EMADOLOBHA lamanyenti aseKhenani alungela kuyewuhlasela ema-Israyeli. Abecabanga kutsi atawehlula. Kodvwa bantfu lebebahlala edolobheni laseGibeyoni bebangacabangi kanjalo. Bebakholelwa kutsi Nkulunkulu uyawasekela ema-Israyeli, futsi bebangafuni kulwa naye. Uyati yini kutsi emaGibeyoni entani?

Atenta abukeka shengatsi ahlala eveni lelikhashane. Ngako labanye kuwo bagcoka timphahla letigugile kanye netincabula letidzabukile. Batfwalisa timbongolo tabo umtfwalo wemasaka lagugile, futsi batsatsa netinkhwa letomile. Esuka acondza kuJoshuwa atsi kuye: ‘Siphuma eveni lelikhashane kakhulu, ngoba sivile ngaNkulunkulu wenu lomkhulu Jehova, nangetintfo lanentela tona eveni laseGibhithe. Ngako baholi betfu batsi sitsatse imiphako yendlela yetfu sifike sitsi kuwe: “Sitinceku tenu, yentani sivumelwane natsi kutsi angeke nilwe natsi.” Niyatibona netimphahla tetfu kutsi setigugile netinkhwa tetfu setomile ngenca yebudze balendlela.’

Joshuwa kanye nalabanye baholi bawetsemba emaGibeyoni. Ngako bawetsembisa kutsi angeke balwe nawo. Kodvwa ngemuva kwemalanga lamatsatfu, beva kutsi emaGibeyoni abomakhelwane babo.

Joshuwa wawabuta watsi: ‘Nisiyengeleni natsi nihlala khashane natsi?’

EmaGibeyoni amphendvula atsi: ‘Kungoba satjelwa kutsi Nkulunkulu wenu Jehova unitsembise kuninika lonkhe live laseKhenani. Ngako besesaba kutsi nitasibulala.’ Ema-Israyeli asigcina setsembiso sawo, angawabulali emaGibeyoni. Kodvwa bawenta aba tisebenti tawo.

Inkhosi yaseJerusalema yatfukutsela ngekutsi emaGibeyoni sekente kuthula nema-Israyeli. Ngako yatsi kulamanye emakhosi lamane: ‘Yenyukani ningisite sihlasele baseGibeyoni.’ Lamakhosi lasihlanu akwenta loko. Ingabe emaGibeyoni enta kuhlakanipha yini ngekwenta kuthula nema-Israyeli, lokwabangela kutsi lamakhosi awahlasele? Sitawubona.