Kuba ngumngani waNkulunkulu kuyintfo lencono kakhulu lengenteka kuwe. Nkulunkulu utakufundzisa indlela yekutfola injabulo nesivikelo; aphindze akukhulule etinkholelweni letinyenti letingakalungi nasemikhubeni lelimatako. Imithandazo yakho nayo utayilalela. Utakusita uphile unelitsemba nekuthula engcondvweni. (Tihlabelelo 71:5; 73:28) Etikhatsini letimatima, Nkulunkulu utakusekela. (Tihlabelelo 18:18) Nkulunkulu ufuna nekukupha sipho lesikuphila lokuphakadze.—Roma 6:23.

Usachubeka nekusondzela kuNkulunkulu, utawuphindze usondzelane nebangani bakhe. Batawuba bangani bakho, futsi kutawuba shengatsi babodzadzewenu nabomnakenu. Batakusita, bakukhutsate futsi bajabule ngekutsi bakufundzise ngaNkulunkulu.

Asilingani naNkulunkulu. Nawusachubeka wakha bungani naNkulunkulu, kufanele ucondze liphuzu lelibalulekile. Bungani naNkulunkulu abusibo bungani babontsanga. Mdzala kakhulu kunatsi, kantsi futsi uyasendlula ngekuhlakanipha nemandla. UnguMbusi wetfu lofanele. Loku kusitjela kutsi nangabe sifuna kuba bangani bakhe, kufanele simlalele siphindze sente loko lasitjela kutsi sikwente. Kwenta kanjalo kuyohlale kusita tsine.—Isaya 48:18.