USAKHUMBULA yini kukhulunywa ngalabafana labatsatfu? Yebo, babangani baDanyela labala kudla lebebakuniketwa yinkhosi. BaseBhabhulona bebababita ngekutsi boShadraki, Meshaki na-Abednego. Kodvwa ase ubabuke manje kulesitfombe. Kungani bangasikhotsameli lesithico lesikhulu njengalaba labanye bantfu? Ase sibone.

Usayikhumbula lemitsetfo Jehova layibhala, lebitwa ngekutsi iMiyalo Lelishumi? Wekucala kuyo utsi: ‘Ungakhonti labanye bonkulunkulu ngaphandle kwami.’ Labafana labakulesitfombe balalela loyomtsetfo, nobe nje kwakungesiyo intfo lemelula kuwulalela.

Nebukhadnezari inkhosi yaseBhabhulona, wabita bantfu labanyenti labasetikhundleni letisetulu, kutsi batewukhulekela sithico labesimisile. Watsi kubantfu: ‘Kutawutsi naniva umsindvo wempalampala, wemntjingozi kanye nekwato tonkhe tinhlobo tekuhlabelela, kufanele niwe phansi nikhotsame kulesithico segolide. Lowo longawi phansi asikhotsamele, utawujikijelwa masinyane ekhatsi elangabini lemlilo lowesabekako nalohhumako.’

Nebukhadnezari watfukutsela wabila nakeva kutsi boShadraki, Meshaki na-Abednego abazange bakhotsame. Ngako watsi abaletfwe kuye. Waphindze wabaniketa lelinye litfuba lekutsi basikhotsamele. Kodvwa labafana labancane bebatsembele kuJehova, batsi kuye: ‘Nkulunkulu wetfu lesimkhontako unemandla ekusisindzisa. Kodvwa ngisho nobe angakakwenti loko, angeke sikhotsame kulesithico sakho segolide.’

Nakeva loku, watfukutsela kakhulu kunakucala. Ngako-ke watsi: ‘Akubaswe emalangabi emlilo lowesabekako nalohhumako kutsi ushise ngalokuphindvwe kasikhombisa.’ Wase utsi emadvodza emphi yakhe labenemandla lamakhulu awababophe, bese abajikijela ekhatsi elangabini lemlilo. Lomlilo wawushisa kakhulu, kangangekutsi waze wahashula lamadvodza lanemandla afa. Kodvwa kwentekani kulabafana labatsatfu labaphoswa ekhatsi kuwo?

Inkhosi yabuka ekhatsi kulelilangabi, futsi yacala kwesaba. Ngako yabuta: ‘Abengematsatfu yini lamadvodza lesiwabophe sawajikijela lapha ekhatsi emlilweni?’

Letinceku tayiphendvula tatsi: “Impela, nkhosi kunjalo.”

Yatsi: ‘Kodvwa ngibona emadvodza lamane ahambahamba lapha ekhatsi emlilweni, atfukululiwe, futsi awashi, kantsi lona wesine ufanana nendvodzana yabonkulunkulu.’ Inkhosi yasondzela emnyango walomlilo lowesabekako, yamemeta yatsi: “Shadraki, naMeshaki, nawe Abednego, nine tinceku taNkulunkulu Longetulu Kwako Konkhe, phumani!”

Batsi nabaphuma, bonkhe bantfu bababona kutsi bebangakalimali. Ngako inkhosi yatsi: ‘Akadvunyiswe Nkulunkulu waboShadraki, naMeshaki, na-Abednego, lotfume ingilosi yakhe kutsi ibasindzise ngobe abazange bakhotsamele futsi bakhonte lomunye nkulunkulu ngaphandle kwaNkulunkulu wabo.’

Akusiso yini lesi sibonelo lesihle sekwetsembeka kuJehova lokufanele sisilingise?