Ungamati Jehova ngekufundza liBhayibheli. Nkulunkulu wakhetsa bantfu labatsite endvulo kutsi babhale imicabango yakhe. Lawo mavi labawabhala abitwa ngekutsi liBhayibheli. Lamuhla lwati ngaNkulunkulu silutfola ngekufundza liBhayibheli. Libitwa nangekutsi liliVi laNkulunkulu ngoba licuketse umlayeto nome livi lakhe. Singakwetsemba lokushiwo liBhayibheli ngoba Jehova akwenteki kutsi acale emanga. “[UnguNkulunkulu] longawacali emanga.” (Thithusi 1:2) LiVi laNkulunkulu licuketse liciniso.—Johane 17:17.

LiBhayibheli lingulesinye setipho lesiligugu kunato tonkhe Nkulunkulu lasiphe tona. Lifana nencwadzi lebuya kubabe lonelutsandvo leya kubantfwana bakhe. Lisitjela ngesetsembiso saNkulunkulu sekugucula lomhlaba ube yindzawo lenhle lesingaphila kuyo—lipharadisi. Lisitjela ngaloko lakwenta mandvulo, loko lakwentako nyalo, naloko latawukwentela bantfwana bakhe labatsembekile esikhatsini lesitako. Liphindze lisisite sicatulule tinkinga tetfu futsi sitfole injabulo.—2 Thimothi 3:16, 17.

 BoFakazi BaJehova babangani baNkulunkulu; batakusita kutsi ukucondze lokufundziswa liBhayibheli. Mane ubatjele kutsi ufuna kudadisha liBhayibheli. Ngeke bakubhadalise. (Matewu 10:8) Ngetulu kwaloko, ungaya nasemihlanganweni yebuKhristu. Lemihlangano ivamise kuchutjelwa etindzaweni tekukhonta Nkulunkulu letibitwa ngekutsi ngemaHholwa eMbuso. Lwati lwakho ngaNkulunkulu lutawukhula ngekushesha nawuba khona kulemihlangano.

Ungafundza ngaNkulunkulu kuloko lakwentile. Sibonelo saloku, liBhayibheli liyasitjela: “Nkulunkulu wadala lizulu nemhlaba.” (Genesisi 1:1) Ngesikhatsi Jehova adala emazulu, wenta nelilanga. Loku kusitjelani ngaNkulunkulu? Kusitjela kutsi Jehova unemandla lamakhulu. Nguye kuphela labengadala intfo lenemandla kakhulu njengelilanga. Kusitjela nekutsi Jehova uhlakaniphile, ngoba kudala lilanga bekudzinga kuhlakanipha, kwatise phela liniketa kukhanya nekushisa, kepha lingacimi.

Indalo yaJehova ikhombisa kutsi uyasitsandza. Ase ucabange ngato tonkhe tinhlobo tetitselo letisemhlabeni. Phela Jehova bekangasipha luhlobo lunye kuphela lwesitselo—noma angasiphi nje kwasanhlobo. Esikhundleni saloko, Jehova wasiniketa tinhlobonhlobo tetitselo, letishiyanako ngebukhulu, imibala, nangekunambitseka. Loku kusitjela kutsi Jehova unguNkulunkulu lonelutsandvo, kepha futsi lophindze ephane, acabangele tidzingo tetfu, futsi abe nemusa.—Tihlabelelo 104:24.