“Tsemba Jehova ngayo yonkhe inhlitiyo yakho, futsi ungetsembeli elwatini lwakho. Ubocabanga ngaye kunobe yini loyentako, futsi yena utawenta kuphila kwakho kuphumelele.”​—Taga 3:5, 6, Lihumusho Lemhlaba Lomusha.

 “Tsemba Simakadze ngayo yonkhe inhlitiyo yakho, ungeyami ekwatini kwakho. Matise kuko konkhe lokwentako, yena uyakucondzisa tindlela takho.”​—Taga 3:5, 6, LiBhayibheli LesiSwati Lelivamile.

 Kufanele sicele sicondziso kuJehova a Nkulunkulu kunekutsi sitentele tsine tincumo letibalulekile.

 “Tsemba Jehova ngayo yonkhe inhlitiyo yakho.” Sikhombisa kutsi siyametsemba Nkulunkulu nasenta tintfo ngendlela yakhe. Kufanele simetsembe ngalokuphelele Nkulunkulu, ngenhlitiyo yetfu yonkhe. EBhayibhelini, inhlitiyo ivame kubhekisela kumuntfu lesinguye ngekhatsi, lokufaka ekhatsi indlela lesitiva ngayo, lokusenta sente lokutsite, lesikucabangako kanye nesimo setfu sengcondvo. Ngako kwetsemba Nkulunkulu ngenhlitiyo yetfu yonkhe kusho lokungetulu kwendlela lesitiva ngayo. Kusincumo lesisenta ngobe siciniseka kutsi uMdali wetfu usifunela lokuncono kakhulu.​—KubaseRoma 12:1.

 “Ungetsembeli elwatini lwakho.” Kudzingeka setsembe Nkulunkulu singatetsembi tsine ngobe sibantfu labanesono. Nasitetsemba tsine nobe indlela lesitiva ngayo nasenta tincumo, singahle sente tincumo letingacale tibonakale titinhle kodvwa ngekuhamba kwesikhatsi tisiletsele imiphumela lemibi. (Taga 14:12; Jeremiya 17:9) Kuhlakanipha kwaNkulunkulu kuphakeme kakhulu kunekwetfu. (Isaya 55:8, 9) Nangabe simvumela kutsi asicondzise kuphila kwetfu kutawuphumelela.​—Tihlabelelo 1:1-3; Taga 2:6-9; 16:20.

 “Ubocabanga ngaye kunobe yini loyentako.” Kufanele sifune umbono waNkulunkulu kuko konkhe lesikwentako ekuphileni kwetfu nobe nasenta tincumo letibalulekile. Loko sikwenta ngekutsi sithantaze kuye sicele sicondziso sakhe futsi sente loko lokushiwo liVi lakhe liBhayibheli.​—Tihlabelelo 25:4; 2 KuThimothi 3:16, 17

 “Yena utawenta kuphila kwakho kuphumelele.” Nkulunkulu wenta kuphila kwetfu kuphumelele ngekutsi asisite siphile ngetimiso takhe letilungile. (Taga 11:5) Loku kusisita kutsi singatibangeli tinkinga ngalokungenasidzingo futsi sijabulele kuphila.​—Tihlabelelo 19:7, 8; Isaya 48:17, 18.

 Incwadzi yeliBhayibheli yeTaga icuketse timiso letingasisita kutsi siphile imphilo lejabulisako nalephumelelako emehlweni aNkulunkulu. Tehluko letingu-9 tekucala tibhalwe ungatsi seluleko babe lasiniketa indvodzana yakhe layitsandzako. Sehluko 3 siveta tinzuzo letitfolwa ngulabo labasebentisa kuhlakanipha kweMdali wetfu.​—Taga 3:13-26.