LONA nguJesu, useNtsabeni yeMincumo. Unebaphostoli bakhe labane. Kwakungu-Andreya nemnakabo Phetro, kanye naJakobe nemnakabo Johane. Lokwa lokubonako emuva kwabo, lithempeli laNkulunkulu leliseJerusalema.

Kwasekwendlule emalanga lamabili, Jesu angene eJerusalema agibele litfole lembongolo. KwakunguLesibili ekuseni, Jesu abesethempelini, ngesikhatsi baphristi betama kumbamba bambulale. Kepha besaba kukwenta loko, ngoba bantfu bebamtsandza Jesu.

Jesu wabita labaholi benkholo ngekutsi ‘tinyoka nentalo yetinyoka.’ Jesu wabese utsi Nkulunkulu utawubajezisa ngenca yato tonkhe tintfo letimbi labatentile. Ngemuva kwaloko, wakhuphukela eNtsabeni yeMincumo, futsi labaphostoli bakhe labane bacala kumbuta imibuto. Uyati yini kutsi bebambuta ini?

Labaphostoli bebambuta ngetintfo letitawukwenteka esikhatsini lesitako. Bebati kutsi Jesu utabucedza bonkhe bubi emhlabeni. Kepha bebafuna kwati kutsi kutawukwenteka nini loku, nekutsi Jesu utawucala nini kubusa abe yiNkhosi.

Jesu bekati kutsi balandzeli bakhe labasemhlabeni bebangeke bambone lapho sekabuya. Kungoba abetawube asezulwini futsi bebangeke bambone lapho. Ngako-ke, Jesu watjela baphostoli bakhe letinye tintfo letitawenteka emhlabeni, lapho sayiNkhosi ezulwini. Ngutiphi letinye tato?

Jesu watsi kuyawuba netimphi, tifo letingelapheki, indlala, kwandza kwebugebengu kanye nekutamatama kwemhlaba. Waphindze watsi tindzaba letinhle ngembuso waNkulunkulu titawushunyayelwa emhlabeni wonkhe. Tiyenteka yini letintfo leti esikhatsini lesiphila kuso namuhla? Yebo! Siyaciniseka futsi kutsi Jesu sewuyabusa ezulwini. Masinyane nje utawucedza tonkhe letintfo letimbi emhlabeni.