UYALUBONA loluswane lolukhalako, futsi lolubambe umunwe walekhosatana. Ligama lalo nguMosi. Uyayati kutsi ingubani lenkhosatana lenhle? Yindvodzakati yaFaro, inkhosi yaseGibhithe.

Ngenca yekutsi make waMosi abengafuni kutsi umntfwana wakhe abulawe bantfu baseGibhithe, wamfihla waze waba netinyanga letintsatfu budzala. Kodvwa bekati kutsi kukhona lobekungenteka amtfole, ngako naku lakwenta kuze amsindzise.

Watsatsa ibhasikidi wayilungisa kahle kute ingangenwa ngemanti. Watsatsa loluswane walufa ekhatsi kuyo, wase uyoyibeka ekhatsi emhlangeni loselusentseni lweMfula iNayili. Watjela sisi waMosi Miriyamu kutsi eme edvute nalebhasikidi kute ayigadze.

Ngemuva kwaloko, indvodzakati yaFaro yefika itewugeza eMfuleni iNayili. Yabona ibhasikidi ibekwe emhlangeni. Yabita lomunye wetincekukati tayo yatsi: ‘Ngicela uyongitsatsela leya bhasikidi.’ Indvodzakati yenkhosi yatsi nayiyivula, yabona luswane loluhle. Lwalukhala futsi yaluhawukela. Yayingafuni kutsi lubulawe.

Miriyamu wabese uyasondzela. Angitsi uyambona lana esitfombeni? Wefika watsi: ‘Ngingakufunela yini umfati longumIsrayeli atekumunyisela loluswane?’

Indvodzakati yaFaro yamphendvula yatsi: ‘Ngingabonga, hamba uyomfuna.’

Miriyamu wagijima masinyane walandza make wakhe. Nakefika make waMosi, indvodzakati yaFaro yatsi kuye: ‘Ngitsatsele nangu umntfwana ungimunyisele yena, mine ngitakuholela.’

Lomake walutsatsa loluswane lwakhe wayolunakekela. Kwatsi nasekakhulile Mosi wamtsatsa wamyisa endvodzakatini yaFaro, futsi yona yamphatsisa kwemntfwana wayo. Sewuyabona manje kutsi kwenteka njani kutsi Mosi akhulele endlini yaFaro.