INDZABA 39
Indvuku Ya-Aroni Imila Timbali
ASE ubuke letimbali nema-alimondi lavutsiwe lahluma kulendvuku. Lena yindvuku ya-Aroni. Letimbali naletitselo tamila endvukwini yakhe ngebusuku lobubodvwa-vo. Ase sibone kutsi kwenteka njani loku.
Kwase kwendlule sikhatsi ema-Israyeli azulazula ehlane. Labanye kuwo bebangasafuni kuholwa nguMosi, futsi bangasafuni nekutsi Aroni abe ngumphristi lomkhulu. Laba labebangasamfuni Mosi na-Aroni kwakunguKhora, Dathani, Abiramu kanye nebaholi labangu-250 bebantfu. Bonkhe laba beta kuMosi batsi: ‘Utiphakamiselani etikwalesive saNkulunkulu?’
Mosi watsi kuKhora nebalandzeli bakhe: ‘Ekuseni kusasa niyawutsatsa titja bese nifaka kuto umlilo nemphepho nite ethendeni laJehova. Utasikhombisa kutsi ngubani longewakhe.’
Ngakusasa, Khora nebalandzeli bakhe labangu-250 befika ethendeni lekukhontela. Labanye kuma-Israyeli nabo beta kutewusekela lamadvodza. Jehova watfukutsela kakhulu. Mosi watsi kubantfu: ‘Sukani emathendeni alabantfu, ningatsintsi lutfo lwabo.’ Bantfu balalela besuka emathendeni aKhora, Dathani kanye na-Abiramu.
Mosi wachubeka watsi: ‘Ngaloku niyawukwati kutsi Jehova ukhetse bani. Umhlaba utawuvuleka ubamite bonkhe labantfu lababi.’
Watsi Mosi nakacendza nje kusho lawo mavi, umhlaba wavele wavuleka walimita lithende laKhora nako konkhe labenako. Wamita naDathani, Abiramu kanye nabo bonkhe labebanabo, wabese uyavaleka. Nabeva kukhala kwalabo labangena ngephasi kwemhlabatsi, bantfu babaleka, bamemeta batsi: ‘Umhlaba utasimita natsi!’
Khora nebalandzeli bakhe labangu-250 bebasolo baseceleni kwelithende lekukhontela. Jehova wavele watfumela umlilo wabashisa bonkhe wabacedza nya! Wabese utsi ku-Eleyazare indvodzana ya-Aroni, akatsatse letitja telitfusi talamadvodza abeshiswe ngumlilo, atigcobe atente simbonyo seli-altare. Loku kwakuyoba sikhumbuto kuma-Israyeli sekutsi, wonkhe umuntfu longesiye umphristi nobe indvodzana ya-Aroni, akufanele atente umphristi waJehova.
Kodvwa Jehova abefuna kucace kutsi ukhetse Aroni nemadvodzana akhe kuphela kutsi babe baphristi. Ngako watsi kuMosi: ‘Umholi wesive ngasinye saka-Israyeli akaletse indvuku yakhe. Endvukwini yakaLevi ubobhala ligama la-Aroni. Letindvuku ubotibeka embikwelibhokisi lesivumelwane ethendeni lekukhontela. Indvuku yalowo lengimkhetsile kutsi abe ngumphristi, itawuhluma timbali.’
Ekuseni ngakusasa watsi Mosi uyabuka wabona indvuku ya-Aroni inetimbali nema-alimondi lavutsiwe lamilako kuyo. Manje uyabona yini kutsi kungani indvuku ya-Aroni yamila timbali?
