KUCHAZWA KWEMAVESI LASEBHAYIBHELINI

KubaseRoma 10:13—Bita “Libito LeNkhosi”

DLALA

“Wonkhe umuntfu lobita libito laJehova utawusindziswa.”—KubaseRoma 10:13, Lihumusho Lemhlaba Lomusha.

“Wonkhe umuntfu lotibika abite libito leNkhosi, uyawusindziswa.”—KubaseRoma 10:13, LiBhayibheli LesiSwati Lelivamile.

Usho Kutsini KubaseRoma 10:13?

Nkulunkulu akakhetsi, uvulele bantfu bato tonkhe tive, luhlanga, labaphuyile nobe labanemali, litfuba lekutsi basindziswe futsi batfole kuphila lokuphakadze. Nobe kunjalo, kuze sisindziswe futsi sitfole kuphila lokuphakadze, kufanele sibite ligama laJehova, lokuligama laNkulunkulu Somandla. a—Tihlabelelo 83:18.

EBhayibhelini, umusho lotsi “lobita libito laJehova” usho lokungetulu nje kwekulati kanye nekulisebentisa nasimkhonta. (Tihlabelelo 116:12-14) Loko kufaka ekhatsi kumetsemba Nkulunkulu kanye nekufuna lusito lwakhe.—Tihlabelelo 20:7; 99:6.

Ligama laNkulunkulu belibalulekile kuJesu Khristu. Emavi ekucala emthantazweni wakhe losibonelo atsi: “Babe wetfu losemazulwini, alingcweliswe libito lakho.” (Matewu 6:9) Jesu waveta kutsi kuze sitfole kuphila lokuphakadze, kufanele simati, simlalele futsi simtsandze uMnikati waleligama.—Johane 17:3, 6, 26.

Yini lesenta sitsi Jehova ‘nguleNkhosi’ lokukhulunywa ngayo KubaseRoma 10:13 eBhayibhelini LesiSwati Lelivamile? Sizatfu kutsi lelivesi licaphuna Joweli 2:32 lapho khona emiBhalweni yekucala yesiHebheru kusetjentiswe ligama laNkulunkulu, hhayi sicu lesitsi ‘Nkhosi.’ b

Loko KubaseRoma 10:13 lokhuluma ngako

KubaseRoma sehluko 10, liBhayibheli liveta kutsi Nkulunkulu wemukela umuntfu kuye ngekutsi uyakholwa yini kuJesu Khristu. (KubaseRoma 10:9) Loku kusekelwa yimiBhalo lecashunwe eThestamenteni Lelidzala. Umuntfu ukhombisa kutsi uyakholwa ‘ngekuvuma embikwebantfu,’ lokufaka ekhatsi kushumayela tindzaba letimnandzi letimayelana nensindziso kubantfu labangakholwa. Ngenca yaloko, labanye batfola litfuba lekuba nekukholwa lokuholela ekuphileni lokuphakadze.—KubaseRoma 10:10, 14, 15, 17.

Fundza KubaseRoma sehluko 10 nemibhalo lengentasi lechazako kanye nalokunye lokukhuluma ngalombhalo.

a Ligama laNkulunkulu livela tikhatsi leticishe tibe ngu-7 000 emibhalweni yeliBhayibheli yesandla yasendvulo. NgesiHebheru, ligama laNkulunkulu limelelwa tinhlavu letine letibitwa ngekutsi yi-Tetragrammaton. Ngalokuvamile leligama libitwa ngekutsi “Jehova” ngesiSwati, kodvwa letinye tati tikhetsa kusebentisa lelitsi “Yahweh.”

b Kungenteka babhali beliBhayibheli labangemaKhristu basebentisa ligama laNkulunkulu nabacaphuna imiBhalo “leseThestamenteni Lelidzala” lapho bekuvela khona leligama. I-The Anchor Bible Dictionary itsi: “Kunebufakazi bekutsi i-Tetragrammaton, lokutinhlavu letimelela ligama laNkulunkulu lelitsi Yahweh, beyivela kuleminye nobe yonkhe imiBhalo yeliThestamente Lelisha lecashunwe eThestamenteni Lelidzala nalibhalwa kwekucala. (Volume 6, likhasi 392) Kuze utfole lokunyenti ngalendzaba, fundza sihloko lesitsi “Libito LaNkulunkulu EmiBhalweni YemaKhristu YesiGriki” lesikuSandzisanchazo A5 eHumushweni Lemhlaba Lomusha LemiBhalo Lengcwele. Sandzisanchazo C2 lesitfolakala eHumushweni Lemhlaba Lomusha LemiBhalo Lengcwele ngesiNgisi siveta luhla lwemahumusho eliBhayibheli lasebentisa ligama laNkulunkulu KubaseRoma 10:13.