Ngisho nobe umhlaba wonkhe uhlaselwe yi-coronavirus, BoFakazi BaJehova bayachubeka bakhulula liBhayibheli ngetilwimi letinsha. Nga-June 28, 2020, kwakhululwa Lihumusho Lemhlaba Lomusha LemiBhalo Lengcwele ngetilwimi letine: siSwati, siTsonga, siZulu, kanye nesiChitonga. Kuphindze kwakhululwa Lihumusho Lemhlaba Lomusha LemiBhalo YemaKhristu YesiGriki ngesiBelize Kriol kanye nangesiTotonac. Ngisho nobe bazalwane nabodzadze bangakakhoni kuhlangana ndzawonye ngenca ye-COVID-19, kodvwa bakujabulele kutfola lamaBhayibheli etintfweni tabo tebuchwephesha. LamaBhayibheli akhululwe ngetinkhulumo letirikhodwe kusenesikhatsi futsi bamemeteli batibukele nge-videoconference nobe bukhoma.

Umzalwane Geoffrey Jackson, lolilunga Lesigungu Lesibusako, wakhulula Lihumusho Lemhlaba Lomusha LelimiBhalo Lengcwele ngesiSwati kanye neLihumusho Lemhlaba Lomusha LemiBhalo Lengcwele lelibuyeketiwe ngesiTsonga nangesiZulu, latfolakala ngetintfo tebuchwephesha (buka sitfombe lesisekucaleni). Bamemeteli baseSouth Africa nebaseSwatini balubukela loluhlelo lwemhlangano lokhetsekile.

Ensimini yeligatja laseSouth Africa, kulinganiselwa kutsi kunebantfu labacishe babe ngu-18.5 million labakhuluma siSwati, siTsonga, kanye nesiZulu, lokufaka ekhatsi nebamemeteli labangetulu kwa-38 000.

Umzalwane Augustine Semo, lolilunga Leligatja LaseMalawi, wakhulula Lihumusho Lemhlaba Lomusha LemiBhalo Lengcwele leliphelele ngelulwimi lwesiChitonga (Malawi).

Bahumushi batsetse iminyaka lengetulu kwalemibili kutsi bacedze kuhumusha liBhayibheli lesiChitonga. Munye walabahumushi nakachaza utsi: “Lulwimi lwesiChitonga luhlukene katsatfu. Bantfu bakulesinye sifundza basebentisa emagama langaketayeleki kulesinye sifundza. Besiciniseka kutsi sisebentisa emagama latawuvakala kubantfu labanyenti. Ngetulu kwaloko, sisebentise imibhalo lengentasi kute sichaze emagama lokungenteka aketayeleki kulabanye.”

Lomunye umhumushi utsi: “Kutawubalula kutsi bamemeteli basebentise leliBhayibheli nabashumayela nobe emihlanganweni, ngobe kusetjentiswe lulwimi lolulula naloluvakalako, lokwenta kutsi kube melula kutsi balifundze futsi balicondze.”

Umzalwane Joshua Killgore lolilunga Lekomidi Yeligatja leseCentral America wakhulula Lihumusho Lemhlaba Lomusha LemiBhalo YemaKhristu YesiGriki ngesiBelize Kriol. Bantfu labangetulu kwa-1 300 babukela loluhlelo.

Licembu lebahumushi labasitfupha lasebenta tinyanga letingu-16 kuze licedze lomsebenti wekuhumusha. Mayelana netinzuzo talelihumusho lelisha, lomunye walabahumushi utsi: “Ekugcineni bazalwane nabodzadze sebaneliBhayibheli lelinembile naleletsembekile. Litawufana nesibane lesibakhanyiselako kuze bayicondze kancono imiBhalo.”

Lomunye umhumushi utsi: “Ngisho nobe umhlaba wonkhe uhlaselwe yi-coronavirus, bazalwane betfu labakhuluma siBelize Kriol batawukhona kufundza imiBhalo ngelulwimi labalumunya. Loku kungabadvudvuta, kubasite babe nekuthula futsi bakhone kubeketelela netinkinga letiseta.”

EBelize, kunebamemeteli labangu-867 emabandleni langu-19 lakhuluma siBelize Kriol. Kuphindze kube nebamemeteli labangu-58 labakhonta ensimini yesiBelize Kriol e-United States.

Umzalwane Jesse Pérez, lolilunga Lekomidi Yeligatja laseCentral America, wakhulula Lihumusho Lemhlaba Lomusha LemiBhalo YesiGriki ngesiTotonac. Kulinganiselwa kutsi loluhlelo lwabukelwa bantfu labangu-2 200 emabandleni langu-50 esiTotonac lasensimini yaleligatja.

Licembu lebahumushi lacedza lomsebenti wekuhumusha ngemuva kweminyaka lemitsatfu. LeliBhayibheli litawuba lusito kakhulu nakushunyayelwa tindzaba lemnandzi kubantfu labangetulu kwa-250 000 labakhuluma siTotonac eMexico.

Ngalukungafani nalamanye emaBhayibheli esiTotonac, lomunye umhumushi utsi: “Lihumusho Lemhlaba Lomusha LemiBhalo YemaKhristu YesiGriki, lona lisebentisa lulwimi loluvamile. Nyalo sekutawuba melula kucoca nebantu basemmangweni wakitsi ngetindzaba letehlukahlukene letiseBhayibhelini.”

Lelinye lilunga lalabahumushi lingete latsi: “Bazalwane nabodzadze bebasolo balilangatelela liBhayibheli lelifana naleli. Lisengakhululwa leliBhayibheli leli, labanye bamemeteli nababeka tinkhulumo emhlanganweni wasekhatsi neliviki, bebatihumushela lamanye emavesi eliBhayibheli ngesiTotonac basusela ehumushweni lesiSpanish. Kodvwa nyalo loku ngeke kusadzingeka nakucashunwa imiBhalo YemaKhristu YesiGriki.”

Lokuhle kakhulu ngalelihumusho lelisha kutsi linemibhalo lengentansi lenalamanye emagama lasetjentiswa kuletinye tifundza kodvwa lasho intfo yinye naleyo lesisetjentiswe evesini. Lawo magama atawusita bonkhe bantfu labakhuluma siTotonac labahlala kuletinye tindzawo.

Sijabula kanye nalabazwane nabodzadze labatfole lamaBhayibheli ngetilwimi tabo. Siyati kutsi litawucinisa kukholwa kwabo njengobe balisebentisa ‘njengenkemba yemoya’ nabashumayela nalapho batitadishela.—KumaHebheru 4:12.