Nangabe ufuna kuba ngumngani waNkulunkulu, kufanele uchube inkholo layemukelako. Jesu watsi “labakhonta ngeliciniso” bebatawukhonta Nkulunkulu ngekuvumelana ‘neliciniso.’ (Johane 4:23, 24) Yinye kuphela indlela lelungile yekukhonta Nkulunkulu. (Efesu 4:4-6) Inkholo yeliciniso iholela ekuphileni lokuphakadze, kepha inkholo yemanga iholela ekubhujisweni.—Matewu 7:13, 14.

Inkholo yeliciniso ungayibona ngekubuka labo labayichubako. Njengoba Jehova alungile, labo labamkhonta ngeliciniso kufanele nabo kube bantfu labalungile. Njengoba nje nesihlahla semawolintji lesihle sitsela titselo letinhle temawolintji, nenkholo yeliciniso nayo yenta bantfu babe bahle.—Matewu 7:15-20.

Bangani baJehova banenhlonipho lejulile ngeliBhayibheli. Bayati kutsi liBhayibheli livela kuNkulunkulu. Bavumela loko lelikushoko kutsi kucondzise kuphila kwabo, kubasite bacatulule tinkinga tabo, futsi kubasite bafundze ngaNkulunkulu. (2 Thimothi 3:16) Betama kuphila ngaloko labakufundzisa labanye.

 Bangani baJehova bayatsandzana. Jesu wakhombisa lutsandvo ngebantfu ngekubafundzisa ngaNkulunkulu nangekwelapha labebagula. Labo labachuba inkholo yeliciniso nabo bayabatsandza labanye. NjengaJesu, abababukeli phansi labo labeswele nome baletinye tive. Jesu watsi bafundzi bakhe bebatawubonakala ngekutsandzana.—Johane 13:35.

Bangani baNkulunkulu badvumisa libito lakhe, lelitsi Jehova. Nangabe lotsite angafuni kukubita ngelibito lakho, angaba yini ngumngani wakho losedvute? Cha! Nangabe sinemngani, simbita ngelibito lakhe futsi sisho tintfo letinhle ngaye kulabanye. Kanjalo nalabo labafuna kuba bangani baNkulunkulu kufanele balisebentise libito lakhe futsi bakhulume ngaye kulabanye. Jehova ufuna sente loko.—Matewu 6:9; Roma 10:13, 14.

NjengaJesu, bangani baNkulunkulu bafundzisa bantfu ngeMbuso waNkulunkulu. UMbuso waNkulunkulu unguhulumende wasezulwini lotawenta umhlaba ube lipharadisi. Bangani baNkulunkulu bahlanganyela letindzaba letinhle teMbuso wakhe nalabanye.—Matewu 24:14.

BoFakazi BaJehova balwela kuba bangani baNkulunkulu. Bayalihlonipha liBhayibheli futsi bayatsandzana. Baphindze basebentise libito laNkulunkulu, balidvumise futsi bafundzise labanye nangeMbuso wakhe. Emhlabeni lamuhla, boFakazi BaJehova bachuba inkholo yeliciniso.