BUKA letihlahla letindze, letimbali letinhle kanye naletintsaba letiphakeme. Uyayibona kutsi yinhle kwani lendzawo? Buka indlela lenyamatane ledla ngayo esandleni salomfanyana. Ase ubuke nalamabhubesi kanye nalamahhashi leme lapha endleleni. Bewungeke yini wena ujabule nawungahlala endzaweni lefanana nalena?

Nkulunkulu ufuna kutsi wena uphile phakadze emhlabeni lolipharadisi. Akafuni kutsi uve buhlungu lobuviwa bantfu namuhla. Loku ngiko liBhayibheli lelikwetsembisa labo labatawuhlala epharadisi lelisha. Litsi: ‘Nkulunkulu lucobo lwakhe utawuba nabo. Sekuyawubate kufa, noma kukhala, noma buhlungu. Ngoba kwekucala sekwendlulile.’

Jesu utawucinisekisa kutsi lonkhe lolushintjo lolumangalisako luyenteka. Uyati yini kutsi uyawukwenta nini loko? Uyawukwenta ngemuva kwekuba asasuse bonkhe bubi lobusemhlabeni, kanye nebantfu labangakalungi. Khumbula, ngalesikhatsi Jesu aselapha emhlabeni, welapha bantfu tonkhe tinhlobo tekugula, waze ngisho wavusa nalabafile. Jesu abenta letintfo kuze akhombise loko latakwenta emhlabeni wonkhe nasekabusa njengeNkhosi yeMbuso waNkulunkulu.

Uyabona kutsi kutawube kumnandzi njani epharadisi lelisha emhlabeni! Jesu kanye nalabo labakhetsile, batawubusa basezulwini. Lababusi bayawunakekela wonkhe umuntfu emhlabeni futsi bayociniseka kutsi bonkhe bantfu bayajabula. Ase sibone kutsi yini lokufanele siyente kuze siciniseke kutsi Nkulunkulu uyosinika kuphila lokuphakadze emhlabeni lomusha lolipharadisi.