawabuta watsi: ‘Yebomnaketfu niphumaphi?’

Bamphendvula batsi: ‘Siphuma eHarani.’

Wababuta futsi watsi: “Niyamati yini Labani?”

Batsi: ‘Yebo siyamati. Nanguya nje naRakheli, indvodzakati yakhe, eta nemhlambi wetimvu takhe.’ Uyambona yini Rakheli eta lapha?

Jakobe watsi kube ambone Rakheli ahamba netimvu tamalume wakhe Labani, wesuka wasusa lelitje lebelivimbile kulesicobho, kuze timvu tikhone kunatsa. Ngemva kwaloko wamanga futsi wamtjela kutsi ungubani. Wajabula kakhulu Rakheli nakeva loko, waze wagijima wayowutjela babe wakhe Labani.

Labani wakujabulela kutsi Jakobe ahlale naye. Wavuma nangalesikhatsi Jakobe acela kushada naRakheli. Kodvwa Labani wamcela kutsi asebente emasimini akhe iminyaka lesikhombisa kuze amtfole. Jakobe wayisebenta yonkhe leminyaka lesikhombisa ngoba abemtsandza Rakheli. Ngalesikhatsi kusondzela lilanga lemshado, uyati kutsi yini leyenteka?

Labani waniketa Jakobe indvodzakati yakhe lendzala lenguLeya, esikhundleni saRakheli. Kwatsi Jakobe nakavuma kuphindze asebente leminye iminyaka lesikhombisa, Labani wabese umnika naRakheli kutsi abengumkakhe. Nkulunkulu ngaleso sikhatsi abewavumela emadvodza kutsi abe nebafati labanyenti, kepha nyalo liBhayibheli litsi indvodza kufanele ibe nemfati munye kuphela.