KWAKUNALOKUTSITE lokubi lokwakwentekile. Kwakubulewe Johane uMbhabhatisi. Herodiyasi, umfati wenkhosi abengamtsandzi. Ngaloko wakhona kwenta inkhosi kutsi ijube inhloko yaJohane.

Lapho Jesu eva ngaloku, weva buhlungu kakhulu, futsi waya endzaweni lethulile. Sicumbi sebantfu samlandzela. Lapho ababona, wabavela buhlungu. Ngako-ke wakhuluma nabo ngembuso waNkulunkulu, futsi welapha lebebagula.

Entsambama, bafundzi bakhe beta kuye batsi: ‘Selishonile lilanga, kantsi nalendzawo ilihlane. Sale ubahambisa labantfu, baye emadolobheni ladvutane, bayewutifunela labangahle bakudle.’

Jesu watsi kubo: “Akudzingeki kutsi bahambe, bapheni nine kudla, badle.” Wase utsi kuFiliphu: ‘Labantfu sitawubatsengela kuphi kudla?’

Filiphu wamphendvula watsi: ‘Kutawubita kakhulu kutsenga kudla lokutawenela bonkhe labantfu.’ Andreya watsi kuye: ‘Kukhona umfana lapha lonetinkhwa letisihlanu, netinhlanti letimbili. Kepha angeke kubenele bonkhe labantfu.’

Jesu watsi: ‘Tjelani labantfu bahlale phansi.’ Wabese uyathandaza kuNkulunkulu, wabonga lokudla, futsi wakuhlephula. Ngemuva kwaloko, bafundzi bakhe batsatsa letinkhwa naletinhlanti batinika labantfu. Kwakunemadvodza lacishe abe ngu-5 000, kanye netinkhulungwane tebafati nebantfwana. Bonkhe badla baze besutsa. Lapho bafundzi babutsa kudla lokwakusele, kwagcwala bobhasikidi labangu-12.

Jesu wase utjela bafundzi bakhe kutsi bagibele esikebheni, kuze baye ngesheya kweLwandle lwaseGalile. Ebusuku kwaba nemoya lomkhulu, futsi emagagasi ayisa sikebhe ngala nangala. Bafundzi bakhe besaba kakhulu. Ekhatsi nebusuku, babona umuntfu eta kubo ahamba etikwemanti. Bamemeta ngekwesaba, ngoba bebangati kutsi yini lena labayibonako.

Jesu watsi kubo: ‘Ningesabi, ngimi!’ Bebasolo bangakukholwa loko. Ngako-ke Phetro watsi: ‘Nkhosi, nakunguwe, ngibite ngite lapho kuwe, ngihamba etikwemanti.’ Jesu wamphendvula watsi: ‘Wota!’ Phetro wase uyehla esikebheni waya kuye ahamba etikwemanti! Wefikelwa kwesaba, futsi wacala kucwila, kodvwa Jesu wase uyambamba.

Jesu waphindze wesutsisa letinye tinkhulungwane tebantfu. Ngaleso sikhatsi, wasebentisa tinkhwa letisikhombisa kanye netinhlanti letimbalwa. Kwaphindze kwaba nekudla lokunyenti, kwabo bonkhe bantfu. Akujabulisi yini kubona indlela Jesu lanakekela ngayo bantfu? Lapho asabusa njengenkhosi lemiswe nguNkulunkulu, angeke siphindze sikhatsateke ngalutfo!