NGALESIKHATSI Mosi asabuyele eGibhithe, wafike watjela umnakabo Aroni ngato tonkhe timangaliso latibonile. Mosi na-Aroni bakhombisa ema-Israyeli letimangaliso, futsi bonkhe bantfu bakholwa kutsi Jehova abebasekela.

BoMosi na-Aroni bahamba baya kuFaro. Befika kuye batsi: ‘Jehova longuNkulunkulu wema-Israyeli utsi, ‘‘Vumela sive sami kutsi sitsatse luhambo loluya ehlane siyewungidvumisa emalanga lamatsatfu khona.”’ Kodvwa Faro watsi: ‘Angimati loyo Jehova, futsi angeke ngisikhulule sive sema-Israyeli kutsi sihambe.’

Faro watfukutsela ngenca yekutsi ema-Israyeli abefuna kushiya umsebenti ahambe ayokhonta Jehova. Ngako-ke wawanika umsebenti lomnyenti kuze atewusebenta angacedzi. Ema-Israyeli amsola Mosi, atsi nguye lobangele kutsi aphatfwe kabi, loku kwamvisa buhlungu. Kodvwa Jehova wamtjela kutsi angakhatsateki. Watsi kuye: ‘Ngitakwenta Faro abakhulule bantfu bami bahambe.’

BoMosi na-Aroni baphindze baya kuFaro. Kodvwa nyalo befika benta simangaliso. Aroni waphosa indvuku yakhe phansi yagucuka yaba yinyoka. Faro wabita tihlakaniphi takhe nato taphonsa tindvuku tato tagucuka tabatinyoka. Kodvwa inyoka ya-Aroni yadla letinyoka talamadvodza labahlakaniphile. Kepha Faro wachubeka angafuni kutsi ema-Israyeli ahambe.

Sefika sikhatsi lapho Jehova atsi sewufuna kufundzisa Faro sifundvo. Uyati kutsi wakwenta kanjani loko? Wamletsela tishayo letingu-10, nobe tinhlupho eGibhithe.

Ngemva kwetishayo letinyenti, Faro watsi akubitwe Mosi, watsi kuye: ‘Susa letishayo, ngitawakhulula ema-Israyeli kutsi ahambe.’ Kwakutsi sishayo nasesingekho Faro ashintje umcondvo, angabavumeli kutsi bahambe. Kodwa ekugcineni ngemva kwetishayo letingu-10 wawakhulula ema-Israyeli kutsi ahambe.

Uyatati yini letishayo letingu-10? Vula ekhasini lelilandzelako sifundze ngato.