UYAMBONA yini Jesu lapha? Abefundzisa labantfu entsabeni yaseGalile. Laba labahleti edvute naye, bafundzi bakhe. Wakhetsa labangu-12 kubo, kutsi babe baphostoli bakhe. Baphostoli, kwakubafundzi baJesu labakhetsiwe. Uyawati emagama abo?

BekunaSimoni Phetro nemnakabo, Andreya. Kuphindze kube naJakobe nemnakabo longuJohane. Kwakunalomunye futsi Jakobe kanye naSimoni. Kwakunabo Judasi lababili. Lomunye kwakungu Judasi Skariyothi kantsi lona lomunye abebitwa ngekutsi nguThadiyosi. Kwakuphindze kube naFiliphu kanye naNathanayeli (labebitwa ngekutsi nguBhatalomewu), bese kuba nguMatewu kanye naTomase.

Ngemuva kwekubuya kwakhe eSamariya, Jesu washumayela kwekucala ngca, atsi: ‘Umbuso waNkulunkulu sewusondzele.’ Uyati kutsi lombuso uyini? Unguhulumende waNkulunkulu. Jesu uyinkhosi yawo, futsi utawubusa asezulwini, aletse kuthula emhlabeni. Lombuso waNkulunkulu utawukwenta wonkhe umhlaba ube lipharadisi lelihle.

Lapha Jesu abefundzisa bantfu ngembuso waNkulunkulu. Wabachazela kutsi nabathandazako babotsi: ‘Babe wetfu losezulwini, alingcweliswe ligama lakho. Umbuso wakho awute. Intsandvo yakho ayentiwe emhlabeni, njengobe yentiwa ezulwini.’ Bantfu labanyenti bawubita ngekutsi ‘NgumThandazo weNkhosi’ kantsi labanye batsi ‘nguBabe Wetfu’. Ungawusho wonkhe yini wena lomthandazo?

Jesu waphindze wafundzisa bantfu indlela yekuphatsa labanye. Watsi: ‘Konkhe lenifisa kutsi bantfu bakwente kini, kwenteni nani kubo.’ Awujabuli yini wena uma labanye bakuphatsa ngemusa? Ngako-ke, Jesu watsi kufanele siphatse labanye ngemusa. Angeke kube kuhle yini epharadisi, lapho bonkhe bantfu batawukwenta loku?