YINYOKA lephilako yini lena letongolotele lugodvo? Akusiyo. Lenyoka yentiwe ngelitfusi. Jehova watjela Mosi kutsi ayitongolotele elugodvweni kuze bantfu batewutsi nabayibuka baphile. Kodvwa leti letinye letisemhlabatsini tiyaphila. Tilume labantfu bagula. Uyati yini kutsi kungani?

Kungenca yekutsi ema-Israyeli akhuluma kabi ngaNkulunkulu nangaMosi. Asola atsi: ‘Nasikhiphelani eGibhithe kuze sitewufela lapha ehlane? Kute kudla nemanti lapha futsi asisayifuni nalemana.’

Kodvwa imana yayikudla lokuhle. Jehova wenta simangaliso batfola imana kanye nemanti. Kodvwa ema-Israyeli awazange ambonge Nkulunkulu ngekutsi abewanakekela. Ngako wawajezisa ngekutfumela tinyoka letinebutsi kutsi tiwalume. Labanyenti bafa ngemuva kwekulunywa nguletinyoka.

Ekugcineni bantfu beta kuMosi bafike batsi: ‘Sonile ngekukhuluma kabi ngaJehova nangawe. Thandaza kuJehova kutsi asuse letinyoka lapha kitsi.’

Mosi wathandaza kuJehova. Ngako-ke Jehova watsi kuye akente inyoka yelitfusi ayitongolotele elugodvweni. Waphindze watsi bonkhe labebalunywe tinyoka, babobuka lena letongolotelwe elugodvweni. Mosi wenta njengoba Nkulunkulu abemtjelile. Bantfu labebalunywe nguleletinye tinyoka bebabuka lena leyentiwe ngelitfusi futsi baphile.

Kunesifundvo lesisitfolako kuloku. Sonkhe siyafanana ngendlela letsite nema-Israyeli lalunywa tinyoka. Sonkhe siyafa. Nawubuka emhlabeni uyabona kutsi bantfu bayaguga, bayagula futsi bayafa. Loku kungenca yekutsi bo-Adamu na-Eva bona kuJehova, futsi sonkhe sivela kubo. Kodvwa Jehova usentele indlela yekutsi siphile phakadze.

Watfumela iNdvodzana yakhe Jesu Khristu emhlabeni. Yalengiswa elugodvweni ngenca yekutsi bantfu labanyenti bebacabanga kutsi ayikalungi. Kodvwa Jehova wanikela ngayo kuze atewusindzisa tsine. Nangabe simlingisa futsi simlandzela, sitawutfola kuphila lokuphakadze. Njengoba sichubeka, sitawufundza lokunyenti ngaloku.