ASE ubuke lendvodza lesemantini. Uyayibona yini kutsi isenkingeni? Lenhlanti ifuna kuyigwinya. Uyati kutsi ingubani lendvodza? Ligama layo nguJona. Ase sibone kutsi wangena kanjani enkingeni lengaka.

Jona abengumphrofethi waJehova. Kwakungakabi sikhatsi lesidze umphrofethi Elisha afile, lapho Jehova amtjela loku: ‘Hamba uye eNineve, lidolobha lelikhulukati. Bubi bebantfu sebandze kakhulu, futsi ngifuna ukhulume nabo ngaloko.’

Kodvwa Jona abengafuni kuya eNineve. Ngako wavele wagibela umkhumbi longayi khona. Jehova akazange ajabule ngekutsi Jona wabaleka. Ngako wabangela kutsi kube nemoya lomkhulu elwandle. Lomoya wawumubi kakhulu kangangekutsi umkhumbi waba sengotini yekucwila. Labantfu lebebasemkhunjini bafikelwa kwesaba lokukhulu, futsi bacala kukhala kubonkulunkulu babo bacela lusito.

Ekugcineni Jona watsi kubo: ‘Ngikhonta Jehova Nkulunkulu, lowadala lizulu nemhlaba. Ngibalekele kwenta loko Jehova langitjele kona kutsi ngikwente.’ Labantfu bambuta: “Sitakwenta njani-ke ngawe, kute lesivunguvungu sibindze?”

Jona wabaphendvula watsi: ‘Ngijikijeleni elwandle, lutawubese luyabindza.’ Labantfu bebangafuni kukwenta loko, kodvwa nasewuhhusha kakhulu lomoya, bamtsatsa bamjikijela elwandle. Ngaso leso sikhatsi umoya wathula, nelwandle lwase luyabindza.

Ngalesikhatsi Jona acwila emantini, inhlanti lenkhulu yamgwinya. Kodvwa akazange afe, wahlala esiswini salenhlanti emalanga lamatsatfu nebusuku lobutsatfu. Watisola ngekungamlaleli kwakhe Jehova nangekutsi angayi eNineve. Uyati kutsi yini-ke layenta?

Wathandaza kuJehova wacela lusito. Ngako Jehova wabangela kutsi lenhlanti imkhafulele emhlabatsini lowomile. Ngemuva kwaloko Jona wahamba waya eNineve. Akusifundzisi yini loku kutsi kubalulekile kwenta konkhe Jehova lakushoko?