Lokushiwo liBhayibheli

 Lubhabhatiso lusho kucwiliswa kwemuntfu emantini aphindze aphume kuwo. a Banyenti bantfu lababhajatiswa lokukhulunywa ngabo eBhayibhelini. (Imisebenti 2:41) Lomunye wabo nguJesu, lowacwiliswa eMfuleni iJordani. (Matewu 3:13, 16) Ngemuva kweminyaka leminyenti, indvodza lengumTopiya yabhajatiswa ‘emantini’ lebekaseceleni kwemgwaco lebeyihamba ngawo.​—Imisebenti 8:36-40.

 Jesu wafundzisa kutsi kuze umuntfu abe ngumlandzeli wakhe, bekumele abhajatiswe. (Matewu 28:19, 20) Umphostoli Phetro wagcizelela intfo lefanako.​—1 Phetro 3:21.

Kulesihloko

•  Kusho kutsini kubhajatiswa?

•  Litsini liBhayibheli ngekubhajatiswa kwetinswane nobe kubusiswa kwato?

•  Kushoni kubhajatiswa egameni laBabe, leNdvodzana nelemoya longcwele?

•  Kusono yini kuphindze ubhajatiswe?

•  Lolunye lubhabhatiso lokukhulunywa ngalo eBhayibhelini

•  Lokungasilo liciniso ngelubhabhatiso lwemaKhristu

 Kusho kutsini kubhajatiswa?

 Kubhajatiswa kuluphawu lolukhombisa bantfu kutsi loyo lobhajatiswako sewuphendvukile etonweni takhe futsi wenta setsembiso kuNkulunkulu sekutsi utawenta intsandvo yaKhe. Loko kufaka ekhatsi kuphila imphilo yekulalela Nkulunkulu kanye naJesu. Bantfu lababhajatiswako batibeka etfubeni lekutfola kuphila lokuphakadze.

 Kushoni kubhajatiswa egameni laBabe, leNdvodzana nelemoya longcwele?

 Jesu wayala balandzeli bakhe kutsi ‘bente . . . bafundzi . . . bababhabhatise egameni laBabe, leNdvodzana, nelemoya longcwele, babafundzise kugcina konkhe labatjela kona.’ (Matewu 28:19, 20) “Egameni” usho kutsi loyo lobhajatiswako uyalati ligunya kanye nendzima yaBabe, yeNdvodzana kanye neyemoya longcwele waNkulunkulu. Asesifanekise: Umphostoli Phetro watsi kulenye indvodza lebeyitelwe ikhubatekile: “Egameni laJesu Khristu waseNazaretha ngitsi kuwe, sukuma uhambe!” (Imisebenti 3:6) Kuyacaca kutsi Phetro bekayati indzima yaKhristu futsi waniketa yena ludvumo ngekwelashwa ngalokusimangaliso kwalendvodza.

•   ‘Babe’ usho Jehova c Nkulunkulu. Njengobe anguMdali, uMnikikuphila, naNkulunkulu Somandla, Jehova unalo lonkhe ligunya.​—Genesisi 17:1; Sembulo 4:11.

•   ‘INdvodzana’ nguJesu Khristu, lowanikela ngekuphila kwakhe ngenca yetfu. (KubaseRoma 6:23) Angeke sisindziswe ngaphandle nangabe sibonga futsi siyati indzima yakhe lebalulekile ekufezekeni kwenjongo yaNkulunkulu ngebantfu.​—Johane 14:6; 20:31; Imisebenti 4:8-12.

•   ‘Umoya longcwele’ ngemandla aNkulunkulu lasebentako. d Nkulunkulu wasebentisa umoya wakhe longcwele kuze adale, anikete kuphila, endlulisele umlayeto wakhe kubaphrofethi kanye nakulabanye. Wasebentisa umoya wakhe kuze abanikete nemandla ekwenta intsandvo yakhe. (Genesisi 1:2; Jobe 33:4; KubaseRoma 15:18, 19) Nkulunkulu waphindze wasebentisa umoya longcwele kuze asite babhali beliBhayibheli kutsi babhale imicabango yakhe.​—2 Phetro 1:21.

 Kusono yini kuphindze ubhajatiswe?

 Akusiyo intfo lengakavami kutsi bantfu bashintje inkholo yabo. Kodvwa kutsiwani nangabe bebabhajatisiwe esontfweni lebebakulo? Batawube bayona yini nabangaphindze babhajatiswe? Labanye batsi yebo, mhlawumbe ngenca yaloko lokushiwo Kubase-Efesu 4:5, lotsi: “KuneNkhosi yinye, kukholwa kunye, nelubhabhatiso lunye.” Nobe kunjalo, lelivesi alisho kutsi umuntfu akukafaneli aphindze abhajatiswe. Kanjani?

 Lokukhulunywa ngako kulelivesi. Lokukhulunywa ngako Kubase-Efesu 4:5 kukhombisa kutsi umphostoli Pawula bekagcizelela sidzingo sekutsi emaKhristu eliciniso abe munye kulakukholelwako. (Kubase-Efesu 4:1-3, 16) Lobunye bungaba khona kuphela nangabe alandzela iNkhosi yinye, lokunguJesu Khristu, kukholwa kunye, lokukucondza loko lokufundziswa liBhayibheli, futsi alandzele loko lokushiwo yimiBhalo ngekubhajatiswa.

 Umphostoli Pawula wakhutsata labanye lebesebabhajatiswe kutsi baphindze babhajatiswe. Loku wakwenta ngobe bebabhajatiswe bangaticondzi kahle timfundziso tebuKhristu.​—Imisebenti 19:1-5.

 Sizatfu lesikahle sekubhajatiswa. Umuntfu kufanele abe nelwati lolungulonalona lwemaciniso laseBhayibhelini kuze kubhajatiswa kwakhe kwemukeleke kuNkulunkulu. (1 KuThimothi 2:3, 4) Nangabe umuntfu abhajatiswa ngekwetimfundziso telisontfo letingavumelani naloko lokufundziswa liBhayibheli, lokubhajatiswa kwakhe angeke kwemukeleke kuNkulunkulu. (Johane 4:23, 24) Kungenteka lomuntfu wente loku anetisusa letinhle, kodvwa akakenti ‘ngekwelwati lolungulonalona.’ (KubaseRoma 10:2) Kuze emukelwe nguNkulunkulu, kufanele afundze liciniso leliseBhayibhelini, akusebentise loko lakufundzako, atinikele kuNkulunkulu bese uphindze uyabhajatiswa. Nangabe aphindze abhajatiswa ngenca yalesizatfu, kubhajatiswa kwakhe angeke kube sono. Ecinisweni, utawube wenta intfo lekahle.

 Lolunye lubhabhatiso lokukhulunywa ngalo eBhayibhelini

 LiBhayibheli likhuluma ngalolunye lubhabhatiso lolusho lokwehlukile kulolo lwekucwiliswa emantini kwebalandzeli baKhristu. Cabanga nganati tibonelo letimbalwa.

 Lubhabhatiso lolwentiwa nguJohane uMbhabhatisi. e EmaJuda kanye nebantfu betive labaphendvukele enkholweni yebuJuda bebabhajatiswa nguJohane kuze bakhombise kutsi sebaphendvukile etonweni labatentile letephula uMtsetfo waMosi, lokunguMtsetfo Nkulunkulu lawuniketa sive sema-Israyeli asebentisa Mosi. Lubhabhatiso lwaJohane belulungiselela bantfu kutsi bambone futsi bamemukele Mesiya, lokunguJesu waseNazaretha.​—Lukha 1:13-17; 3:2, 3; Imisebenti 19:4.

 Kubhajatiswa kwaJesu. Kubhajatiswa kwaJesu nguJohane umbhabhatisi bekwehlukile. Jesu bekangumuntfu lote sono futsi akazange one. (1 Phetro 2:21, 22) Ngako kubhajatiswa kwakhe bekungasho kuphendvuka nobe kucela “nembeza lomuhle kuNkulunkulu.” (1 Phetro 3:21) Kunaloko, bekusho kutsi utinikela kuNkulunkulu kuze ente intsandvo yaKhe njengobe bekanguMesiya lowetsenjisiwe nobe Khristu. Loku kufaka ekhatsi kunikela ngekuphila kwakhe ngenca yetfu.​—KumaHebheru 10:7-10.

 Kubhajatiswa ngemoya longcwele. Johane uMbhabhatisi kanye naJesu Khristu bakhuluma ngekubhajatiswa ngemoya longcwele. (Matewu 3:11; Lukha 3:16; Imisebenti 1:1-5) Lolubhabhatiso alufani nekubhajatiswa egameni lemoya longcwele. (Matewu 28:19) Sisho ngani?

 Bambalwa balandzeli baJesu lababhajatiswa ngemoya longcwele. Laba ngulabagcotjwe ngemoya longcwele ngobe bakhetfwe kutsi babuse umhlaba bakanye naJesu ezulwini njengemakhosi nebaphristi. f (1 Phetro 1:3, 4; Sembulo 5:9, 10) Batawubusa tigidzigidzi tebalandzeli baJesu letinelitsemba lekuphila phakadze emhlabeni.​—Matewu 5:5; Lukha 23:43.

 Kubhajatiselwa kuKhristu Jesu kanye nasekufeni kwakhe. Bantfu lababhajatiswa ngemoya longcwele baphindze ‘babhajatiswe kuKhristu Jesu.’ (KubaseRoma 6:3) Ngako lolubhabhatiso lwenteka kubalandzeli baJesu labagcotjiwe labatawubusa naye ezulwini. Ngekubhajatiselwa kuJesu, baba ngemalunga elibandla lakhe lalabagcotjiwe. Jesu uyiNhloko, futsi bona bangumtimba.​—1 KubaseKhorinte 12:12, 13, 27; KubaseKholose 1:18.

 EmaKhristu lagcotjiwe aphindze ‘abhajatiselwe ekufeni [kwaJesu].’ (KubaseRoma 6:3, 4) NjengaJesu, baphila imphilo yekutidzela neyekulalela Nkulunkulu, futsi litsemba labo alisasiko kuphila phakadze emhlabeni. Lokubhajatiselwa kabo ekufeni kwaJesu lokungekwemfanekiso kuphelela nabafa futsi bavuselwa ezulwini sebatidalwa temoya.​—KubaseRoma 6:5; 1 KubaseKhorinte 15:42-44.

 Kubhajatiswa ngemlilo. Johane uMbhabhatisi watjela labo lebebamlalela kutsi: “Yena [Jesu] utanibhabhatisa ngemoya longcwele nangemlilo. Lithulusi lakhe lekwela lisesandleni sakhe, futsi utawushanyelisisa libala lekubhulela, abutsele kolo etingungwini, kodvwa emakhoba utawashisa ngemlilo longeke ucimeke.” (Matewu 3:11, 12) Naka kutsi kunemehluko emkhatsini wekubhajatiswa ngemlilo nekubhajatiswa ngemoya longcwele. Lomfanekiso waJohane bewusho kutsini?

 Kolo umelela labo labatawulalela Jesu. Batibeka etfubeni lekubhajatiswa ngemoya longcwele. Emakhoba afanekisela labo labangeke bamlalele Jesu. Siphetfo sabo kubhajatiswa ngemlilo, lokufanekisela kubhujiswa.​—Matewu 3:7-12; Lukha 3:16, 17.