LiBhayibheli litsembisa kutsi: “Loyo lowenta intsandvo yaNkulunkulu uhlala kuze kube phakadze.” (1 Johane 2:17) Yini Nkulunkulu lafuna kutsi uyente?

•   Fundza ngaNkulunkulu nangeNdvodzana yakhe, Jesu. Emthantanzweni abewubhekise kuNkulunkulu, Jesu watsi: “Kukwati wena lokuphela kwaNkulunkulu weliciniso naloyo lowamtfuma, lokunguJesu Khristu, kuholela ekuphileni lokuphakadze.” (Johane 17:3) Kufaka ekhatsi ini “kwati” Nkulunkulu naJesu? Singabati ngekutsi sitadishe liBhayibheli nangekutsi sisebentise loko lesikufundzako ekuphileni kwetfu. a LiBhayibheli lisivetela indlela uMdali wetfu, Nkulunkulu Jehova, longuMniki kuphila lacabanga ngayo. (Imisebenti 17:24, 25) LiBhayibheli liphindze lisitjele nangeNdvodzana yakhe, Jesu, lowafundzisa “emavi ekuphila lokuphakadze.”—Johane 6:67-69.

•   Kholelwa emhlatjelweni waJesu. Jesu weta emhlabeni kuze ‘atawukhonta nekunikela ngemphilo yakhe, kutsi ibe yinhlawulo.’ (Matewu 20:28) Inhlawulo yengati yaJesu yavulela bantfu indlela yekutfola kuphila lokuphakadze emhlabeni loliPharadesi. b (Tihlabelelo 37:29) Jesu watsi: “Nkulunkulu walitsandza kakhulu live kangangekutsi waze wanikela ngeNdvodzana yakhe lekuphela kwayo, kuze wonkhe umuntfu lokholwa ngiyo angabhubhi, kodvwa atfole kuphila lokuphakadze.” (Johane 3:16) Sicela unake kutsi, kukhona lokwengetiwe kunekumane nje ukholelwe kuJesu. Kufanele ‘sikholwe kuye’, ngekutsi sikhetse kuphila ngekuvumelana naloko lakufundzisa kanye nangekuphila ngekuvumelana nentsandvo yaBabe wakhe.—Matewu 7:21; Jakobe 2:17.

•   Yakha bungani lobucinile naNkulunkulu. Nkulunkulu ufuna sisondzele kuye futsi sibe bangani bakhe. (Jakobe 2:23; 4:8) Nkulunkulu uphila phakadze. Ngeke aze afe, futsi ufuna kutsi bangani bakhe nabo baphile phakadze. EVini lakhe, Nkulunkulu uveta loko lakufunela labo labamfunako, utsi: “Shangatsi ningaphila phakadze naphakadze!”—Tihlabelelo 22:26.

 Lokungasilo liciniso: Kuphila lokuphakadze ngeke kujabulise.

 Lokuliciniso: Litfuba lekutfola kuphila lokuphakadze livela kuNkulunkulu, lositsandzako nalofuna sijabule. (Jakobe 1:17; 1 Johane 4:8) Uyati kutsi kuze sijabule, kudzingeka sibe nemsebenti lesitawutsandza. (Umshumayeli 3:12) Nkulunkulu wetsembisa kutsi labo labatawuphila phakadze emhlabeni batakwenetiseka, babe nemsebenti lotawuzuzisa bona netihlobo tabo.—Isaya 65:22, 23.

 Ngetulu kwaloko, labo labatawube baphila phakadze batawuchubeka bafundza tintfo letinsha ngeMdali wabo kanye nangemisebenti yakhe lemangalisako. Wadala bantfu baba nesifiso sekuphila phakadze futsi bafundze nangaye, nanobe bangayoze bakhone “kuyicondza imisebenti yaNkulunkulu kusukela ekucaleni kwayo kuze kube ngusekugcineni.” (Umshumayeli 3:10, 11) Ngako-ke, labo labayobe baphila phakadze bayohlale banetintfo labatijabulelako nemisebenti labayentako.