Yebo! LiBhayibheli livela kuNkulunkulu “lodvudvuta labo labephukile etinhlitiyweni.” (2 KubaseKhorinte 7:6) Nanobe liBhayibheli lingasiyo incwadzi lefundzisa ngekwelashwa kwengcondvo, kodvwa lisite bantfu labanyenti bancoba imicabango yekutibulala. Seluleko salo lesisebentisekako singakusita nawe.

•  Ngusiphi seluleko lesisebentisekako liBhayibheli lelisiniketako?

•  LiBhayibheli liyasitjela yini ngebantfu lebebafuna kufa?

•  Ngumaphi emavesi eliBhayibheli langakusita uncobe imicabango yekutibulala?

•  Kutsiwani nangabe umngani wakho atsi ufuna kufa?

•  Kutsiwani nangabe ngake ngetama kutibulala?

• ● Veta indlela lotiva ngayo.

   Lokushiwo liBhayibheli: “Umngani sibili ukutsandza ngaso sonkhe sikhatsi futsi ungumnakenu longetsembela kuye ngesikhatsi sekuhlupheka.”—Taga 17:17.

   Lokukushoko: Siyakudzinga kusitwa ngulabanye nasinemicabango lesenta sitive sicindzetelekile.

   Nangabe ungabatjeli labanye indlela lotiva ngayo, utitfwesa umtfwalo lomatima. Kodvwa nangabe ubatjela labanye indlela lotiva ngayo, utinciphisela umtfwalo, futsi loko kungakwenta ubone tintfo ngeliso lelehlukile.

   Yetama naku: Khuluma nalotsite lamuhla. Kungaba lilunga lemndeni, nobe umngani lometsembako. a Ungaphindze uyibhale phansi indlela lotiva ngayo.

• ● Funa lusito lwebetemphilo.

   Lokushiwo liBhayibheli: “Bantfu labaphilile abamdzingi dokotela, kodvwa ngulabagulako labamdzingako.”—Matewu 9:12.

   Lokukushoko: Nangabe sigula kufanele sifune lusito lwebetemphilo.

   Imicabango yekutibulala ingaba luphawu lwekugula engcondweni, nobe endleleni lesitiva ngayo. Njengekugula lokusemtimbeni, akukafaneli sitive sinemahloni ngalokugula. Kugula engcondvweni kanye nasendleleni lesitiva ngayo, kungelapheka.

   Yetama naku: Funa lusito kudokodela ngekushesha.

• ● Khumbula kutsi Nkulunkulu uyakukhatsalela.

   Lokushiwo liBhayibheli: “Bojolwane labasihlanu abatsengiswa yini ngemasenti lamabili lamancane? Nanobe kunjalo, Nkulunkulu akakhohlwa ngisho namunye wabo. . . . ningesabi, nine nibaluleke kwendlula bojolwane labanyenti.”—Lukha 12:6, 7.

   Lokukushoko: Uligugu kuNkulunkulu.

   Ungahle utive ulahliwe, kodvwa Nkulunkulu uyakubona loko lobhekene nako. Uyakukhatsalela, ngisho nobe utiva sewute sifiso sekuchubeka uphila. Tihlabelelo 51:17 titsi: “Awu Nkulunkulu, angeke uyibukele phansi inhlitiyo leyephukile naledzabukile.” Nkulunkulu ufuna kutsi uchubeke uphila, ngobe uyakutsandza

   Yetama naku: Hlola bufakazi lobuseBhayibhelini bekutsi Nkulunkulu uyakutsandza. Sibonelo nje, buka sehluko 24 sencwadzi letsi Sondela KuJehova, letfolakala ngesiZulu.

• ● Thantaza kuNkulunkulu.

   Lokushiwo liBhayibheli: ‘Phonsani konkhe kukhatsateka kwenu kuNkulunkulu ngobe uyanikhatsalela.’—1 Phetro 5:7.

   Lokukushoko: Nkulunkulu uyafuna umtjele indlela lotiva ngayo, kanye naloko lokukukhatsatako.

   Nkulunkulu angakuniketa kuthula kwengcondvo kanye nemandla ekuchubeka ubeketelela lesimo lokuso. (KubaseFiliphi 4:6, 7, 13) Uyabasekela labo labathantaza kuye bacele lusito.—Tihlabelelo 55:22.

   Yetama naku: Thantaza kuNkulunkulu lamuhla, usebentise ligama lakhe lelitsi Jehova, futsi umtjele indlela lotiva ngayo. (Tihlabelelo 83:18) Mcele kutsi akusite uchubeke ubeketelela letinkinga lobhekene nato.

• ● Zindla ngaloko lokushiwo liBhayibheli ngelikusasa.

   Lokushiwo liBhayibheli: “Sinalelitsemba lelinjengelihhuka lemkhumbi etimphilweni tetfu. Lelitsemba licinisekisiwe futsi licinile.”—KumaHebheru 6:19, umbhalo longentansi.

   Lokukushoko: Indlela lotiva ngayo ingafana nemkhumbi lowehla wenyuka emagagasini, kodvwa litsemba lingakwenta usimame.

   Lelitsemba alisiyo inganekwane, kodvwa lisekelwe esetsembisweni saNkulunkulu sekususa konkhe lokusibangela buhlungu.—Sembulo 21:4.

   Yetama naku: Fundza lokunyenti ngalelitsemba lelisekelwe eBhayibhelini ngekutsi ufundze sifundvo 5 sencwajana letsi Tindzaba Letimnandzi Letivela KuNkulunkulu!

• ● Yenta intfo lojabulela kuyenta.

   Lokushiwo liBhayibheli: “Inhlitiyo lejabulako ifana nemutsi lowelaphako.”—Taga 17:22.

   Lokukushoko: Simo setfu sengcondvo nendlela lesitiva ngayo kungashintja nasenta tintfo letisenta sijabule.

   Yetama naku: Yenta intfo lovame kujabulela kuyenta. Nasi sibonelo, lalela umculo lokwenta ujabule, fundza lokutsite lokukhutsatako nobe wente intfo loyitsandzako. Ungaphindze ujabule kakhulu nangabe wenta tintfo letitawusita labanye.—Imisebenti 20:35.

• ● Nakekela imphilo yakho.

   Lokushiwo liBhayibheli: “Kucecesha umtimba kuyazuzisa.”—1 KuThimothi 4:8.

   Lokukushoko: Siyazuza nangabe sicecesha umtimba, silala ngalokwanele futsi sidla kudla lokunemphilo.

   Yetama naku: Yelula tinyawo, kodvwa uhambe ngekuphangisa; ngisho nobe kungaba yimizuzu lengu-15.

• ● Khumbula kutsi indlela lesitiva ngayo, kanye naletinye tintfo ekuphileni kuyashintja.

   Lokushiwo liBhayibheli: ‘Anati kutsi kuphila kwenu kutawube kunjani kusasa’—Jakobe 4:14.

   Lokukushoko: Inkinga lekucindzetelako, ngisho naleyo lebonakala ingetulu kwemandla akho, ingahle ibe yesikhashana.

   Ngisho nobe simo lokuso singabonakala sisibi kangakanani lamuhla, kodvwa singashintja kusasa. Ngako, funa tindlela letingakusita usibeketelele. (2 KubaseKhorinte 4:8) Simo lesikucindzetelako kungenteka sishintje ngekuhamba kwesikhatsi, kodvwa angeke ukhone kutivusa nasewutibulele.

   Yetama naku: Fundza ngetindzaba tebantfu lebebadvumateke kakhulu kangangekutsi bebaze bafuna nekufa, lokukhulunywa ngabo eBhayibhelini, bese uyabona kutsi kuphila kwabo kwashintja njani ngetindlela lebebangakaticabangi. Cabanga nganati tibonelo.

 Yebo. LiBhayibheli lisitjela ngalabanye lokufana nekutsi batsi, “Ngifuna kufa.” Nkulunkulu akazange abatsetsise, kodvwa wabasita. Nakuwe angenta lokufanako.

Elija

•  ● Bekangubani? Elija bekangumphrofethi lonesibindzi. Kodvwa naye bekadvumateka ngaletinye tikhatsi. Jakobe 5:17 utsi: “Elija bekangumuntfu lonemiva lefana neyetfu.”

•  ● Yini leyamenta wafuna kufa? Ngalesinye sikhatsi Elija wativa alahliwe, esaba futsi ayintfo lengenamsebenti walutfo. Ngako wacela: ‘Jehova, tsatsa kuphila kwami.’—1 Emakhosi 19:4.

•  ● Yini leyamsita? Elija watjela Nkulunkulu indlela bekativa ngayo. Yini Nkulunkulu layenta kuze amkhutsate? Nkulunkulu wamkhombisa luvelo, waphindze wamkhombisa nemandla akhe. Wacinisekisa Elija kutsi usadzingeka, futsi wamniketa nemsiti lebekatamnakekela.

•  ▸ Fundza nga-Elija: 1 Emakhosi 19:2-18.

Jobe

•  ● Bekangubani? Jobe bekayindvodza lecebile futsi lenemndeni, leyakhonta Nkulunkulu weliciniso ngekwetsembeka.

•  ● Yini leyamenta wafuna kufa? Kuphila kwaJobe kwashintja kakhulu. Walahlekelwa ngiko konkhe lebekanako, nebantfwabakhe bonkhe babulawa sehlakalo. Wahlaselwa sifo lesibuhlungu, futsi ekugcineni wasolwa kabuhlungu ngekutsi nguye lotibangele letinkinga lebekanato. Jobe watsi: “Ngiyakwenyanya kuphila kwami. Angisafuni kuphila.”—Jobe 7:16.

•  ● Yini leyamsita? Jobe wathantaza kuNkulunkulu, futsi wakhuluma nalabanye ngalendzaba. (Jobe 10:1-3) Wakhutsatwa ngu-Elihu, umngani wakhe loneluvelo, futsi wamsita kutsi atsatse lesimo sakhe ngendlela lefanele. Ngetulu kwaloko, Jobe wemukela seluleko kanye nelusito loluvela kuNkulunkulu.

•  ▸ Fundza ngaJobe: Jobe 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Mosi

•  ● Bekangubani? Mosi bekangumholi wema-Israyeli asendvulo, futsi angumphrofethi lowetsembekile.

•  ● Yini leyamenta wafuna kufa? Mosi bekanemsebenti lomkhulu, ahlale agcekwa futsi wativa sekadziniwe. Ngako wakhala kuNkulunkulu watsi: “Ngicela uvele ungibulale nyalo.”—Numeri 11:11, 15.

•  ● Yini leyamsita? Mosi watjela Nkulunkulu indlela lebekativa ngayo. Nkulunkulu wamsita ngekutsi amnciphisele lomtfwalo lobewumbangela lokucindzeteleka lebekanako.

•  ▸ Fundza ngaMosi: Numeri 11:4-6, 10-17.