SAWULA waphindze wetama kubulala Davide. Watsatsa emasotja akhe langu-3 000 wahamba wayomfuna. Nakeva ngaloku Davide, watfumela tinhloli takhe kutsi tiyewubuka lapho Sawula nemabutfo akhe bebakhona. Davide wabuta kulamadvodza lamabili abenawo: ‘Ngubani lotawehla nami siye lapha enkambu yaSawula?’

Abishayi waphendvula watsi: “Mine ngitawuhamba nawe.” Abishayi abeyindvodzana yadzadzewaboDavide longuSeruya. Kwatsi nje aselele Sawula nelibutfo lakhe, Davide na-Abishayi banyenya bangena enkambu. Batsatsa sikhali nelijeke lakhe lemanti, lobekuseceleni kwenhloko yakhe. Kute ngisho namunye lowabona, futsi weva, ngoba bonkhe bebalele saka.

Ase ubuke Davide na-Abishayi kulesitfombe. Bakhonile kuhamba baphephile, baya etulu entsabeni. Davide wamemeta indvuna yemphi yaka-Israyeli, watsi: ‘Abneri, lenkhosi yakho bewungakayigadzi ngani? Siphi nje sikhali sayo kanye nalelijeke lemanti lebekulapho eceleni kwenhloko yayo?’

Sawula wavuka, weva kutsi kumemeta Davide. Wambuta watsi: “Lelo ngabe livi lakho yini Davide?” Uyambona yini Sawula na-Abneri lapha phasi esitfombeni?

Davide wamphendvula watsi: “Yebo nkhosi yami ngimi.” Wachubeka futsi wambuta: ‘Pho, inkhosi yami iyicoshelani inceku yayo? Yini lembi lengiyentile? Nasi sikhali sakho nkhosi. Tfuma lomunye wemajaha lalapho ete asilandze.’

Sawula wavuma watsi: ‘Ngonile, ngente bulima.’ Davide watsatsa lenye indlela naSawula wabuyela ekhaya. Kodvwa Davide watsi sekayedvwa wacabanga: ‘Kuwona lamalanga Sawula utangibulala. Kufanele ngibaleke ngiye eveni lemaFilisti.’ Nguloko kanye lakwenta. Wakhona kuyenga emaFilisti wawenta akholelwa kutsi sewuyawasekela.

Kwatsi ngemuva kwesikhatsi, emaFilisti ahamba ayolwa nema-Israyeli. BoSawula naJonathani babulawa kuleyomphi. Weva buhlungu kakhulu Davide, waze wabhala lengoma lemnandzi, wahlabela watsi: ‘Ngiva buhlungu ngawe mnaketfu Jonathani. Bewuligugu kimi!’

Ngemuva kwaloko Davide wabuyela emuva ka-Israyeli edolobheni laseHebroni. Kwaba nemphi emkhatsini walamadvodza labekhetse indvodzana yaSawula Ishboshethi kutsi ibe yinkhosi, nalawa labefuna kutsi kube nguDavide inkhosi. Ekugcineni emadvodza labenaDavide aphumelela. Abesaneminyaka lengu-30 budzala Davide ngalesikhatsi abekwa kutsi abe yinkhosi. Iminyaka lesikhombisa nencenye abebusa eHebroni. Lamanye emadvodzana akhe kwakungu-Amnoni, Absalomu kanye na-Adoniya.

Sefika sikhatsi lapho Davide nemabutfo akhe batsatsa lidolobha lelihle lelibitwa ngekutsi yiJerusalema. Jowabe, lenye indvodzana yaSeruya, yayihamba embili kulemphi. Davide wambusisa Jowabe ngekumenta indvuna yelibutfo lemphi yakhe. Davide wacala-ke kubusa edolobheni laseJerusalema.