NGEMUVA kwekuba boPhetro naJohane sebesukile ethuneni lapho bekubekwe khona sidvumbu saJesu, Mariya wasala yedvwa. Wacala kukhala. Ngako wabuka ekhatsi ethuneni, njengoba simbonile esitfombeni lesisekhasini lelendlulile. Wabona tingilosi letimbili. Tambuta tatsi: “Make, ukhalelani?”

Mariya watiphendvula watsi: “Sebatsetse iNkhosi yami, angati nekutsi bayibeke kuphi!” Ngemuva kwekusho njalo, wagucuka wabona lenye indvodza, yambuta yatsi: ‘Ufuna bani?’

Mariya abecabanga kutsi lendvodza beyingumlindzi wengadzi, nekutsi kungenteka ngiyo lebeyitsetse sidvumbu saJesu. Ngako watsi kuyo: ‘Nkhosi, nangabe sitsetfwe nguwe, ngilayele lapho usibeke khona.’ Kodvwa lendvodza kwakunguJesu. Abesanemtimba Mariya langawati. Kwatsi ngalesikhatsi ambita ngeligama lakhe, Mariya weva kutsi lendvodza nguJesu. Ngako wagijima wayotjela bafundzi: ‘Ngiyibonile iNkhosi!’

Kusihlwa ngalelolanga, ngalesikhatsi bafundzi lababili bahamba baya edolobhaneni lase-Emawusi, kwasondzela lenye indvodza, yahambisana nabo. Labafundzi bebaphatseke kabi ngenca yekutsi Jesu abebulewe. Kodvwa ngalesikhatsi bahamba nayo, yayibachazela tintfo letinyenti letitfolakala eBhayibhelini, futsi loko kwabenta bativa bancono. Baphumula endleleni badla, futsi base bayabona kutsi lendvodza labakhuluma nayo nguJesu. Ngemuva kwaloko Jesu wanyamalala, futsi bona bancandzeka babuyela eJerusalema kute batjele baphostoli ngaye.

Ngalesikhatsi kwenteka loko, Jesu watibonakalisa kuPhetro. Laba labanye bafundzi bajabula nakabacocela ngaye. Nalabafundzi lababili batsi nabefika eJerusalema batfola baphostoli. Babachazela kutsi Jesu utibonakalise njani kubo ngalesikhatsi basendleleni. Batsi basakhuluma ngaloko, uyati kutsi nguyiphi intfo lemangalisako leyenteka?

Ase ubuke lesitfombe. Jesu watibonakalisa kulendlu lebebakuyo, nobe nje umnyango wayo wawukhiyiwe. Bajabula kakhula bafundzi bakhe. Leli kwakulilanga lelijabulisako! Ungatibala yini tikhatsi Jesu latibonakalisa ngato kubalandzeli bakhe? Tisihlanu.

Ngalesikhatsi Jesu atibonakalisa, umphostoli Tomase abengekho. Ngako bafundzi bamtjela batsi: “Siyibonile iNkhosi!” Kodvwa Tomase watsi ufuna kumbona kucala Jesu ngembi kwekuba akholwe. Ngemuva kwemalanga lasiphohlongo bafundzi bandzawonye kulendlu lekhiyiwe, Tomase naye abekhona. Bangakanaki, Jesu waphindze watibonakalisa kubo kuleyondlu. Ekugcineni Tomase naye wakholwa.