LOTI nemndeni wakhe bebahlala na-Abrahama eveni laseKhenani. Ngalelinye lilanga Abrahama watsi kuLoti: ‘Lelive angeke lisasenela kahle tsine nemfuyo yetfu, ngako ngicela sehlukane. Nawukhetsa kuya ngesancele mine ngitakuya ngesekudla.’

Loti walibuka lelive, wabona incenye lenhle yalendzawo inemanti lenele kanye netjani lobuhle bemfuyo yakhe. Lendzawo beyiseSigodzini saseJordane. Ngako-ke, Loti watsatsa umndeni wakhe nemfuyo yakhe baya lapho. Bagcina bahlala edolobheni laseSodoma.

Bantfu baseSodoma bebangakalungi. Loku kwakumphatsa kabi Loti, ngobe abeyindvodza lelungile. Nkulunkulu naye kwamphatsa kabi loko. Ekugcineni wabese utfumela tingilosi takhe letimbili kuLoti. Tamecwayisa ngekutsi Nkulunkulu utawubhubhisa iSodoma nelidolobha lelisedvutane nayo, iGomora ngenca yebubi bawo.

Letingilosi tatsi kuLoti: ‘Vuka utsatse umkakho nemadvodzakati akho lamabili bese niyaphuma kulendzawo!’ Loti nemndeni wakhe bebaloku benta kancane, ngako letingilosi tababamba ngetandla tabakhiphela ngephandle kwalelidolobha. Lenye yaletingilosi yatsi: ‘Balekani nitewusindza! Ningasabuki nasemuva. Balekani nicondze ngasetintsabeni, kuze ningafi.’

Loti nemadvodzakati akhe balalela futsi bagijima baphuma eSodoma. Abazange beme ngisho nesikhashana nje, futsi ababukanga ngisho nasemuva. Kepha umkaLoti yena akazange alalele. Sebahambe libangana kusuka eSodoma, wema wabuka emuva. Wagucuka waba sidvuli seluswayi. Uyambona yini kulesitfombe?

Sifundza sifundvo lesihle kulendzaba. Sifundza kutsi Nkulunkulu usindzisa kuphela labo labamlalelako, kodvwa labo labangamlaleli balahlekelwa kuphila kwabo.