“Jabula kakhulu ngaJehova, futsi yena utawenetisa tifiso tenhlitiyo yakho.”​—Tihlabelelo 37:4, Lihumusho Lemhlaba Lomusha.

 “Yenta Simakadze abe yinjabulo yakho, yena-ke utakupha lokufiswa yinhlitiyo yakho.”​—Tihlabelelo 37:4, LiBhayibheli LesiSwati Lelivamile.

 Umbhali waletihlabelelo ukhutsata tikhonti taNkulunkulu kutsi tijabule ngekuba nebuhlobo lobuhle naYe. Bonkhe labanebuhlobo lobuhle naNkulunkulu bangaciniseka kutsi Jehova a utatifeza tifiso tabo letivumelana nentsandvo yakhe.

 “Jabula kakhulu ngaJehova.” Lamavi angaphindze ahunyushwe ngekutsi “jabula ngaJehova,” “tfola injabulo ngekukhonta Simakadze” nobe “tfola injabulo kuloko Simakadze lakwetsembisa kona.” Kamelula nje, loku kusho kutsi kufanele ‘sijabule kakhulu’ ngekukhonta Nkulunkulu weliciniso. (Tihlabelelo 37:4) Yini lesenta sisho njalo?

 Labo labakhonta Jehova babuka tintfo ngendlela yena latibuka ngayo, njengobe kuvetiwe eBhayibhelini. Abagcini nje ngekumati Nkulunkulu, kodvwa bayati nekutsi kukuhlakanipha kumlalela. Ngenca yaloko, baba nanembeza lohlantekile futsi babalekele tinkinga letinyenti labangangena kuto ngenca yetincumo letingakahlakaniphi. (Taga 3:5, 6) Sibonelo nje, abatfukutseli nobe babe nemona nababona bantfu labaticabangela bona nobe labangaketsembeki babonakala ngatsi bayaphumelela. (Tihlabelelo 37:1, 7-9) Bantfu baNkulunkulu bayajabula ngekwati kutsi madvutane utawucedza konkhe kungalungi futsi abanike umvuzo labo labetsembekile ngenca yemisebenti yabo lemihle. (Tihlabelelo 37:34) Kuphindze kubajabulise kwati kutsi Babe wabo losezulwini uyabemukela.​—Tihlabelelo 5:12; Taga 27:11.

 “Yena utawenetisa tifiso tenhlitiyo yakho.” Lamavi angaphindze ahunyushwe ngekutsi “utayiphendvula imithantazo yakho” nobe “utakunika loko lokufiswa yinhlitiyo yakho.” Kuliciniso kutsi Jehova angeke asinikete nobe ngabe yini lesiyicelako. Jehova uyati kutsi yini lesiyidzingako, njengobe nje nemtali lokahle ati kutsi yini lelungela bantfwana bakhe. Ngetulu kwaloko, ticelo tetfu kanye nendlela lesiphila ngayo kufanele kuvumelane netimiso takhe kanye nentsandvo yakhe. (Taga 28:9; Jakobe 4:3; 1 Johane 5:14) Nasenta njalo, singathantaza ‘kumuvi wemithantazo’ siciniseka kutsi utasilalela.​—Tihlabelelo 65:2; Matewu 21:22.

 Tihlabelelo 37 tabhalwa yiNkhosi Davide yaka-Israyeli wasendvulo. Wabhala letihlabelelo ngendlela lesankondlo. b

 Davide waphatfwa kabi tikhatsi letinyenti. Bekatingelwa yiNkhosi Sawula kanye nalabanye lebebafuna kumbulala. (2 Samuweli 22:1) Nobe kunjalo, Davide wetsembela ngalokuphelele kuNkulunkulu wakhe. Davide bekati kutsi ekugcineni Jehova utawubajezisa bantfu lababi. (Tihlabelelo 37:10, 11) Ngisho nobe bangabonakala baphumelela “njengetjani lobuluhlata lobusandza kumila,” ekugcineni batawunyamalala.​—Tihlabelelo 37:2, 20, 35, 36.

 Tihlabelelo 37 ticatsanisa umphumela lotawutfolwa ngulabo labaphila ngetimiso taNkulunkulu kanye nalabo labangatilaleli. (Tihlabelelo 37:16, 17, 21, 22, 27, 28) Ngako letihlabelelo tisisita kutsi sihlakaniphe futsi sibe luhlobo lwebantfu lolwemukelwa nguNkulunkulu.

 Bukela le-video lemfishane kuze ubone loko lokukhulunywa ngako kulencwadzi yeTihlabelelo.