Bantfwana labadzala banemsebenti lobalulekile wekuciniseka kutsi batali babo lesebakhulile bayanakekeleka. LiBhayibheli litsi bantfwana labadzala “kufanele bacale bakhombise emakhaya kutsi besaba Nkulunkulu, futsi babuyisele loko lokufanele kubatali babo . . . ngobe loku kuyemukeleka kuNkulunkulu.” (1 KuThimothi 5:4) Nangabe labantfwana labadzala baciniseka kutsi batali babo lesebakhulile bayanakekeleka, basuke balalela umyalo weliBhayibheli lotsi bahloniphe batali babo.—Kubase-Efesu 6:2, 3.

 LiBhayibheli lite ticondziso leticondzile ngekutsi ungabanakekela njani batali lesebakhulile. Nobe kunjalo, lisiniketa tibonelo temadvodza nebafati lebebanekukholwa labanakekela batali babo. Liphindze linikete ticondziso letilusito letingasita labo labanakekela batali.

•  Ngetikhatsi tekubhalwa kweliBhayibheli, lamanye emalunga emndeni abanakekela njani batali lasebakhulile?

•  Ngutiphi teluleko teliBhayibheli letingasita labo labanakekela batali?

•  LiBhayibheli liyasho yini kutsi batali lesebakhulile kufanele banakekelelwe kuphi?

 Bebabanakekela ngetindlela letehlukahlukene, kuye ngetimo.

•   Josefa bekahlala khashane nababe wakhe losakhulile, Jakobe. Timo nasetimvumela, Josefa wahlela kutsi babe wakhe ahlale dvutane naye. Ngako Josefa wamakhela, wamondla waphindze wamvikela babe wakhe.—Genesisi 45:9-11; 47:11, 12.

•   Ruthe wahamba waya eveni lamaketala wakhe futsi wasebenta kamatima kuze amnakekele.—Ruthe 1:16; 2:2, 17, 18, 23.

•   Ngaphambi kwekutsi afe, Jesu wakhetsa umuntfu lebekatawunakekela make wakhe, Mariya, lokungenteka besekangumfelokati.—Johane 19:26, 27. a

 LiBhayibheli linetimiso letingasita labo labanakekela batali lesebakhulile kuze bakwati kubhekana netimo letimatima letita nalomsebenti.

•   Hlonipha batali bakho.

   Lokushiwo liBhayibheli: “Hlonipha babe wakho namake wakho.”—Eksodusi 20:12.

   Lesimiso singasetjentiswa njani? Khombisa kutsi uyabahlonipha batali bakho ngekutsi ubavumele batentele tincumo ngekuphila kwabo. Nabangakhona, bavumele batikhetsele indlela labafuna kunakekelwa ngayo. Ngesikhatsi lesifanako, bakhombise kutsi uyabahlonipha ngekutsi wente longakhona kukwenta kuze ubasite.

•   Yicondze indlela labativa ngayo futsi utsetselele.

   Lokushiwo liBhayibheli: “Kucondza kwenta umuntfu angasheshi atfukutsele, Futsi nangabe atsalalisa nakoniwa utawuhlonishwa.”—Taga 19:11.

   Lesimiso singasetjentiswa njani? Nangabe umtali losakhulile asho emavi lete umusa nalangakhombisi kubonga ngalokumnakekela kwakho, tibute, ‘Mine bengingativa njani kube bengisesimeni lesifanako?’ Nawetama kucondza indlela labativa ngayo futsi ubatsetselela, angeke wente simo lesibi sibe sibi nakakhulu.

•   Bonisana nalabanye.

   Lokushiwo liBhayibheli: “Emacebo akaphumeleli nangabe kute kubonisana, Kodvwa ayaphumelela nangabe kunebeluleki labanyenti.”—Taga 15:22.

   Lesimiso singasetjentiswa njani? Cwaninga ngekutsi ungabhekana njani nekugula lokungenteka batali bakho banako. Tfola kutsi yini lekhona endzaweni yangakini lengakusita ubanakekele. Coca nalabanye labake banakekela batali babo lesebakhulile. Nangabe bakhona bantfwana bakini, banini nemhlangano wemndeni kuze nicoce ngetidzingo tebatali benu, kutsi ningabanakekela njani nekutsi ningabambisana njani.

•   Tfobeka

   Lokushiwo liBhayibheli: “Kuhlakanipha kukubantfu labatfobekile.”—Taga 11:2.

   Lesimiso singasetjentiswa njani? Kwati longakhona kukwenta nalongeke ukhone kukwenta. Sibonelo nje, wonkhe umuntfu unesikhatsi nemandla lalinganiselwe. Loku kungayitsintsa indlela lonakekela ngayo batali bakho. Nangabe kunakekela batali bakho sekukucindzetela, cela lusito kulamanye emalunga emndeni nobe labo labanakekela bantfu lesebakhulile.

•   Tinakekele.

   Lokushiwo liBhayibheli: “Kute umuntfu lowake watondza umtimba wakhe, kodvwa uyawondla aphindze awunakekele.”—Kubase-Efesu 5:29.

   Lesimiso singasetjentiswa njani? Ngisho nobe unemsebenti wekunakekela batali bakho, nawe kufanele utinakekele, uphindze unakekele nemndeni wakho nawushadile. Kufanele udle kudla lokunemphilo. Kufanele uphumule ngalokwenele. (Umshumayeli 4:6) Udzinga kutinika nesikhatsi sekuphumula. Ngekwenta loku, utawuba sesimeni lesincono sekunakekela batali bakho.

 LiBhayibheli aliniketi ticondziso leticondzile kutsi bantfwana labadzala kufanele babanakekelele kuphi batali babo lesebakhulile. Leminye imindeni ikhetsa kuhlala nebatali babo nakungenteka. Nobe kunjalo, ngalesinye sikhatsi bangase beve ungatsi lomtali anganakekeleka ncono endzaweni lakunakekelwa khona bantfu lesebakhulile. Emalunga emndeni angase ahlangane kuze ancume kutsi ngukuphi lokuwalungelako.—KubaseGalathiya 6:4, 5.