‘Kukhuluma ngetilwimi’ kusho likhono lelisimangaliso emaKhristu ekucala laba nalo lekukhuluma ngaletinye tilwimi lebebangazange sebatifundze. (Imisebenti 10:46, New International Version) Sikhulumi lebesikhuluma besiviwa melula ngumuntfu lobekalati lelolwimi. (Imisebenti 2:4-8) Kukhuluma ngetilwimi bekungulesinye sipho semoya longcwele Nkulunkulu labesiphe emaKhristu ekucala.—Hebheru 2:4; 1 Khorinte 12:4, 30.

•  Kwacala nini futsi kuphi kukhuluma ngetilwimi?

•  Beyiyini injongo yekukhuluma ngetilwimi?

•  Kukhuluma ngetilwimi bekutawuchubeka siphelane yini?

•  Kwaphela nini kukhuluma ngetilwimi?

•  Kutsiwani ngetilwimi letikhulunywa lamuhla?

•  EmaKhristu eliciniso angabonakala kanjani?

 Lesimangaliso sekucala senteka eJerusalema ekuseni ngemkhosi wemaJuda wePhentekhoste langa-33 C.E. Bafundzi baJesu labacishe babe ngu-120 bebahlangene ngalesikhatsi “bonkhe . . bagcwala umoya longcwele, bakhuluma ngetilwimi letehlukahlukene.” (Imisebenti 1:15; 2:1-4) Sicumbi sebantfu lebesivela “kuto tonkhe tive temhlaba” sahlangana ndzawonye, futsi “nguloyo naloyo abeva labafundzi bakhuluma lulwimi lwakhe.”—Imisebenti 2:5, 6.

1.   Bekubufakazi bekutsi nguNkulunkulu lobekasekela emaKhristu. Endvulo, Nkulunkulu bekenta timangaliso letitsite kuze afakazele kutsi bekunguye losekela bantfu labetsembekile labafaka ekhatsi Mosi. (Eksodusi 4:1-9, 29-31; Numeri 17:10) Kukhuluma ngetilwimi kwafeza injongo lefanako, nako kwakhombisa kutsi Nkulunkulu abelisekela lelibandla lemaKhristu lebelisandza kwakhiwa. Umphostoli Pawula wabhala watsi: “Tilwimi atisiso sibonakaliso kulabakholwako, kodvwa tisibonakaliso kulabangakholwa.”—1 Khorinte 14:22.

2.   Kuze emaKhristu akhone kuniketa bufakazi lobuphelele. Labo labeva labafundzi baJesu ngaleliPhentekhoste batsi: “Sonkhe lapha sibeva ngetilimi takitsi bakhuluma ngemisebenti lemikhulu yaNkulunkulu.” (Imisebenti 2:11) Ngako, injongo lebalulekile yalesimangaliso beyikusita emaKhristu kutsi akhone ‘kufakaza ngalokuphelele’ aphindze ente “bantfu bato tonkhe tive babe bafundzi,” njengobe Jesu abeyalile. (Imisebenti 10:42; Matewu 28:19) Bantfu labangacishe babe ngu-3 000 labasibona lesimangaliso baphindze beva lobufakazi lobaniketwa ngulamaKhristu, baba bafundzi ngalo lelolanga.—Imisebenti 2:41.

 Cha. Tipho temoya longcwele, letifaka ekhatsi kukhuluma ngetilwimi, betimane tililungiselelo lesikhashana. LiBhayibheli labiketela latsi: “Nangabe kunetiphiwo tekuphrofetha, titawucedvwa; nangabe kunetilwimi, titawuphela.”—1 Khorinte 13:8.

 Tipho temoya longcwele tandluliselwa nakulamanye emaKhristu ngesikhatsi sebaphostoli, ngekutsi labaphostoli bawabeke tandla. (Imisebenti 8:18; 10:44-46) Kubonakala shengatsi labo labemukela letipho temoya longcwele kulabaphostoli abazange batendlulisele kulabanye. (Imisebenti 8:5-7, 14-17) Kuze sikufanekise loku, asesitsi sisebenti sahulumende siniketa lotsite timphepha tekushayela, kodvwa loyomuntfu loniketwa leto timphepha akaniketwa yena ligunya lekuniketa lomunye timphepha tekushayela. Ngako-ke, kukhuluma ngetilwimi kwaphela ngemuva kwekufa kwebaphostoli, kanye nangemuva kwekufa kwalabo labatitfola kulabaphostoli.

 Lesipho sekukhuluma ngetilwimi ngalokusimangaliso kwaphela ngasekupheleni kwelikhulu lekucala. Lamuhla, kute longatsi yena ukhuluma ngaletinye tilwimi ngelusito lwemandla aNkulunkulu. a

 Jesu watsi bafundzi bakhe bebatawubonakala ngelutsandvo loluhambisana nekutidzela. (Johane 13:34, 35) Ngendlela lefanako, umphostoli Pawula watsi emaKhristu eliciniso abetawubonakala ngelutsandvo. (1 Khorinte 13:1, 8) Watsi Nkulunkulu abetawunika emaKhristu buntfu lobatiwa ngekutsi “titselo temoya,” futsi lutsandvo belutawuhamba embili.—Galathiya 5:22, 23.