Ungasondzela kuNkulunkulu ngekutsi ufundze ngaye futsi wente tintfo letimjabulisako. Nkulunkulu utawubese ‘usondzela kuwe.’ (Jakobe 4:8) LiBhayibheli liyasicinisekisa kutsi ‘akekho khashane kuloyo naloyo kitsi.’—Imisebenti 17:27.

•  Yini lokufanele siyente kuze sati Nkulunkulu

•  Lokungasilo liciniso ngekwati Nkulunkulu

 Fundza liBhayibheli

•  Lokushiwo liBhayibheli: “Yonkhe imiBhalo iphufumulelwe nguNkulunkulu.”—2 KuThimothi 3:16.

•  Lokukushoko: Nkulunkulu ngumBhali weliBhayibheli. Wafaka imicabango yakhe etingcondvweni talabo bebabhala liBhayibheli. Asebentisa lencwadzi lekhetsekile, Nkulunkulu usivetele loko lasifunela kona. Uphindze wasivetela buntfu bakhe, lobufaka ekhatsi lutsandvo, kulunga, kanye nemusa.—Eksodusi 34:6; Dutheronomi 32:4.

•  Longakwenta: Fundza liBhayibheli onkhe malanga. (Joshuwa 1:8) Cabanga ngaloko lokufundzako, bese utiyabuta kutsi: ‘Loku kungifundzisani ngaNkulunkulu?’—Tihlabelelo 77:12.

   Sibonelo nje, fundza Jeremiya 29:11, bese utibuta kutsi: ‘Nkulunkulu ufuna ngibe nekuthula yini nobe ngehlelwe yinhlekelele? UnguNkulunkulu lophindziselako yini, nobe ufuna ngibe nelikusasa lelihle?’

 Bukisisa indalo

•  Lokushiwo liBhayibheli: “Nanobe Nkulunkulu angabonakali, kepha kusukela ekudalweni kwelive kuchubeke, bantfu bakhonile kuwabona emandla akhe langapheli, babona nekutsi vele unguNkulunkulu, ngobe loku kuyabonakala etintfweni latidalile.”—KubaseRoma 1:20.

•  Lokukushoko: Tintfo Nkulunkulu latidalile tiveta buntfu bakhe, njengobe nemdvwebo ungaveta lokutsite ngemdvwebi wawo nobe nemshini loyinkimbinkimbi ungasitjela lokunyenti ngemakhi wawo. Asesibekise, likhono lengcondvo lekubamba tintfo kanye nebunkimbinkimbi bayo kuveta kuhlakanipha kwaNkulunkulu, futsi indlela lalawula ngayo emandla elilanga kanye newaletinye tinkhanyeti kuveta emandla akhe.—Tihlabelelo 104:24; Isaya 40:26.

•  Longakwenta: Tinike sikhatsi sekubukisisa uphindze ufundze ngendalo. Njengobe wenta njalo tibute, ‘Indlela lemangalisako indalo leyentiwe ngayo isifundzisani ngaNkulunkulu?’ a Kuliciniso, indalo ayisitjeli konkhe ngaNkulunkulu. Kungako asinikete liBhayibheli.

 Sebentisa ligama laNkulunkulu

•  Lokushiwo liBhayibheli: “Ngimvikele ngobe uyalati libito lami. Yena utawukhala kimi, mine ngimphendvule.”—Tihlabelelo 91:14, 15.

•  Lokukushoko: Nkulunkulu, logama lakhe linguJehova, ubanaka kakhulu labo labasebenetisa ligama lakhe ngenhlonipho. b (Tihlabelelo 83:18; Malakhi 3:16) Nkulunkulu wente kutsi simati ngekusitjela ligama lakhe. Utsi: “NginguJehova, lelo libito lami.”—Isaya 42:8.

•  Longakwenta: Sebentisa ligama lelitsi Jehova nawukhuluma ngaye.

 Khuluma naJehova ngemthantazo

•  Lokushiwo liBhayibheli: “Jehova usedvute nabo bonkhe labambitako.”—Tihlabelelo 145:18.

•  Lokukushoko: Jehova usendzela kulabo labathantaza kuye banekukholwa. Umthantazo uyincenye yekukhonta Nkulunkulu lekhombisa kutsi simhlonipha ngalokujulile.

•  Longakwenta: Thantaza kuNkulunkulu njalo. (1 KubaseThesalonika 5:17) Mtjele konkhe lokukukhatsatako kanye nendlela lotiva ngayo.—Tihlabelelo 62:8. c

 Cinisa kukholwa kwakho kuNkulunkulu

•  Lokushiwo liBhayibheli: “Ngaphandle kwekukholwa ngeke kwenteke kutsi umuntfu amjabulise Nkulunkulu.”—KumaHebheru 11:6.

•  Lokukushoko: Kute sisondzele kuNkulunkulu, kufanele sibe nekukholwa kuye. EBhayibheli kuba nekukholwa kusho lokungetulu nje kwekukholelwa kutsi Nkulunkulu ukhona. Kusho kutetsemba ngalokuphelele timiso takhe nekutsi loko lakutsembisile kutawufezeka. Kuze ube nebuhlobo lobuhle nalomunye umuntfu kufanele umetsembe.

•  Longakwenta: Kukholwa mbamba kuselwe elwatini. (KubaseRoma 10:17) Ngako tadisha liBhayibheli futsi utihlole kutsi ungametsemba yini Nkulunkulu kanye neteluleko takhe. BoFakazi BaJehova bangakujabulela kufundza nawe liBhayibheli. d

 Yenta lokujabulisa Nkulunkulu

•  Lokushiwo liBhayibheli: “Ngobe nguloku lokushiwo kutsandza Nkulunkulu, kutsi sigcine imiyalo yakhe.”—1 Johane 5:3.

•  Lokukushoko: Jehova usedvutane nalabo labakhombisa kutsi bayamtsandza ngekutsi bente konkhe lokusemandleni abo kuze bagcine imitsetfo yakhe.

•  Longakwenta: Njengobe ufundza liBhayibheli, naka tintfo Nkulunkulu latitsandzako nalangatitsandzi. Tibute, ‘Nguluphi lushintjo lengingalwenta ekuphileni kwami kute ngijabulise uMdali wami?’—1 KubaseThesalonika 4:1.

 Bona indlela Nkulunkulu lakunakekela ngayo ngekutsi usebentise seluleko sakhe

•  Lokushiwo liBhayibheli: “Nambitsani futsi nibone kutsi Jehova muhle.”—Tihlabelelo 34:8.

•  Lokukushoko: Nkulunkulu ukumema kutsi utibonele wena kutsi muhle kangakanani. Nawutibonela wena indlela lakutsandza ngayo nalakusekela ngayo utawusondzela kuye.

•  Longakwenta: Njengobe usafundza liBhayibheli, tisebentise teluleko taNkulunkulu futsi ubone tinzuzo tekwenta njalo. (Isaya 48:17, 18) Phindze ubuke tibonelo tebantfu labasitwa nguNkulunkulu kutsi bancobe tinkinga, batfutfukise kuphila kwabo nekwemindeni yabo, futsi batfola injabulo sibili. e

 Lokungasilo Liciniso: Angeke simati Nkulunkulu ngobe uyimfihlo.

 Lokuliciniso: Letinye tintfo ngaNkulunkulu kulukhuni kuticondza, njengekutsi ungumuntfu longumoya. Nanobe kunjalo sisengamati Nkulunkulu. Ecinisweni, liBhayibheli litsi kufanele simati kuze sitfole kuphila lokuphakadze. (Johane 17:3) Lisebentisa emavi lalula, liBhayibheli lisitjela ngeMdali wetfu, ngebuntfu bakhe, injongo yakhe ngebantfu nangemhlaba kanye nangetimiso takhe. (Isaya 45:18, 19; 1 KuThimothi 2:4) Njengobe sekuvetiwe, liBhayibheli lisitjela nangelibito laNkulunkulu. (Tihlabelelo 83:18) Ngako ngeke sigcine nje ngekumati Nkulunkulu, kodvwa sitawuphindze sisondzele kuye.—Jakobe 4:8.