Bekabukeka Njani Jesu?
Lokushiwo liBhayibheli
Kute lowatiko kutsi Jesu abebukeka njani ngobe neliBhayibheli alisho. Loku kukhombisa kutsi indlela lebekabukeka ngayo ayikabaluleki. Nobe kunjalo, liBhayibheli liyasiniketa umcondvo wekutsi bekabukeka njani.
Indlela lebekabukeka ngayo: Njengobe make waJesu bekangumJuda, kungenteka watsatsa letinye tici telufuto temaJuda kuye. (KumaHebheru 7:14) Kungenteka indlela lebekabukeka ngayo beyingakehluki kuneyalabanye bantfu. Ngalesinye sikhatsi wakhona kutsatsa luhambo loluya eJerusalema esuka eGalile bangamboni kutsi nguye. (Johane 7:10, 11) Bekangakehluki nakubafundzi bakhe lebekasondzelene nabo. Khumbula kutsi sicumbi lebesihlomile sifuna kumbopha besingamati Jesu, ngako kwadzingeka kutsi Judasi Skariyothi asitjengise yena.—Matewu 26:47-49.
Budze betinwele: Ngeke kuze kwenteke kutsi Jesu bekanetinwele letindze, ngobe liBhayibheli litsi “kulihlazo ngendvodza kuba netinwele letindze.”—1 KubaseKhorinte 11:14.
Silevu: Jesu bekanaso silevu. Walandzela umtsetfo wemaJuda lobewungawavumeli emadvodza kutsi ‘ahhule tilevu tawo emaceleni.’ (Levithikhusi 19:27; KubaseGalathiya 4:4) LiBhayibheli liphindze likhulume ngesilevu saJesu esiphrofethweni lesimayelana nekuhlupheka kwakhe.—Isaya 50:6.
Umtimba: Jesu bekanemtimba locinile. Nakenta umsebenti wakhe wekushumayela bekahamba emabanga lamadze. (Matewu 9:35) Kabili wahlanta lithempeli lemaJuda, waketula ematafula alabashintja imali futsi kanye, wacosha tilwane ngesiswebhu. (Lukha 19:45, 46; Johane 2:14, 15) I-Cyclopedia yaMcClintock naStrong itsi: “Konkhe kulandzisa kwemavangeli kuveta kutsi [Jesu] bekanemtimba locinile futsi lophilile.”—Volume IV, likhasi 884.
Indlela lebekabukeka ngayo ebusweni: Jesu bekanemusa neluvelo, futsi siyaciniseka kutsi loko bekubonakala nasebusweni bakhe. (Matewu 11:28, 29) Bantfu bato tonkhe tinhlobo bebeta kuye kuze batotfola indvudvuto kanye nelusito. (Lukha 5:12, 13; 7:37, 38) Ngisho nebantfwana bebativa bakhululekile nabanaye.—Matewu 19:13-15; Makho 9:35-37.
Lokungesilo liciniso ngekubukeka kwaJesu
Lokungesilo liciniso: Labanye batsi Jesu bekavela e-Afrika ngobe incwadzi yeSembulo ifananisa tinwele takhe neboya betimvu iphindze ifananise tinyawo takhe “nelitfusi lelicwebetelako.”—Sembulo 1:14, 15.
Liciniso: Incwadzi yeSembulo ikhuluma ‘ngetibonakaliso.’ (Sembulo 1:1) Kuchazwa kwetinwele kanye netinyawo takhe kusetjentiswe ngekwemfanekiso kuze kuchaze buntfu bakhe ngemuva kwekuvuswa ekufeni, hhayi indlela lebekabukeka ngayo ngesikhatsi aseselapha emhlabeni. Nayitsi “tinwele letisenhloko yakhe betimhlophe njengeboya lobumhlophe nanjengesitfwatfwa,” incwadzi yeSembulo 1:14 isuke isebentisa umbala kuze ifananise, hhayi kwakheka kwato. Loku kumelela kuhlakanipha ngenca yebudzala bakhe. (Sembulo 3:14) Lelivesi alicatsanisi kwakheka kwetinwele taJesu neboya, njengobe lingakucatsa nekwakheka kwato nesitfwatfwa.
Tinyawo taJesu “betifana nelitfusi lelicwebetela emlilweni lomkhulu.” (Sembulo 1:15) “Nebuso bakhe bebufana nelilanga nalikhanya kakhulu.” (Sembulo 1:16) Njengobe kute sive lesinelibala lelichazwa lapha, lombono kufanele kube ungekwemfanekiso, futsi uveta Jesu lovusiwe njengaloyo lohleti “ekukhanyeni lokute umuntfu longasondzela kuko.”—1 KuThimothi 6:16.
Lokungesilo liciniso: Jesu bekete emandla futsi bekabutsakatsaka.
Liciniso: Jesu bekayindvodza lecinile. Sibonelo nje, wativeta ngesibindzi kulesicumbi lebesihlomile sitombopha. (Johane 18:4-8) Kufanele kube bekacine ngalokwanele kuze akwati kusebentisa emathuluzi ekubata ladzinga emandla.—Makho 6:3.
Pho yini leyenta Jesu wadzinga kutfwaliswa lugodvo lebekatawubulawelwa kulo? Yini leyamenta wafa kucala kunalabo lebekabetselwa nabo? (Lukha 23:26; Johane 19:31-33) Ngaphambi kwekutsi Jesu abulawe, umtimba wakhe wentiwa waba butsakatsaka. Lokunye lokwamenta waba butsakatsaka kutsi akazange alale busuku bonkhe ngobe bekacindzetelekile. (Lukha 22:42-44) Ebusuku emaJuda amphatsa kabi, kwatsi ekuseni emaRoma amhlupha. (Matewu 26:67, 68; Johane 19:1-3) Kungenteka ngiko lokwamenta washeshe wafa.
Lokungesilo liciniso: Jesu bekahlala abindzile futsi advumatekile.
Liciniso: Jesu wabuveta kahle buntfu baBabe wakhe losezulwini, Jehova, liBhayibheli lelimchaza ngekutsi ‘nguNkulunkulu lojabulako.’ (1 KuThimothi 1:11; Johane 14:9) Ecinisweni, Jesu wafundzisa labanye indlela yekujabula. (Matewu 5:3-9; Lukha 11:28) Lamaciniso akhombisa kutsi Jesu bekahlala ajabulile futsi loko bekubonakala ebusweni bakhe.
Lokunye Longatsandza Kukuhlola
TIMPHENDVULO TEMIBUTO LEMAYELANA NELIBHAYIBHELI
Umlandvo Ngekuphila KwaJesu Locuketfwe liBhayibheli Unembile Yini?
Cabanga ngebufakazi bekulandzisa kwemaVangeli kanye nemibhalo lemidzala leyatiwako.
TIMFUNDZISO TELIBHAYIBHELI LETIBALULEKILE
Yini Lengasenta Sikholwe Kutsi LiBhayibheli Liliciniso?
Nangabe liBhayibheli labhalwa nguNkulunkulu, loko kusho kutsi kufanele lingafani naletinye tincwadzi.
MAYELANA NATSI
Cela Kuvakashelwa
Coca ngembuto lomayelana neliBhayibheli nobe ufundze lokunyenti ngaBoFakazi BaJehova.