Cha. LiBhayibheli alisho kutsi imali yimbi, noma kutsi iyimbangela yato tonkhe tintfo letimbi. Lomusho lovamile lotsi “imali yimphandze yesono” ngemavi lasetjentiswa kabi latsetfwe eBhayibhelini. Mbambambamba liBhayibheli litsi: “kutsandza imali kuyimphandze yako konkhe lokubi.” a—1 Thimothi 6:10, Swati Standard Bible

•  Yini Leshiwo liBhayibheli ngemali?

•  Lisecwayiselani liBhayibheli ngekutsandza imali?

•  Seluleko seliBhayibheli singasisita njani endzabeni yemali?

•  Emavesi eliBhayibheli lakhuluma ngemali

 LiBhayibheli liyavuma kutsi imali nayisetjentiswa kahle ilusito, iphindze ibe ‘yintfo yekukhosela.’ (Umshumayeli 7:12) Ngetulu kwaloko, liBhayibheli liyabancoma labo labapha labanye, lokufaka ekhatsi kubapha imali.—Taga 11:25.

 Ngesikhatsi lesifanako liBhayibheli lisecwayisa ngekunaka kakhulu imali. Litsi: “Indlela leniphila ngayo ayingabi yekutsandza imali, kodvwa yeneliswani tintfo leninato.” (Hebheru 13:5) Sifundvo lesisitfolako kutsi kufanele siyisebentise kahle imali futsi singafuni bunjinga. Kunaloko, umgomo wetfu kufanele kube kwenetiseka ngetintfo lesitidzingako, letifaka ekhatsi kudla, kwekwembatsa, kanye nendzawo yekuhlala.—1 Thimothi 6:8.

 Bantfu lababukhali angeke bakutfole kuphila lokuphakadze. (Efesu 5:5) Sizatfu saloko kutsi bukhali buluhlobo lwekukhonta titfombe noma kukhonta kwemanga. (Kholose 3:5). Lokunye kutsi nabafise kwenta labakufunako, bantfu lababukhali abatinaki timiso letilungile. Taga 28:20 titsi: “kodvwa lojaka kuceba uyawutfola sijeziso.” Bangase balingeke kutsi bente bugebengu lobunjengekwesabisa bantfu, kungetsembeki, kukhwabanisa, kutfumba noma kubulala.

 Ngisho noma kutsandza imali kungaholeli etentweni letimbi, kodvwa kungaba nemiphumela lemibi. LiBhayibheli litsi “labatimisele ngekunjinga bawela esilingweni, elugibeni, nasetifisweni letinyenti letingenangcondvo naletilimatako.”—1 Thimothi 6:9.

 Nasingatilahli tintfo lesati kutsi tilungile futsi tijabulisa Nkulunkulu ngenca yemali sitawuhlonipheka, sitsandvwe nguNkulunkulu aphindze asisekele. Labo labetama ngalokusuka enhlitiyweni kumjabulisa Nkulunkulu wetsembisa kutsi “ngeke ngize ngikushiye, futsi ngeke ngize ngikulahle.” (Hebheru 13:5, 6) Uphindze asicinisekise kutsi “Umuntfu lowetsembekile uyawuchuma.”—Taga 28:20.