NAKUNGENTEKA ufe, make wakho angativa njani nawungavuswa? Angajabula! Kodvwa umuntfu lofile angavuswa yini? Kwake kwenteka yini kutsi umuntfu lofile avuswe?

Ase ubuke lendvodza, lomake, kanye nalomfana lomncane labakulesitfombe. Lendvodza ngumphrofethi Elija. Lomake, ngumfelokati wasedolobheni laseSerefathi, kantsi lomfana yindvodzana yakhe. Kwatsi ngalelinye lilanga lomfana wagula. Wachubeka agula emalanga lamanyenti, ekugcineni wafa. Elija watsi kulomake: ‘Nginikete lomfana.’

Elija wamtsatsa lomntfwana lofile, wakhuphukela naye ekamelweni lelisetulu, wafike wamlalisa embhedzeni. Wathandaza watsi: ‘Awu! Jehova, yenta lomfana aphindze aphile futsi.’ Umfana wacala waphefumula! Ngako Elija wamtsatsa wammikisa kunina wakhe. Wefika kuye watsi: ‘Buka-ke, umfana wakho uyaphila.’ Kungako lomake ajabule kangaka lana esitfombeni.

Lomunye umphrofethi waJehova lobalulekile kwakungu-Elisha. Abengumsiti wa-Elija. Kodvwa kwatsi nakuchubeka sikhatsi Jehova wamsebentisa naye kutsi ente timangaliso. Ngalelinye lilanga Elisha waya edolobheni laseShunemu, lapho afike watfola inkhosikati letsite lenemusa. Ngekuhamba kwesikhatsi lenkhosikati yatala luswane lolungumfana.

Ngalelinye lilanga ekuseni, asakhulile lomntfwana, waya kubabe wakhe wayosebenta naye ensimini. Lomfana wevakala asakhala atsi: “Ngafa yinhloko! Ngafa yinhloko!” Bamtsatsa bammikisa ekhaya, lapho afike wafela khona. Make wakhe weva buhlungu kakhulu. Ngekushesha waphuma wayobita Elisha.

Kwatsi kube efike Elisha, wangena kulelikamelo lebelinemntfwana lofile. Wathandaza kuJehova, futsi wabhabhalala etikwesidvumbu. Umtimba wemfana wacala kufutfumala, futsi watsimula kasikhombisa. Make wakhe wajabula kakhulu nakangena kulelikamelo, ngoba watfola indvodzana yakhe seyiphila.

Banyenti kakhulu bantfu lesebafa. Loku kuyivisa buhlungu imindeni kanye nebangani. Tsine site emandla ekuvusa bantfu labafile, kodvwa Jehova yena unawo. Ngekuhamba kwesikhatsi sitawufundza ngekutsi utativusa njani tigidzi tebantfu lesetafa.