UYAYIBONA yini kutsi lentfombatana lencane nalabangani bayo bafundzani? Bafundza lencwadzi nawe loyifundzako—INcwadzi Yami Yetindzaba TeliBhayibheli. Bafundza yona kanye lendzaba nawe loyifundzako—“Indlela Yekutfola Kuphila Lokuphakadze.”

Uyati kutsi bafundza ngani? Kwekucala, bafundza ngekutsi kufanele sati Jehova kanye neNdvodzana yakhe lenguJesu nasifuna kuphila phakadze. LiBhayibheli litsi: “Kuphila lokuphakadze nguloku: kutsi bakwati wena, Nkulunkulu longuye yedvwa weliciniso, bamati naJesu Khristu lomtfumile.”

Nguyiphi indlela lesingafundza ngayo ngaNkulunkulu Jehova kanye nangeNdvodzana yakhe lenguJesu? Lenye indlela, kuyifundza yonkhe INcwadzi Yami Yetindzaba TeliBhayibheli. Ikucocela lokunyenti ngaJehova nangaJesu, angitsi kunjalo? Iphindze ikucocele lokunyenti ngetintfo labatentile naleto labasetatenta. Kodvwa kufanele singagcini nje ngekufundza lencwadzi yodvwa.

Uyayibona lena lenye incwadzi lelapha phasi kulesitfombe? LiBhayibheli. Cela lotsite akufundzele tincenye eBhayibhelini lapho letindzaba letikulencwadzi titsetfwe khona. LiBhayibheli lisitjela konkhe lesikudzingako kute sikhonte Jehova ngendlela lefanele, futsi sitfole nekuphila lokuphakadze. Ngako kufanele silifundze njalo.

Akusiko lokwenele kufundza ngaNkulunkulu Jehova kanye naJesu Khristu. Singati lokunyenti ngabo bobabili, kodvwa singakutfoli kuphila lokuphakadze. Uyati kutsi yini lenye ledzingekako?

Kufanele siphile ngekuvumelana netintfo lesitifundzako. Uyamkhumbula yini Judasi Skariyothi? Abengulomunye webaphostoli baJesu labangu-12, futsi Judasi abenelwati lolunyenti ngaJehova nangaJesu. Kodvwa yini leyenteka kuye? Ngemuva nje kwesikhatsi waba nebugovu, futsi watsengisa Jesu etitseni takhe ngetinhlavana tesiliva letingu-30. Ngako Judasi angeke akutfole kuphila lokuphakadze.

Usamkhumbula yini Gehazi, lendvodza lesafundza ngayo eNdzabeni 69? Wafuna kuba netimphahla kanye nemali lebeyingasiyo yakhe. Ngako wacamba emanga kute atfole leto tintfo, kodvwa Jehova wamjezisa. Natsi futsi utasijezisa nangabe singayihloniphi imitsetfo yakhe.

Kodvwa kunebantfu labanyenti labakhonta Jehova ngekwetsembeka. Natsi sifuna kulingisa bona, angitsi? Samuweli ngulomunye walabo lesifuna kubalingisa. Khumbula, njengoba safundza eNdzabeni 55, abeneminyaka lemine nobe lesihlanu nje kuphela budzala nakacala kukhonta Jehova ethendeni lekukhontela. Nobe ngabe umncane kanganani, loko akusho kutsi angeke ukhone kukhonta Jehova.

Kuliciniso kutsi umuntfu lesifuna kumlandzela nguJesu Khristu. Ngisho asengumfana njengoba sibonile eNdzabeni 87, abesethempelini akhuluma nalabanye ngaBabe wakhe losezulwini. Natsi asilandzele sibonelo sakhe. Asitjele bantfu labanyenti ngaNkulunkulu wetfu lomuhle Jehova, nangeNdvodzana yakhe lenguJesu Khristu. Nasenta kanjalo, sitawuphila phakadze epharadisi lelisha laNkulunkulu emhlabeni.