LOKUNGASITA UMNDENI | KUBA NGUMTALI
Indlela Yekuba Ngubabe Lokahle
Iyini indzima yababe?
Ngaphambi kwekutsi umntfwana wakho atalwe. Luhlobo lwendvodza longilo manje luveta kutsi utoba luhlobo lolunjani lwababe. Incwadzi letsi Do Fathers Matter? itsi:
“Indvodza lesita umkayo lokhulelwe ngekutsi imtsengele tintfo latidzingako, iye naye esibhedlela, ibone lomtfwana losengakatalwa ku-ultrasound, ive nobe ilalele kushaya kwenhlitiyo yakhe inematfuba lamanyenti ekutsi imsekele umkayo kanye nalomntfwana nasekatelwe.”
“Bengingafuni kutsi umkami ative ayedvwa ngalesikhatsi akhulelwe, ngako bengimsita ngatotonkhe tindlela. Saze salungisa likamelo lemntfwana sindzawonye. Lesi bekusikhatsi lesibalulekile kitsi njengobe silindzele kutalwa kwalomntfwana.”—James.
Simiso SeliBhayibheli: “Ningaticabangeli nine kuphela, kodvwa nicabangele nalabanye.”—KubaseFiliphi 2:4.
Umntfwana nasekatelwe. Ungakha bungani nemntfwana wakho ngekutsi udlale naye futsi umphatse. Bani nencenye nasekumnakekeleni. Kudlala indzima yakho njengababe kwenta umntfwana akhule kahle. Nawakha bungani nemntfwana wakho usuke ukhombisa kutsi uligugu kuwe.
“Tente ngatsi ungangaye. Dlala. Yenta emahlaya. Khumbula, umntfwana utawucala kubona lutsandvo kuwe njengemtali.”—Richard.
Simiso SeliBhayibheli: “Bantfwana balifa lelivela kuJehova; bantfwana basibusiso lesivela kuye.”—Tihlabelelo 127:3, umbhalo longentasi.
Njengobe umntfwana wakho akhula. Lucwaningo luveta kutsi bantfwana labasondzelene nabobabe babo benta kahle esikolweni, abakhatsateki kakhulu futsi mancane ematfuba ekutsi basebentise tidzakamiva nobe bente bucala. Tinike sikhatsi sekwakha bungani nemntfwana wakho.
“Indvodzana yami yatsi leyitakukhumbula kakhulu nase ihambile ekhaya tincociswano lebesivamise kuba nato nasitsatsa luhambo loludze ngemoto nobe nasidla kudla kwakusihlwa. Letinye tincociswano letibalulekile lesaba nato betivela ngingakatilindzeli. Besibanato ngenca yekutsi besicitsa sikhatsi lesinyenti ndzawonye.”—Dennis.
Simiso seliBhayibheli: “Caphelisisani kutsi indlela lenihamba ngayo ayifani neyebantfu labangakahlakaniphi kodvwa ifana neyebantfu labahlakaniphile, nisisebentise kahle sikhatsi senu.”—Kubase-Efesu 5:15, 16.
Babe wehluke ngani kumake?
Ngalokuvamile, bobabe banakekela umndeni ngetintfo lotidzingako kanye nekuwuvikela, kantsi bomake banakekela kutsi imindeni itiva njani. (Dutheronomi 1:31; Isaya 49:15) Kuleminye imindeni loku kungahle kwehluke. Nanobe kunjalo, bacwaningi batsi bobabili bobabe namake badlala indzima lebalulekile ekukhuliseni bantfwana. a
Judith Wallerstein locwaninga ngetindzaba letiphatselene nemindeni ugcizelela leliphuzu ngekutsi alandzisa lokwenteka kuye. Utsi: “Ngesikhatsi indvodzakati yami leneminyaka lengu-12 ishayiswa yimoto, yacela babe wayo kutsi agibele nayo i-ambulance ngobe beyiciniseka kutsi angayivikela. Naseyisesibhedlela yacela mine kutsi ngihlale nayo kuze ngiyidvudvute.” b
“Babe angawusita umndeni wakhe ngekutsi utive uvikelekile lokuyintfo lengaba matima ngamake kutsi ayente. Make usita bantfwana bakhe kutsi bative batsandvwa futsi balalelwa. Bobabili, bobabe namake bayabambisana.”—Daniel.
Simiso seliBhayibheli: “Ndvodzana yami, lalela umyalo wababe wakho, futsi ungayishiyi imfundziso yamake wakho.”—Taga 1:8.
Bobabe nemadvodzakati
Nawungubabe, nguwe lofundzisa indvodzakati yakho indlela bantfu besilisa lokufanele bayiphatse ngayo. Loku ukufundza nganati tindlela letimbili letilandzelako:
Ngekubuka indlela lophatsa ngayo make wayo. Nangabe umtsandza umkakho futsi umhlonipha, indvodzakati yakho itawubona buntfu lobubalulekile lengabubuka kumuntfu letawufuna kushada naye.—1 Phetro 3:7.
Ngekubuka indlela loyiphatsa ngayo. Nawuyihlonipha indvodzakati yakho, uyifundzisa kutsi nayo itihloniphe. Iphindze ifundze indlela lokufanele iphatfwe ngayo ngulabanye bantfu besilisa.
Nangabe babe ahlale ayigceka indvodzakati yakhe, uyenta itive ingasilutfo bese ifuna kwemukeleka kulabanye bantfu besilisa lokungenteka banetinhloso letimbi.
“Indvodzakati letsandvwa futsi isekelwe ngubabe wayo, ayikavami kutsatseka futsi itsandzane nemuntfu wesilisa longenabo buntfu bendvodza lekahle.”—Wayne.