Sathane ufuna usebentise imilingo. Labanyenti bahlabela bokhokho lasebafa noma emadloti kuze bativikele etingotini. Benta loku ngoba besaba emandla emimoya. Bagaba tiphandla noma buhlalu. Banatsa tihlati noma bagcobise tinsiti emitimbeni yabo ngoba bacabanga kutsi tinemandla emilingo. Labanye bantfu bembela tikhonkwane emitini yabo labakholelwa kutsi tinemandla ekubavikela. Labanye basebentisa tihlati ngoba bakholelwa kutsi titawubaphumelelisa emabhizinisini, etivivinyweni tesikolwa, noma etindzabeni telutsandvo.

Kwenta Jehova abe ngumngani wakho kusivikelo lesincono kakhulu kuSathane. Jehova Nkulunkulu netingilosi takhe banemandla kwendlula Sathane nemadimoni akhe. (Jakobe 2:19; Sembulo 12:9) Jehova utimisele sibili kusebentisa emandla akhe kuze asite bangani bakhe​—bantfu labatsembekile kuye ngalokuphelele.​—2 Tikhronike 16:9.

LiVi laNkulunkulu litsi: ‘Ningabi ngulabenta imilingo.’ Jehova uyayilahla imilingo nebutsakatsi ngoba lemikhuba ingakwenta ube ngephasi kwemandla aSathane longuDeveli ngalokucondzile.​—Levithikhusi 19:26.