YINI leyentekako lana? Bantfu banelidzili lelikhulu. Inkhosi yaseBhabhulona imeme inkhulungwane yetivakashi letibalulekile. Basebentisa tinkomishi tegolide, tesiliva kanye netitja, letitsetfwe ethempelini laJehova leliseJerusalema. Ngekushesha, kubonakala iminwe yesandla semuntfu emoyeni, futsi ibhala elubondzeni. Bonkhe bantfu bacala kwesaba.

Umtukulu waNebukhadnezari, longuBhelshasari abe yinkhosi ngaleso sikhatsi. Watsi nakabona loku wamemeta watsi akulandvwe emadvodza lahlakaniphile. Wakhuluma nawo watsi: ‘Noma ngabe ngubani longafundza lombhalo, angitjele kutsi usho kutsini, utawunikwa tipho letinyenti futsi entiwe abengumbusi wesitsatfu lobalulekile embusweni.’ Kodvwa kute ngisho namunye kuwo lowakwati kuwufundza lombhalo loselubondzeni, futsi akekho lowakwati kuwuchaza.

Make wakhe watsi kube eve umsindvo, weta wangena kulendlu lebekunelindzili kuyo. Wefika watsi enkhosini: ‘Ungetfuki nkhosi, ngoba kukhona indvodza lapha embusweni wakho lenemoya wabonkulunkulu. Ngesikhatsi mkhulu wakho aseyinkhosi wayenta indvuna yawo onkhe emadvodza lahlakaniphile. Lendvodza ligama layo nguDanyela. Mbite, ngoba yena utakutjela kutsi lombhalo usho kutsini.’

Ngalesosikhatsi Danyela walandvwa, wangeniswa embikwenkhosi. Watsi asatalile tonkhe tipho labebamnika tona, wachaza kutsi kungani Jehova amehlisa Nebukhadnezari esihlalweni sakhe sebukhosi. Watsi: ‘Kungenca yekutsi watigcabha, ngako Jehova wamjezisa.’

Danyela watsi kuBhelshasari: ‘Kodvwa wena, ngisho noma bewukwati konkhe loku, awutitfobanga, watigcabha njengaNebukhadnezari. Utsetse tinkomishi netitja tasethempelini laJehova wanatsa ngato liwayini. Ukhulekele wadvumisa bonkulunkulu labentiwe ngetingodvo nangematje. Kodvwa awumdvumisanga Umdali Lomkhulu. Kungako-ke Nkulunkulu atfumele lesandla lesibhale lombhalo.’

Danyela watsi: ‘Naku lokubhaliwe: MENE, MENE, THEKELI, PHARISINI.’

Nansi incazelo yawo: ‘MENE usho kutsi Nkulunkulu sewuwabalile emalanga embuso wakho, wawafikisa ekugcineni. THEKELI usho kutsi sewukaliwe etikalweni, watfolakala ulula. PHARISINI yena usho kutsi umbuso wakho utawunikwa emaMede nemaPheresiya.’

Kwatsi angakacedzi ngisho nje nekukhuluma Danyela, emaMede nemaPheresiya acala kulihlasela liBhabhulona. Awutsatsa umbuso, futsi agwaza abulala Bhelshasari. Ngabo lobo busuku lokwakubhalwe sandla kwagcwaliseka. Kodvwa yini leyayitawenteka ngema-Israyeli? Sitawufundza ngaloko, kodvwa Kwanyalo ase sibone kutsi kwentekani ngaDanyela.