Emavi latsi “iJerusalema Lensha,” lokungemavi lavela eBhayibhelini tikhatsi letimbili, asho lidolobha lelingumfanekiso lelimelela licembu lebalandzeli baJesu labayobusa naye ezulwini ngaphansi kweMbuso waNkulunkulu. (Sembulo 3:12; 21:2) LiBhayibheli litsi lelicembu lingaphindze libitwe ngekutsi ngumakoti waKhristu.

1.   IJerusalema Lensha isezulwini. Ngaso sonkhe sikhatsi liBhayibheli nalikhuluma ngeliJerusalema Lensha, litsi yehlela phansi emhlabeni ivela ezulwini, lapho tingilosi tigadze khona emasango. (Sembulo 3:12; 21:2, 10, 12) Lokunye, bukhulu balelidolobha bubufakazi bekutsi ngeke sekwenteke libe lapha emhlabeni. ‘Lingemastadiyu langu-12 000,’ tinhlangotsi tonkhe. a (Sembulo 21:16) Ngako luhlangotsi lulunye lungacishe luphakame ngemakhilomitha langu-560 (350 mi), lokusho kutsi lungafika emkhatsini welizulu.

2.   IJerusalema Lensha yakhiwa licembu lebalandzeli baJesu, labangumakoti waKhristu. IJerusalema ibitwa ngekutsi ‘ngumakoti, umfati weliWundlu.’ (Sembulo 21:9, 10) Kulomfanekiso, liWundlu limelela Jesu Khristu. (Johane 1:29; Sembulo 5:12) “Umfati weliWundlu,” makoti waKhristu, umelela emaKhristu layohlanganiswa naJesu ezulwini. LiBhayibheli lifananisa buhlobo lobukhona emkhatsini waJesu nalamaKhristu nebuhlobo lobubakhona emkhatsini wendvodza nemfati. (2 Khorinte 11:2; Efesu 5:23-25) Ngetulu kwaloko, ematje lasisekelo eJerusalema Lensha abhalwe emabito “lalishumi nakubili ebaphostoli beliWundlu labalishumi nakubili.” (Sembulo 21:14) Lomniningwane usisita sikhone kubona iJerusalema Lensha, ngobe emaKhristu layophila ezulwini akhiwe “etikwesisekelo sebaphostoli nebaphrofethi.”—Efesu 2:20.

3.   IJerusalema Lensha iyincenye yahulumende. IJerusalema yasendvulo beyikadze iyinhlokodolobha yaka-Israyeli, lebekuyindzawo lapho iNkhosi Davide, indvodzana yakhe Solomoni, kanye netitukulwane tabo babusela khona “esihlalweni sebukhosi saSimakadze.” (1 Tikhronike 29:23) Ngako iJerusalema lebeyibitwa ngekutsi “lidolobha lelingcwele” beyimelela kubusa kwaNkulunkulu eluhlwini lwaDavide. (Nehemiya 11:1) IJerusalema Lensha, lebitwa ngekutsi “lidolobha lelingcwele,” yakhiwa ngulabo labayohlangana naJesu ezulwini ‘babuse njengemakhosi etikwemhlaba.’—Sembulo 5:9, 10; 21:2.

4.   IJerusalema Lensha iletsela bantfu tibusiso emhlabeni. IJerusalema lensha ivetwa ‘yehla ezulwini ivela kuNkulunkulu,’ lokukhombisa kutsi usebentisa yona kuze alungise tinkinga letingekho ezulwini. (Sembulo 21:2) Loku kuhlobanisa iJerusalema Lensha neMbuso waNkulunkulu, loyo Nkulunkulu latawusebentisa kuze intsandvo yakhe yentiwe “emhlabeni njengasezulwini.” (Matewu 6:10) Injongo yaNkulunkulu ngebantfu labatawuphila emhlabeni ifaka ekhatsi nati tibusiso:

   •   Kususwa kwesono. “Umfula wemanti ekuphila” ugeleta kusuka eJerusalema Lensha futsi unisela “tihlahla tekuphila” lekutihlahla ‘tekuphilisa tive.’ (Sembulo 22:1, 2) Lokwelashwa kwebantfu emtimbeni kanye nangaletinye tindlela, kutawususa sono kuphindze kusite bantfu batfole kuphila lokuphakadze, njengobe Nkulunkulu abehlosile ekucaleni.—Roma 8:21.

   •   Buhlobo lobuhle emkhatsini waNkulunkulu nebantfu. Sono sikhweshise bantfu kuNkulunkulu. (Isaya 59:2) Kususwa kwesono kutawubangela kutsi kugcwaliseke nasi siphrofetho lesitsi: “Lithende laNkulunkulu likanye nebantfu, futsi utawuhlala nabo, bona babe bantfu bakhe. NaNkulunkulu utawuba nabo.”—Sembulo 21:3.

   •   Kucedvwa kwekufa nekuhlupheka. Asebentisa uMbuso wakhe, Nkulunkulu “Utawesula tonkhe tinyembeti emehlweni abo, kufa ngeke kusaba khona, nekulila, nekukhala kanye nebuhlungu, ngeke kusaba khona.”—Sembulo 21:4.