AWU! Kantsi kwentekani lana? Lomfana lolele phasi emhlabatsini ulimele yini? Buka lamadvodza laphuma kulendlu, lenye yawo nguPawula. Uyambona yini naThimothi? Lomfana uwe efasitelweni yini?

Yebo, uwe khona. Pawula abekhuluma nebafundzi baseThrowasi. Abati kutsi kwakutawengca sikhatsi lesidze ngembi kwekuba aphindze ababone. Phela ngakusasa kwasekufanele ahambe ngemkhumbi, ngako wavele wakhuluma kwaze kwaba sekhatsi nebusuku.

Lomfana ligama lakhe lokwakungu-Oyuthikhusi abehleti efasitelweni. Wase sewutunywa butfongo. Wawela phasi asuka esitezi sesitsatfu. Sewuyabona-ke nyalo kutsi kungani labantfu labalana kulesitfombe baphatseke kabi. Atsi lamadvodza nawamphakamisa amtfola anjengoba abecabanga, abefile.

Watsi Pawula nakabona kutsi lomfana ufile, wavele wabhabhalala etikwakhe, futsi wamgaca ngemkhono. Wase utsi kubantfu bebalapho: ‘Ningakhatsateki, akakafi!’ Abecinisile! Kwenteka simangaliso, Pawula wamvusa. Sicumbi sebantfu sajabula kakhulu.

Bonkhe babuyela endlini, befika badla. Pawula wachubeka akhuluma nabo kwaze kwadzabuka kusa. Kodvwa ungaciniseka kutsi Oyuthikhusi akazange asalala ngemuva kwaloko. BoPawula, naThimothi kanye nalaba labanye labebahamba nabo, bagibela umkhumbi. Uyati yini kutsi bebayaphi?

Pawula abesalucedzile luhambo lwakhe lwesitsatfu lwekuyoshumayela, ngako nyalo abesabuyela ekhaya. Kuloluhambo lwesitsatfu abehlale iminyaka lemitsatfu edolobheni lase-Efesu kuphela. Ngako siyabona kutsi loluhambo lwesitsatfu lwaba ludze kunalolu lwesibili.

Ngemuva kwekusuka eThrowasi, bamisa umkhumbi wabo eMilethusi kwesikhashana. Ngenca yekutsi kwasekumane kungemakhilomitha lambalwa nje e-Efesu nawulapho, Pawula wacela babonisi bemabandla alapho kutsi bete eMilethusi khona atewukhuluma nabo kwekugcina. Kwatsi nasekufike sikhatsi sekutsi umkhumbi usuke, bonkhe bakhala kakhulu ngoba Pawula abesahamba.

Ekugcineni umkhumbi wefika eKhesariya. Ngalesikhatsi Pawula asahleti endlini yemfundzi longuFiliphu, umphrofethi longu-Agabusi wamecwayisa. Wamtjela kutsi abetawuboshwa nakefika eJerusalema. Nguloko lokwenteka. Ngako, ngemuva kwekuba aboshwe iminyaka lemibili eKhesariya, watfunyelwa eRoma kuze ayogwetjwa ngumbusi wakhona longuKhesari. Kodvwa ase sibone kutsi kwentekani endleleni leya eRoma.