Jehova * Nkulunkulu washadisa bantfu bekucala. LiBhayibheli lisitjela kutsi wadala umfati wekucala “wase umyisa endvodzeni.” Adamu abejabule kakhulu kangangekutsi waze watsi: “Lona-ke sewulitsambo lematsambo ami, nenyama yenyama yami.” (Genesisi 2:22, 23) Nanyalo Jehova ufuna kutsi bantfu labashadene bajabule.

Nawushada, ungacabanga kutsi tonkhe tintfo titawuhamba kahle. Kodvwa liciniso likutsi, ngisho indvodza nemfati labatsandzana mbamba batawuba nato tinkinga. (1 Khorinte 7:28) Kulencwajana, utawutfola timiso teliBhayibheli lotawutsi nawutisebentisa ujabule emshadweni wakho futsi nemndeni wakho ujabule.—Tihlabelelo 19:8-11.

LOKO LOKUSHIWO LIBHAYIBHELI: Indvodza iyinhloko yemndeni.—Efesu 5:23.

Nangabe uyindvodza, Jehova ulindzele kutsi umnakekele ngelutsandvo umfati wakho. (1 Phetro 3:7) Wamenta kutsi abe ngumsiti wakho futsi ufuna umphatse ngenhlonipho nangelutsandvo. (Genesisi 2:18) Kufanele umtsandze kakhulu futsi tidzingo takhe tite kucala kunetakho.—Efesu 5:25-29.

Nangabe ungumfati, Jehova ulindzele kutsi uyihloniphe ngalokujulile indvodza yakho futsi uyisite ekufezeni indzima yayo. (1 Khorinte 11:3; Efesu 5:33) Tisekele tincumo tayo futsi ubambisane nayo ngenhlitiyo yakho yonkhe. (Kholose 3:18) Nawenta njalo, indvodza yakho itakutsandza, naJehova akutsandze.—1 Phetro 3:1-6.

LONGAKWENTA:

• Buta umuntfu loshade naye kutsi ungaba njani yindvodza lekahle nobe umfati lokahle. Mlalelisise futsi wente konkhe lokusemandleni akho kute utfutfuke

• Beketela. Kutawutsatsa sikhatsi kutsi nobabili nifundze kujabulisana

LOKO LOKUSHIWO LIBHAYIBHELI: Kufanele uyikhatsalele inhlalakahle yemuntfu loshade naye. (Filiphi 2:3, 4) Mphatse njengaloyo loligugu, ukhumbule kutsi Jehova ufuna tinceku takhe ‘tibe nemusa kubo bonkhe’ bantfu. (2 Thimothi 2:24) “Emavi lakhulumeke ngebudlabha ahlaba njengesikhali; kodvwa emavi lakhulumeke ngekuhlakanipha ayaphilisa.” Ngako-ke kufanele uwakhetse ngekuhlakanipha emavi akho. (Taga 12:18) Umoya waJehova utakusita kutsi ukhulume ngemusa nangelutsandvo.—Galathiya 5:22, 23; Kholose 4:6.

LONGAKWENTA:

• Ngaphambi kwekucoca ngetindzaba letibalulekile nemuntfu loshade naye, thantazela lusito kute ube nemoya lophansi uphindze ube nengcondvo levulekile

• Cabangisisa ngaloko lotakusho nangendlela lotakusho ngayo

LOKO LOKUSHIWO LIBHAYIBHELI: Nawushada, uba “nyamanye” nemuntfu loshade naye. (Matewu 19:5) Nobe kunjalo, solo nibantfu lababili labangafani futsi ningaba nemibono leyehlukene. Ngako kufanele nifundze kuvumelana kuloko lenikucabangako nangendlela lenitiva ngayo. (Filiphi 2:2) Kuvumelana kubalulekile nanenta tincumo. LiBhayibheli litsi: “Yenta tinhloso takho ngekutfola teluleko letilungile.” (Taga 20:18) Vumelani timiso teliBhayibheli tinicondzise nanitsatsa tincumo letibalulekile.—Taga 8:32, 33.

LONGAKWENTA:

• Tjela umuntfu loshade naye indlela lotiva ngayo, ungagcini nje ngekumcocela lokutsite nobe umtjele imibono yakho

• Cale ukhulume nemuntfu loshade naye usengakatenti tincumo