Cha. LiBhayibheli likubeka ngalokucacile kutsi Nkulunkulu wadala bantfu kanye ‘netinhlobonhlobo’ tetilwane netitjalo. (Genesisi 1:12, 21, 25, 27; Sembulo 4:11) Litsi bonkhe bantfu bavela ku-Adamu na-Eva, batali betfu bekucala. (Genesisi 3:20; 4:1) Kulandzisa kweliBhayibheli akuyisekeli imfundziso lebitwa ngekutsi yi-theistic evolution letsi Nkulunkulu wasebentisa kutigucukela kwemvelo kuze kube khona tinhlobonhlobo tetintfo letiphilako. Nobe kunjalo, liBhayibheli aliphikisani nesayensi nayitsi luhlobo lolutsite lwentfo lephilako luhlukene kanyenti. a

•  Nkulunkulu wasebentisa kutigucukela kwemvelo yini kuze adale tonkhe tintfo?

•  Kutigucukela kwemvelo kuyavumelana yini nalokushiwo liBhayibheli?

•  Likhono letilwane netitjalo lekushintja kuze tiphile endzaweni letsite likhombisa kutsi imfundziso yekutigucukela kwemvelo iliciniso yini?

 Bantfu labakholelwa kutsi Nkulunkulu wasebentisa kutigucukela kwemvelo kuze adale tintfo letiphilako (“theistic evolution”), banemibono leyehlukahlukene ngekutsi wakwenta njani loko. I-Encyclopædia Britannica itsi “labanye bantfu bakholelwa kutsi lena yindlela Nkulunkulu layisebentisako kuze tintfo tiphile futsi titalane.”

 Lemfundziso ingaphindze isho naku lokulandzelako:

•   Tonkhe tintfo letiphilako tichamuka kukhokho munye.

•   Luhlobo lolutsite lwentfo lephilako lungashintja lube ngulenye intfo lephilako. Loku kubitwa ngekutsi yi-macroevolution.

•   NguNkulunkulu lobangela kutsi tenteke tonkhe letintfo.

 Bantfu labakholelwa kutsi Nkulunkulu wasebentisa kutigucukela kwemvelo kuze adale tintfo letiphilako batsi loko lokushiwo liBhayibheli kuGenesisi ngekudalwa kwetintfo akusilo liciniso. Nobe kunjalo, Jesu watsi loko lokushiwo yincwadzi yaGenesisi kungumlandvo loliciniso. (Genesisi 1:26, 27; 2:18-24; Matewu 19:4-6) LiBhayibheli litsi ngaphambi kwekutsi Jesu ete emhlabeni, bekanaNkulunkulu ezulwini futsi wamsita ekudaleni “tonkhe tintfo.” (Johane 1:3) Ngako-ke, imfundziso letsi Nkulunkulu wasebentisa kutigucukela kwemvelo kuze ente tinhlobonhlobo tetintfo letiphilako, iphambene naloko lokufundziswa liBhayibheli.

 LiBhayibheli alichazi kutsi luhlobo lunye lwentfo lungehlukane kangakanani. Aliphikisani nekutsi tinhlobonhlobo tetilwane netitjalo letadalwa nguNkulunkulu tingashintjashintja njengobe tandza futsi tivumelana nendzawo letikuyo. Nanobe labanye bacabanga kutsi loku kutigucukela kwemvelo, kodvwa kute luhlobo lolusha lwentfo lephilako levelako.