UYATI kutsi ngubani lomuntfu lolele phasi? NguSawula. Khumbula phela kutsi ungulelijaha lelaligadze emajazi alamadvodza lagcoba Stefano ngematje. Uyakubona yini lokukhanya lokukhulu? Kantsi kwentekani vele?

Ngemuva kwekubulawa kwaStefano, Sawula wahola ekutingeleni balandzeli baJesu futsi abebahlukumeta. Abephuma angena tindlu ngetindlu, futsi abahudvulela ngephandle abafaka ngisho nasemajele. Labanyenti kulabafundzi babalekela kulamanye emadolobha, bebatsi nabefika kuwo bashumayele ‘tindzaba letinhle.’ Kodvwa Sawula waya nakulamanye emadolobha kuze ababambe balandzeli baJesu. Njengoba ubona lana esitfombeni, abesendleleni leya eDamaseko. Kodvwa endleleni kwenteka intfo leyetfusako:

Ngekuphatima kweliso, kwavela kukhanya lokukhulu kwatungeleta Sawula. Washayeka phasi, njengoba umbona lapha. Kwevakala livi litsi kuye: ‘Sawula! Ye Sawula! Ungihluphelani?’ Lamadvodza labehamba naye awuva lomsindvo walelivi, kodvwa awazange eve kutsi litsini.

Wabuta watsi: ‘Ungubani Nkhosi?’

Livi laphendvula latsi: ‘NginguJesu, lona lomhluphako.’ Jesu washo loku ngoba ngalesikhatsi Sawula ahlupha balandzeli bakhe, kwakufanana nekutsi uhlupha yena.

Sawula wabuta watsi: ‘Kufanele ngenteni Nkhosi?’

Jesu watsi kuye: ‘Sukuma uye eDamaseko, lapho utawutjelwa kutsi kufanele wenteni.’ Watsi Sawula naka sukuma wavula emehlo akhe, kodvwa emehlo ehluleka kubona. Abesayimphumphutse! Ngako lamadvodza labehamba nawo ambamba ngesandla amyisa eDamaseko.

Manje Jesu wakhuluma nalomunye webafundzi bakhe labeseDamaseko, watsi: ‘Tilungiselele Ananiyase, kuhamba uye eSitaladini Lesicondzile. Ufike endlini yaJudasi ucele indvodza ligama layo lokunguSawula. Ngoba ngimkhetsile kutsi abe yinceku yami lebalulekile.’

Ananiyase walalela. Watsi nakahlangana naSawula, wabeka tandla etikwakhe, watsi kuye: ‘INkhosi ingitfume kuwe, kuze uphindze ubone, futsi ugcwaliswe ngemoya longcwele.’ Masinyane kwawa lokutsite lokufanana nenkhwetfu emehlweni aSawula, waphindze wabona futsi.

Sawula wasetjentiswa kakhulu ekushumayeleni kubantfu betive letinyenti. Ngekuhamba kwesikhatsi wagcina asatiwa ngekutsi ngumphostoli Pawula, futsi sitawufundza lokunyenti ngaye. Kodvwa kwekucala, ase sibone kutsi Nkulunkulu watfuma Phetro kutsi ayokwentani.