NGALELINYE lilanga Jesu watjela lenye indvodza kutsi kufanele itsandze makhelwane wayo. Yambuta yatsi: “Ngubani makhelwane wami?” Jesu bekati kutsi lendvodza icabangani. Beyicabanga kutsi makhelwane wayo ngumuntfu wesive nobe inkholo yakubo. Ngako-ke ase sibone kutsi yini Jesu layisho kulendvodza.

Ngaletinye tikhatsi Jesu abefundzisa ngekutsi acoce indzaba. Nguloko lakwentako nyalo. Ucoca indzaba yemJuda nemSamariya. Besesifundzile kutsi emaJuda lamanyenti abengawatsandzi emaSamariya. Nayi lendzaba yaJesu:

Ngalelinye lilanga umJuda abehamba ngendlela yasentsabeni, aya eJerikho. Watsi asahamba wahlaselwa tigebengu. Tatsatsa imali yakhe, futsi tamshaya wacishe wafa.

Ngemuva kwaloko, umphristi longumJuda abehamba ngaleyo ndlela, futsi wambona lomuntfu loshaywe nguletigebengu. Ucabanga kutsi yini layenta? Wavele wamgega, futsi wachubeka neluhambo lwakhe. Kusenjalo, kwachamuka lomunye umuntfu lokholwako. KwakungumLevi. Wema yini yena? Cha, naye akemanga kute asite lomuntfu. Uyambona yini lomphristi nalomLevi, bachubeka neluhambo lwabo?

Uyabona yini kutsi ngubani lona losita lomuntfu lolimele? NgumSamariya, futsi ufaka umutsi kuletilondza talomJuda. Ngemuva kwaloko, wase uyamtsatsa wamyisa endzaweni lapho abetawuphumulela khona, futsi abe ncono.

Ngemuva kwekucedza lendzaba, Jesu wase utsi kulendvodza lebeyimbute umbuto: ‘Ngumuphi-ke kulabantfu labatsatfu longatsi waba ngumakhelwane kulomuntfu lowahlaselwa tigebengu? Kwakungulomphristi, umLevi nobe lomSamariya yini?’

Lendvodza yamphendvula yatsi: ‘NgulomSamariya, ngoba wamsita.’

Jesu wase utsi kuye: ‘Ucinisile. Hamba nawe wente njalo.’

Awuyitsandzi yini indlela Jesu labefundzisa ngayo? Singafundza lokunyenti ngekulalela loko Jesu lakusho eBhayibhelini, angitsi kunjalo?