1, 2. (a) Yini tinceku taJehova lebetisolo tijabulela kuyenta? (b) Yini Jehova layitsatsa njengaleligugu?

 TINCEKU taJehova letetsembekile betisolo tikujabulela kwakha takhiwo letidvumisa libito lakhe. Sibonelo saloko kutsi ema-Israyeli ahlanganyela ngekutimisela ekwakhiweni kwelithende lekukhontela, futsi ngemusa anikela ngetintfo tawo.​—Eks. 35:30-35; 36:1, 4-7.

² Jehova akatitsatsi njengaletimletsela ludvumo tintfo letisetjentiswako nakwakhiwa, futsi atikabaluleki kakhulu kuye. (Mat. 23:16, 17) Intfo Jehova layitsatsa njengaleligugu, lokuyintfo lemnika ludvumo kutendlula tonkhe, kukhontwa tinceku takhe lokufaka ekhatsi umoya wato wekutinikela nekusebenta ngenkhutsalo. (Eks. 35:21; Mak. 12:41-44; 1 Thim. 6:17-19) Leli liciniso lelikhulu. Kungani kunjalo? Kungenca yekutsi takhiwo tiphelelwa sikhatsi. Sibonelo saloko kutsi lithende lekukhontela kanye nelithempeli akusekho. Kungenteka kutsi leto takhiwo atisekho, kodvwa Jehova akakukhohlwa kupha kanye nemsebenti lowentiwa tinceku takhe letetsembekile letasekela kwakhiwa kwato.​—Fundza 1 Khorinte 15:58; Hebheru 6:10.

3. Sitawucoca ngani kulesehluko?

³ Netinceku taJehova talamuhla tisebente kamatima kuze takhe tindzawo tekukhontela. Kuyamangalisa loko lesikhone kukwenta sicondziswa yiNkhosi yetfu Jesu Khristu. Kuyacaca kutsi Jehova uyibusisile imetamo yetfu. (Hla. 127:1) Kulesehluko, sitawucoca ngaleminye yemisebenti leyentiwe kanye nekutsi imdvumise njani Jehova. Sitawuphindze sicoce nangalabanye lababe nencenye ekwentiweni kwalomsebenti.

4. (a) Kungani sidzinga tindzawo letengetiwe tekukhontela? (b) Kungani emahhovisi eligatja latsite ahlanganisiwe? (Fundza libhokisi lelitsi “ Kwakhiwa Kweligatja​—Kuvumelana Netimo Letishintjako.”)

⁴ Njengobe kwachazwa eSehlukweni 16, Jehova ufuna sihlangane kuze simkhonte. (Heb. 10:25) Imihlangano yetfu ayigcini nje ngekucinisa kukholwa kwetfu, kodvwa iphindze ikhulise kukhutsalela kwetfu kwenta umsebenti wekushumayela. Njengobe emalanga ekugcina aya ngasekupheleni, Jehova uyawusheshisa lomsebenti. Ngenca yaloko, umnyaka ngamunye bantfu labanyenti batfutseleka enhlanganweni yakhe. (Isa. 60:22) Njengobe linani letikhonti teMbuso likhula kakhulu, kuvela sidzingo  lesikhulu setindzawo tekushicilela tincwadzi letisekelwe eBhayibhelini. Sidzinga netindzawo tekukhontela letengetiwe.

5. Yini leyenta kutsi ligama lelitsi liHholwa leMbuso lifaneleke? (Fundza nelibhokisi lelitsi “ I-New Light Church.”)

⁵ Ngasekucaleni kwemlandvo webantfu baJehova balamuhla, Bafundzi BeliBhayibheli babona sidzingo sekuba netindzawo tabo tekuhlangana. Indzawo yekucala yekukhontela leyakhiwa beyiseWest Virginia, eMelika, nga-1890. Eminyakeni yabo-1930, bantfu baJehova bese bakhe nobe balungisa emahholwa lamanyenti, kodvwa leto tindzawo betite ligama lelicondzile lebetinikwe lona. Nanobe kunjalo, nga-1935 uMzalwane Rutherford wavakashela eHawaii lapho bekwakhiwa khona lihholwa ngasikhatsi sinye nelihhovisi leligatja lelisha. Ngesikhatsi bambuta kutsi lelihholwa kufanele libitwe ngekutsini, uMzalwane Rutherford waphendvula watsi: “Kungaba njani silibite ngekutsi ‘liHholwa LeMbuso,’ ngobe nguloko vele lesikwentako, sishumayela tindzaba letimnandzi teMbuso?” (Mat. 24:14) Leligama lelifanele belingeke nje lisetjentiswe kulelihholwa  kuphela, kodvwa belitawusetjentiswa kuto tonkhe tindzawo tekuhlangana letisetjentiswa ngemabandla ebantfu baJehova emhlabeni wonkhe.

6, 7. Yini lefezwe kwakhiwa kwemaHholwa EMbuso latsatsa sikhatsi lesifisha?

⁶ Ngabo-1970, sidzingo semaHholwa eMbuso besandza kakhulu. Ngenca yaloko, bazalwane eMelika bacalisa luhlelo loluphumelelako lwekwakha takhiwo letinhle, futsi letisebenta kahle ngemalanga nje lambalwa. Nga-1983, bese kwakhiwe emaHholwa eMbuso langaba ngu-200 eMelika naseCanada. Kuze bafeze lomsebenti, bazalwane bakha emakomidi ekwakhiwa kwemahholwa embuso. Loluhlelo lwasebenta ngemphumelelo kangangekutsi nga-1986 Sigungu Lesibusako salwenta lwaba semtsetfweni, futsi nga-1987, besekunemaKomidi Ekwakhiwa KwemaHholwa EMbuso (RBC) langu-60 eMelika. a Nga-1992, lamakomidi e-RBC bese akhona nase-Argentina, e-Australia, eFulansi, eJalimane, eJapan, eMexico, eNingizimu Afrika kanye naseSpain. Ngalokucinisekile, labazalwane labakha emaHholwa eMbuso nemaHholwa eMhlangano kudzingeka sibasekele ngobe umsebenti labawentako uyincenye yemsebenti longcwele.

⁷ LamaHholwa eMbuso lakhiwa ngemalanga lambalwa aniteketa bufakazi lobumangalisako etindzaweni lakhiwa kuto. Nasi sibonelo: Liphephandzaba laseSpain belinesihloko lesihamba embili lesitsi “Kukholwa Kususa Tintsaba.” Ngesikhatsi likhulumela kwakhiwa kweliHholwa LeMbuso lelinjalo edolobheni laseMartos, leliphephandzaba labuta: “Kwenteka njani kutsi kulelive leligcwele bugovu, emavolontiya lasuka etindzaweni  letehlukahlukene [taseSpain] atinikele ngekutitsandzela kute aye eMartos ayokwakha sakhiwo lesicophe umlandvo kutendlula tonkhe ngesivinini, ngebuhle nangekuhleleka?” Lesihloko saleliphephandzaba saphendvula lombuto ngekucaphuna emavi alomunye Fakazi lolivolontiya, lowatsi: “Ngalokuyinhloko, loku kubangelwa kutsi sibantfu labafundziswe nguJehova.”

8. Nga-1999, nguluphi luhlelo lolusha Sigungu Lesibusako lesavuma kutsi lwentiwe, futsi kungani?

⁸ Njengobe iminyaka yabo-1900 bese iya ngasekupheleni, bantfu bebatfutseleka enhlanganweni yaJehova emaveni lapho bazalwane bete imali leyenele. Emabandla endzawo bewenta konkhe lokusemandleni awo kute akhe tindzawo tekuhlanganyela. Kodvwa kulamanye emave, bazalwane bekufanele babeketelele kuhlekwa nekutondvwa ngenca yekutsi emaHholwa eMbuso abo bewangabukeki kahle nawacatsaniswa naletinye tindzawo tekukhontela. Nanobe kunjalo, kusukela nga-1999, Sigungu Lesibusako sakhipha imvume yeluhlelo lwekutsi kukhuliswe kwakwakhiwa kwemaHholwa eMbuso emaveni lasatfutfuka. Bekutfolwa iminikelo levela emaveni lanjingile kuze kube “nekulingana.” (Fundza 2 Khorinte 8:13-15.) Bazalwane nabodzadze labavela kulamanye emave bebavolontiya kuze bafake sandla kulomsebenti.

9. Ngumuphi umsebenti lebewubonakala umkhulu kakhulu, kodvwa yini lefeziwe?

⁹ Ekucaleni, lomsebenti bewubonakala umkhulu kakhulu. Umbiko lowentiwa nga-2001 wembula kutsi bekudzingeka emaHholwa eMbuso langetulu kwa-18 300, emaveni  lasatfutfuka langu-88. Nanobe kunjalo, ngenca yekutsi sisekelwa ngumoya waNkulunkulu nayiNkhosi yetfu Jesu Khristu, kute umsebenti longasehlula. (Mat. 19:26) Ngeminyaka lengaba ngu-15, kusukela nga-1999 kuya ku-2013, bantfu baNkulunkulu bese bakhe emaHholwa eMbuso langu-26 849 kuloluhlelo. b Jehova uyachubeka awubusisa umsebenti wekushumayela, kangangekutsi nga-2013 bekusenesidzingo semaHholwa eMbuso langaba ngu-6 500 kulawo mave, futsi kwanyalo umnyaka ngamunye kudzingeka lamanyenti kakhulu.

10-12. Kwakhiwa kwemaHholwa EMbuso kulidvumise njani libito laJehova?

¹⁰ Kwakhiwa kwalamaHholwa eMbuso lamasha kulidvumise njani libito laJehova? Umbiko lebewuvela ehhovisini leligatja laseZimbabwe watsi: “Emkhatsini wenyanga yinye lokwakhiwa ngayo liHholwa LeMbuso lelisha, linani lebantfu lababa khona emihlanganweni livame kuphindzeka kabili.” Emaveni lamanyenti kubonakala shengatsi bantfu bayangabata kuhlanganyela natsi kute kube ngulapho sesinendzawo lekahle yekuhlangana. Nase lakhiwe liHholwa LeMbuso, livele ligcwale bese kudzingeka lelinye. Nanobe kunjalo, akusiko kubukeka kwelihholwa kuphela lokwenta bantfu basondzele kuJehova. Lutsandvo lwebuKhristu lolucotfo loluboniswa ngulabo labakha emaHholwa eMbuso lutsintsa indlela bantfu labayitsatsa ngayo inhlangano yaNkulunkulu. Ase sicoce ngetibonelo letimbalwa.

¹¹ E-Indonesia. Ngesikhatsi indvodza lebeyibukele kwakhiwa kweliHholwa LeMbuso itfola kutsi tonkhe tisebenti betingemavolontiya, yatsi: “Nine bantfu niyangimangalisa! Ngiyibonile indlela lenisebenta ngayo ngekutinikela nangenjabulo ngisho nobe ningabhadalwa ngaloko. Ngicabanga kutsi ayikho inhlangano yenkholo lefanana neyenu!”

¹² E-Ukraine. Lomunye make lebekandlula liHholwa LeMbuso lelakhiwako malanga onkhe, waphetsa ngekutsi labantfu lebebakha bebaBoFakazi BaJehova nekutsi lesakhiwo lebebasakha besitawuba liHholwa LeMbuso. Watsi: “Dzadzewetfu losangulomunye waBoFakazi BaJehova ungitjelile ngabo. Njengobe bengibukela kwakhiwa kwalesakhiwo, ngincume kutsi nami ngifuna kuba ngulomunye wenu. Ngitibonele ngewami lutsandvo leninalo.” Lomake wasemukela sifundvo seliBhayibheli futsi wabhajatiswa nga-2010.

13, 14. (a) Yini loyifundzile kuloko lokwentiwa yindvodza nemfati wayo ngesikhatsi babona umsebenti lebewentiwa endzaweni yekwakha liHholwa LeMbuso? (b) Yini longayenta kuze uciniseke kutsi indzawo yenu yekukhontela idvumisa libito laJehova?

¹³ E-Argentina. Lenye indvodza nemfati wayo baya kumzalwane labengamele indzawo lokwakhiwa kuyo liHholwa LeMbuso. Lendvodza yatsi: “Besisolo sibukele umsebenti wekwakha leniwentako, futsi . . . sincume kutsi natsi sifuna kufundza ngaNkulunkulu kulendzawo.” Ngemuva kwaloko yabuta: “Yini lokufanele siyente kuze sikwati kuta emihlanganweni kulendzawo?” Lendvodza nemfati wayo basemukela sifundvo seliBhayibheli, kodvwa bacela kutsi nemndeni wabo wonkhe uhlanganyele nabo kuso. Bazalwane bakujabulela kubasita.

¹⁴ Kungenteka kutsi awukake ube nelilungelo lekusita nakwakhiwa liHholwa LeMbuso lenihlangayela kulo, kodvwa usengasita  ekwenteni kutsi indzawo yakini yekukhontela idvumise libito laJehova. Sibonelo saloko kutsi ungamema bantfu lofundza nabo liBhayibheli, labo lobuyela kubo kanye nalabanye bantfu endzaweni yakini kutsi bahlanganyele nawe eHholweni LeMbuso. Ungaphindze usite ekuhlanteni kanye nasekunakeleleni indzawo yenu yekukhontela. Nangabe uhlela kahle, ungakwati kwenta umnikelo wekunakekela liHholwa LeMbuso lenu nobe wekwakhiwa kwaletinye tindzawo tekukhontela kuletinye tincenye temhlaba. (Fundza 1 Khorinte 16:2.) Yonkhe lemisebenti idvumisa libito laJehova.

15-17. (a) Bobani labafeza lokukhulu emsebentini wekwakha? (b) Yini loyifundzile kuloko lokwashiwo bantfu labashadene labasebente emsebentini wekwakha wemhlaba wonkhe?

¹⁵ Umsebenti lomnyenti wekwakha emaHholwa eMbuso, emaHholwa eMhlangano kanye netakhiwo teligatja wentiwa bazalwane nabodzadze bendzawo. Nanobe kunjalo, bavame kusitwa bazalwane nabodzadze labavela kulamanye emave labanelwati lwetekwakha. Lamanye alamavolontiya ahlele timo tawo kuze akwati kusebenta kulamanye emave emaviki latsite. Labanye batinikele kuze bakhonte iminyaka leminyenti, basuke kulesinye sabelo sekwakha baye kulesinye.

¹⁶ Umsebenti wekwakha lowentiwa emhlabeni wonkhe unebumatima lobehlukile, kodvwa uphindze ube netinzuzo letenetisako. Nasi sibonelo: BoTimo naLina bahambe emave lamanyenti e-Asia, eYurophu kanye naseNingizimu Melika kuze basebente ekwakhiweni kwemaHholwa eMbuso, emaHholwa eMhlangano kanye nemahhovisi eligatja. Timo utsi: “Kuleminyaka lengu-30 leyendlulile, sabelo sami besishintjwa cishe ngemuva kweminyaka lemibili.” Lina losashade naTimo iminyaka lengu-25 utsi: “SinaTimo sikhonte emaveni lehlukahlukene langu-10. Kudzinga emandla kanye nesikhatsi lesinyenti kute wetayele  kudla lokusha, simo selitulu lesisha, lulwimi lolusha, insimu lensha nekutsi utfole bangani labasha.” c Imetamo yabo ibe nemiphumela lemihle yini? Lina utsi: “Lobumatima bugcine sebusibusiso setfu lesikhulu. Sijabulele lutsandvo lwebuKhristu, kwemukelwa emakhaya ebazalwane, futsi sikuvile kunakekelwa nguJehova ngelutsandvo. Sibone nekugcwaliseka kwesetsembiso Jesu lasenta kubafundzi bakhe, lesikuMakho 10:29, 30. Sitfole ngalokuphindvwe kalikhulu banaketfu labangemaKhristu, bodzadzewetfu kanye nabomake.” Timo utsi: “Kuyasenetisa kusebentisa emakhono etfu enjongweni lencono kunato tonkhe, ngekutsi sihlanganyele ekutfutfukisweni kwetintfo teNkhosi.”

¹⁷ BoDarren naSarah, labasite emsebentini wekwakha e-Afrika, e-Asia, eMelika Lesekhatsi, eYurophu, eNingizimu Melika kanye naseSouth Pacific banemuva wekutsi bemukele lokunyenti kwendlula loko labaphe ngako. Nangetulu kwebumatima labahlangabetane nabo, Darren utsi: “Kube lilungelo kusebenta nebazalwane labavela emaveni lehlukahlukene. Ngibonile kutsi lutsandvo lesinalo ngaJehova lufanana nentsambo letungeleta wonkhe umhlaba, bese isihlanganisa ndzawonye.” Sarah utsi: “Ngifundze lokunyenti kubazalwane kanye nabodzadze labanemasiko lehlukile. Kubona kutinikela labakwentako kute bakhonte Jehova kungikhutsata kutsi nami ngichubeke ngimnika lokuncono kakhulu.”

18. Siphrofetho lesikuTihlabelelo 110:1-3 sigcwaliseka njani?

¹⁸ INkhosi Davide yabiketela kutsi nanobe tikhonti teMbuso waNkulunkulu titawuhlangabetana nebumatima, “betitawutinikela ngekutitsandzela” kuze tinakekele tintfo letimayelana neMbuso. (Fundza Tihlabelelo 110:1-3.) Bonkhe labenta umsebenti losekela uMbuso bayahlanganyela ekugcwaliseni lamavi alesiphrofetho. (1 Khor. 3:9) Linani lelikhulu letakhiwo temahhovisi emagatja, emaHholwa eMhlangano lamanyenti kanye nemaHholwa EMbuso lasemhlabeni wonkhe, aniketa bufakazi lobucinile bekutsi uMbuso waNkulunkulu uyintfo sibili nekutsi nyalo sewuyabusa. Ngako kulilungelo lelikhulu ngatsi kukhonta iNkhosi Jesu Khristu emsebentini loniketa Jehova ludvumo lolumfanele.