LENTFOMBATANA loyibona lapha ineminyaka lengu 12 budzala. Jesu uyibambe ngesandla, futsi bomake nababe wayo beme eceleni. Uyati kutsi kungani babukeka bajabulile? Ase sibone.

Babe walentfombatana abeyindvodza lebalulekile, lokwakutsiwa nguJayiru. Ngalelinye lilanga indvodzakati yakhe yagula kamatima, futsi yalala phansi. Kepha ayibanga ncono, kunaloko kugula kwadlanga. Jayiru nemkakhe bakhatsateka, ngoba kwakubonakala shengatsi lomntfwana wabo utawukufa. Kwakunguye kuphela umntfwana lebebanaye. Ngako-ke Jayiru waya kuyewufuna Jesu, ngoba abesevile ngetimangaliso labetenta.

Ngesikhatsi Jayiru amtfola, wamkhandza atungeletwe sicumbi sebantfu. Kepha Jayiru wangena kulesicumbi, futsi waguca embikwaJesu. Watsi kuye: ‘Indvodzakati yami igulela kufa, ngicela ute utoyelapha.’ Jesu watsi utawukuya.

Njengobe bahamba, sicumbi sebantfu sasimkake ngala nangala. Ngekushesha Jesu wema, futsi wabuta watsi: “Ngubani longitsintsile?” Jesu weva emandla akhe aphuma, wase uyabona kutsi kukhona lomtsintsile. Kepha kwakungubani? Kwakungumfati lobesagule iminyaka lengu 12. Abesondzele kuJesu, watsintsa ingubo yakhe, futsi waphila.

Loku kwenta Jayiru waba nelitsemba, ngoba abona kutsi kulula kanjani ngaJesu kwelapha bantfu. Kwefika sitfunywa satsi kuye: ‘Ungasamhluphi Jesu, ngoba indvodzakati yakho seyifile.’ Jesu wakuva loku, futsi watsi kuJayiru: ‘Ungesabi ngoba utawuphila.’

Lapho efika endlini yaJayiru, bonkhe bantfu bebakhala kalusizi. Kepha Jesu watsi: “Ningakhali, ngoba akafi, ulele nje.” Kepha bamhleka bulima, ngoba bese bati kutsi ufile.

Jesu wase utsatsa babe namake walentfombatana, kanye nebaphostoli bakhe labatsatfu, wangena nabo kulendlu lapho beyilele khona. Wayibamba ngesandla watsi kuyo: ‘Vuka!’ Ngemuva kwaloko yavuka, njengoba uyibona lapha, futsi yacala kuhamba. Kungako-ke bomake nababe wayo bajabulile.

Lona kwakungesuye umuntfu wekucala Jesu lamvusa. Wekucala liBhayibheli lelikhuluma ngaye, kwakuyindvodzana yemfelokati labehlala edolobheni laseNayini. Ngemuva kwaloko Jesu waphindze wavusa Lazaro, umnakabo Mariya naMata. Lapho asabusa njengenkhosi lemiswe nguNkulunkulu, Jesu utawuvusa bantfu labanyenti. Akusijabulisi yini loko?