ASE ubuke lomfana lokhuluma nalamadvodza. Abafundzisi ethempelini laNkulunkulu leliseJerusalema. Lomfana nguJesu. Abesakhulakhulile aneminyaka lengu-12 budzala.

Bafundzisi bamangele kakhulu ngekutsi Jesu wati tintfo letinyenti ngaNkulunkulu kanye naletibhalwe eBhayibhelini. Kepha kungani boJosefa naMariya bangekho lapha? Bakuphi? Ase sibone.

Minyaka yonkhe Josefa nemndeni wakhe abeya emkhosini weliPhasika eJerusalema. Libanga lelidze kusuka eNazaretha kuya eJerusalema. Bekute lonemoto, futsi bekute netitimela ngaleso sikhatsi. Linyenti lebantfu lalihamba ngetinyawo futsi kwakubatsatsa cishe emalanga lamatsatfu kufika eJerusalema.

Josefa abesanemdeni lomkhulu. Bekunalabanye bodzadze waJesu kanye nebanakabo labancane, futsi lebebadzinga kunakekelwa. Ngawo lowomnyaka, Josefa naMariya batsatsa luhambo loludze sebabuyela eNazaretha bakanye nebantfwana babo. Bebacabanga kutsi Jesu uhambisana nabontsanga yakhe. Kepha kwatsi sekunguntsambama, batfola kutsi Jesu akekho. Bamfuna etihlotjeni nakubangani bakhe, kodvwa abengekho. Babuyela eJerusalema bayomfuna.

Bagcina bamtfole lapha akanye nebafundzisi. Abebalalele futsi ababuta imibuto. Bonkhe bantfu bebamangele ngendlela Jesu labehlakaniphe ngayo. Kepha Mariya watsi: ‘Mntfwanami, ukwenteleni loku kitsi? Mine nababe wakho besesiphatseke kabi ngekukufuna singakutfoli.’

Jesu wamphendvula watsi: ‘Beningifunelani? Beningati yini kutsi kufanele ngibe sendlini yaBabe?’

Jesu abekutsandza kuba lapho angafundza khona ngaNkulunkulu. Akukafaneli yini natsi sitive ngaleyondlela? Asesekhaya eNazaretha, Jesu abeya emihlanganweni yekukhulekela Nkulunkulu maviki onkhe. Ngenca yekutsi abelalelisisa, wafundza tintfo letinyenti letiseBhayibhelini. Shengatsi singasilandzela lesibonelo saJesu, sifane naye.