LiBhayibheli lichaza tentakalo, tintfo kanye nesimo sengcondvo bantfu labatawuba naso lesitawukhombisa kutsi siphila esikhatsini ‘sekuphela kwalelive’ nobe ‘sekuphela kwetikhatsi.’ (Matewu 24:3; LiBhayibheli LesiSwati Lelivamile) LiBhayibheli libita lesikhatsi ngekutsi ‘ngemalanga ekugcina.’​—2 KuThimothi 3:1; Danyela 8:19.

 LiBhayibheli laphrofetha ngetintfo letinyenti lebetitawenteka ngasikhatsi sinye futsi ‘lebesitawubona’ ngato kutsi siphila emalangeni ekugcina. (Lukha 21:7) Cabanga nganati tibonelo:

 Timphi emhlabeni wonkhe. Jesu watsi: “Sive sitawuvukela lesinye sive, nembuso uvukele lomunye umbuso.” (Matewu 24:7) Ngendlela lefanako, Sembulo 6:4 saphrofetha ngemgibeli welihhashi longekwemfanekiso lomelela timphi futsi ‘lotawususa kuthula emhlabeni.’

 Indlala lenkhulu. Jesu watsi: “Kutawuba khona indlala.” (Matewu 24:7) Incwadzi yeSembulo yaphrofetha nangalomunye umgibeli welihhashi longekwemfanekiso lomelela indlala lenkhulu etindzaweni letehlukahlukene.​—Sembulo 6:5, 6.

 Kutamatama kwemhlaba lokukhulu. Jesu watsi bekutawuba “nekutamatama kwemhlaba etindzaweni letehlukahlukene.” (Matewu 24:7; Lukha 21:11) Lokutamatama lokukhulu lebekutawenteka emhlabeni wonkhe bekutawubangela kuhlupheka kanye nekufa kwebantfu ngelizinga lelingakase labonwa.

 Tifo. Ngekusho kwaJesu, bekutawuba “netifo letingumshayabhuce.”​—Lukha 21:11.

 Bugebengu. Ngisho nobe bugebengu bebuvele bukhona kusukela kadzeni, Jesu waphrofetha kutsi emalangeni ekugcina, bekutawuba ‘nekwandza kwebubi.’​—Matewu 24:12.

 Kulinyatwa kwemhlaba. Sembulo 11:18 saphrofetha kutsi bantfu ‘bebatawulimata umhlaba.’ Loku bebatakwenta ngetento tebudlova, kungetsembeki kanye nekungcolisa umhlaba.

 Kuhhohloka kwendlela bantfu labatiphatsa ngayo. Ku-2 KuThimothi 3:1-4, liBhayibheli laphrofetha kutsi bantfu bebatawuba ‘ngulabangabongi, labangetsembeki, . . . labangavumi kwenta tivumelwane, banyundzeli, labangatibambi, labanelulaka, labangakutsandzi lokuhle, labatsengisa ngalabanye, labanenkhani, labagcwele umgcabho.’ Lendlela yekutiphatsa beyitawuba yimbi kakhulu kangangekutsi lesikhatsi besitawubitwa kufanele ngekutsi ‘sikhatsi lesibucayi lokumatima kubhekana naso.’

 Kubhidlika kwemindeni. Ku-2 KuThimothi 3:2, 3, liBhayibheli laphrofetha kutsi bantfu labanyenti bebatawuba “bete lutsandvo” ngemindeni yabo futsi bantfwana ‘bangabalaleli batali.’

 Bantfu ngeke basamtsandza Nkulunkulu. Jesu watsi: “Bantfu labanyenti batawuphelelwa lutsandvo.” (Matewu 24:12) Jesu bekasho kutsi bantfu labanyenti ngeke basamtsandza Nkulunkulu. Ngendlela lefanako, 2 KuThimothi 3:4 utsi emalangeni ekugcina bekutawuba nebantfu labatsandza “injabulo kunekutsandza Nkulunkulu.”

 Kutentisa kwenkholo. Ku-2 KuThimothi 3:5, liBhayibheli laphrofetha kutsi bantfu bebatawenta shengatsi bakhonta Nkulunkulu, kodvwa bangaphili ngetimiso takhe.

 Kwandza kwekucondvwa kwetiphrofetho teliBhayibheli. Incwadzi yaDanyela yaphrofetha kutsi ‘ngesikhatsi sekugcina,’ lwati lwemaciniso laseBhayibhelini belutawuba lunyenti, lokufaka ekhatsi kucondvwa lokunembile kwetiphrofetho.​—Danyela 12:4.

 Kushumayela emhlabeni wonkhe. Jesu watsi: “Letindzaba letimnandzi teMbuso titawushunyayelwa emhlabeni wonkhe.”​—Matewu 24:14.

 Kwandza kwekungabi nandzaba nekuhlekisa ngalabanye. Jesu waphrofetha kutsi bantfu bebangeke babunake ngemabomu bufakazi bekutsi kuphela sekusedvute. (Matewu 24:37-39) Ngetulu kwaloko, 2 Phetro 3:3, 4 waphrofetha ngekutsi labanye bebatawuhlekisa ngalobufakazi batsi abusho lutfo.

 Kugcwaliseka kwato tonkhe tiphrofetho. Jesu watsi emalanga ekugcina bekatawubonakala ngekugcwaliseka kwato tonkhe letiphrofetho ngasikhatsi sinye, hhayi nje letimbalwa kuphela.​—Matewu 24:33.

 Yebo. Tintfo letenteka emhlabeni kanye nekubalwa kwetikhatsi letaphrofethwa liBhayibheli kukhombisa kutsi emalanga ekugcina acala nga-1914, lokungumnyaka lokwacala ngawo iMphi Yelive Yekucala. Kuze ubone kutsi tintfo letenteka emhlabeni tikhombisa njani kutsi siphila emalangeni ekugcina, bukela le-video lelandzelako:

 UMbuso waNkulunkulu wacala kubusa ezulwini nga-1914, futsi intfo yekucala lowayenta kwaba kucosha Sathane Develi nemadimoni akhe ezulwini kuze labakwentako kutsintse kuphela umhlaba. (Sembulo 12:7-12) Emandla Sathane lanawo kubantfu abonakala etintfweni letimbi labatentako, lokwenta lamalanga ekugcina abe tikhatsi “letibucayi lokumatima kubhekana nato.”​—2 KuThimothi 3:1.

 Letikhatsi letibucayi ticindzetela bantfu labanyenti. Bantfu bakhatsatekile ngenca yekutsi bantfu abasakwati kuphilisana ngekuthula. Labanye baze besaba kutsi bantfu batawucedzana.

 Nobe kunjalo, labanye labacindzetelwa tintfo letentekako emhlabeni banelitsemba ngelikusasa. Bayaciniseka kutsi madvutane, uMbuso waNkulunkulu utawucedza tonkhe tinkinga letisemhlabeni. (Danyela 2:44; Sembulo 21:3, 4) Balindze Nkulunkulu kutsi agcwalise tetsembiso takhe, futsi batfola indvudvuto emavini aJesu latsi: “loyo lotawucinisela kuze kube sekugcineni utawusindziswa.”​—Matewu 24:13; Mikha 7:7.