Maud o dula France mme mosebetsi wa hae ke ho thusa bana ba holofetseng sekolong. Ka letsatsi le leng, baithuti ba ne ba rutwa ka Holocaust le ka se ileng sa etsahala dikampong tsa mahloriso tsa Manazi. Batshwaruwa dikampong tseo ba ne ba apara yunifomo e nang le lesela le lenyane le nang le mmala o itseng. Mmala wa lesela leo le tsela eo le neng le sehilwe ka yona, le ne le bontsha hore na ke hobaneng ha motho eo a ne a tshwerwe.

 Ha titjhere e nngwe e bua ka batshwaruwa ba neng ba apara yunifomo e nang le lesela leo le dikgutlo di tharo le mmala o pherese, e re: “Ke nahana hore e ne e aparwa ke batho ba ratanang le batho ba bong bo tshwanang le ba bona.” Kamora tlelase, Maud o ile a bua le titjhere eo mme a mo hlalosetsa hore Manazi a ne a tshwaya Dipaki Tsa Jehova ka lesela le pherese le dikgutlo di tharo. a O ile a re o tla mo tlisetsa dintlha tse eketsehileng ka taba ena. Titjhere eo e ile ya re ho lokile mme ya kopa Maud hore a bue le baithuti dintlha tsena.

 Ka tlelaseng e nngwe, titjhere e ile ya ruta ka yona taba ena e sebedisa tjhate e bontshang matshwao a fapaneng a neng a aparwa ke batshwaruwa. Tjhate eo e ile ya bontsha ka ho hlaka hore lesela le dikgutlo di tharo le pherese e ne e tshwaya Dipaki Tsa Jehova. Ka mora tlelase, Maud o ile a fa titjhere eo dintlha tse eketsehileng ka taba ena. Titjhere eo e ile ya mamela mme ya etsa ditokisetso tsa hore Maud a tlo bolella baithuti ka dintlha tsena.

 Maud o ne a lokiseditse ho bua le baithuti ka metsotso e 15 empa ha nako ya hae ya hore a bue e fihla, titjhere e ile ya re ho yena: “O ka bua hora kaofela.” Maud o ile a qala ka hore a bapale video e bontshang ka moo Manazi a neng a hlokofatsa Dipaki Tsa Jehova ka teng. Ha ho bapala karolo ya moo Manazi a nkang bana ba Dipaki ba 800 ho batswadi ba bona, Maud o ile a emisa video mme a bala dipale tsa bana ba bararo ba ileng ba nkuwa. Ka mora ho bapala video, o ile a bala lengolo le ngotsweng ke Paki ya Jehova ya Austria ka 1940. Lengolo leo le ne le ngotswe ke Gerhard Steinacher ya di dilemo di 19, o ngolletse batswadi ba hae lengolo leo dihora pele a kgaolwa hlooho ke Manazi. b

 Maud o ile a etsa se tshwanang le tlelaseng e latelang. Ka lebaka la hore Maud o ile a ba sebete, hona jwale matitjhere ao a se a kenyelletsa Dipaki Tsa Jehova ha a ruta ka se ileng sa etsahala dikampong tsa mahloriso tsa Manazi.