INCENYE 4
Kuncoba KweMbuso—Kuticalisa Ngalokusemtsetfweni Tindzaba Letimnandzi
NJENGOBE nishumayela emtini ngemuti, niva kukhala insimbi khashane. Ichubeka ikhala kakhulu. Utsi nawucala kukhuluma emtini lolandzelako, lohamba naye aphazanyiswe kubona imoto yemaphoyisa ima eceleni kwenu. Liphoyisa liyehla bese lita kini, likubute litsi: “Ningulabantfu lababili yini labasolo bangena emitini yebantfu bakhuluma ngeliBhayibheli? Besisolo sitfola tikhalo letimayelana nani.” Niliphendvula ngenhlonipho leliphoyisa, futsi niyalichazela kutsi niBoFakazi BaJehova. Yini letawukwenteka nyalo?
Ngekwelizinga lelitsite loku kuya ngaloko lokwentekile esikhatsini lesendlulile. Kuleminyaka leyengcile, hulumende welive lakini ubaphatse njani BoFakazi BaJehova? Ikhona yini inkhululeko etindzabeni tenkholo? Nangabe ikhona, kufanele kutsi loko kubangelwe yindlela bazalwane kanye nabodzadzewenu labasebente ngayo kamatima eminyakeni leminyenti leyendlulile kuze ‘bavikele tindzaba letimnandzi futsi baticalise ngalokusemtsetfweni.’ (Fil. 1:7) Ngisho nobe uhlala kuphi, kucabanga ngekuncoba ngalokusemtsetfweni kwaBoFakazi BaJehova kungakucinisa kakhulu kukholwa kwakho. Kulencenye, sitawuhlola lokunye kwalokuncoba lokuphawulekako. Lokuncoba kusinika bufakazi lobumangalisako bekutsi uMbuso ukhona mbamba, ngobe besingeke sincobe ngalendlela kube loko besikwenta ngemandla etfu.
LOKUKULELIKHASI
SEHLUKO 13
Bashumayeli BeMbuso Bawayisa Enkantolo Emacala Lababekwe Wona
Emajaji lakuletinye tinkantolo letinkhulu talamuhla anembono lofanana newaGamaliyeli, umfundzisi weMtsetfo wasendvulo.
SEHLUKO 14
Kusekela Hulumende WaNkulunkulu, Wona Wodvwa
“Lomfula” wekuhlushwa kwaBoFakazi BaJehova lobangelwe kutsi abahlanganyeli etindzabeni tepolitiki ugwinywe yintfo lebeyingakalindzelwa.
SEHLUKO 15
Kulwela Inkhululeko Yekukhonta
Bantfu baNkulunkulu balilwele lilungelo lekuhlonipha umtsetfo—umtsetfo weMbuso waNkulunkulu.