Ka la 26 June 2022 batho ba fetang 28 000 ba bile teng ha morabo rona Kenneth Cook, Jr wa Sehlopha se Busang sa Dipaki Tsa Jehova a lokolla Bibele ya Phetolelo ya Lefatshe le Letjha ka Sesotho (Afrika Borwa).

Dipaki Tsa Jehova tse buang Sesotho di ile tsa qala ho fumana Bibele e feletseng ya Phetolelo ya Lefatshe le Letjha ka Sesotho (Lesotho) ka selemo sa 2000. Ho hatisitswe Dibibele tse ka bang 138 000 tsa Phetolelo ya Lefatshe le Letjha ka Sesotho mme e sebediswa ke batho ba fetang 14 256 ba Dipaki Tsa Jehova ba buang Sesotho (Lesotho) lefatsheng lohle. Empa ke hobaneng ha Bibele ee e ntlafaditswe? Ke bomang ba e fetoletseng? Re ka kgodiseha jwang hore Bibele e ntlafaditsweng ya Phetolelo ya Lefatshe le Letjha e nepahetse? Ke dintho dife tseo Bibele ee e ntlafaditsweng e seng e ena le tsona tse tla o thusa hore o ‘tshwanelehe ka ho feletseng le hore o be le dintho tsohle tseo o di hlokang bakeng sa ho etsa mosebetsi o mong le o mong o molemo’?​—2 Timothea 3:16, 17.

Ka lebaka la puo e dulang e fetoha ha dilemo di ntse di feta, ho hlokahala hore Bibele e ntlafatswe e le hore ho ka ba bonolo ho e utlwisisa. Bibele e ngotsweng ka puo ya kgale e ke ke ya tswela batho ba bangata molemo.

Ha ho ne ho ngolwa Bibele, Jehova Modimo o ne a entse hore buka ka nngwe e ngolwe ka puo eo batho ba e utlwisisang. Komiti ya Phetolelo ya Bibele ya Lefatshe le Letjha e ile ya latela mokgwa o tshwanang ha e ne e lokolla kgatiso e ntlafaditsweng ya Senyesemane ya Phetolelo ya Lefatshe le Letjha ka October 2013. Selelekela sa kgatiso ena se re: “Morero wa rona esale e le ho fetolela Bibele ka tsela e fetisang hantle molaetsa o tshwanang le wa ha e ne e ngolwa le ho o fetisa ka tsela e hlakileng le e tla etsa hore motho a e bale ha bonolo.”

Tsela eo re utlwisisang dipuo tseo Bibele e ngotsweng ka tsona ho tloha qalong e leng Seheberu, Searame le Segerike e ile ya tswela pele e ntse e ntlafala ka mora hore ho lokollwe kgatiso ya pele ya Senyesemane. Ho fumanwe meqolo ya Bibele e neng e le siyo ha ho ne ho lokollwa Phetolelo ya Lefatshe le Letjha ya Senyesemane. Meqolo ena e thusa bafetoledi ba Bibele hore ba utlwisise tsela eo Bibele e neng e ngotswe ka yona ka tsela e nepahetseng.

Taba ena e entse hore ho fetolwe mantswe a mang e le hore a ka dumellana le tsela eo ditsebi di utlwisisang hore a ne a le ka teng meqolong ya pele. Ka mohlala, meqolong e meng, Matheu 7:13 e re: “Kenang ka keiti e nyenyane hobane keiti e isang timelong e kgolo le tsela e lebisang teng e sephara.” Dikgatisong tsa nakong e fetileng tsa Phetolelo ya Lefatshe le Letjha lentswe “keiti” le ne le sa hlahe karolong e qetellang ya temana. Le ha ho le jwalo, ha ho ntse ho ithutwa meqolo ena ka tsela e eketsehileng, ho ile ha fumanwa hore lentswe “keiti” le ne le le teng qalong ha ho ne ho ngolwa Bibele. Ka hoo, lentswe lena le ile la kenngwa kgatisong e ntlafaditsweng. Ho na le diphetoho tse tshwanang le tsena tse entsweng. Le ha ho le jwalo, diphetoho tsena tse nyenyane ha di a fetola moelelo wa lentswe la Modimo.

Ha ho ntse ho etswa dipatlisiso tse eketsehileng, ho ile ha fumanwa ditemana tse ding tse tsheletseng moo lebitso la Modimo e leng Jehova le lokelang ho hlaha teng ka Bibeleng. Ditemana tsena ke Baahlodi 19:18 le 1 Samuele 2:25; 6:3; 10:26; 23:14, 16. Hona jwale, kgatisong ya Senyesemane ya Phetolelo ya Lefatshe le Letjha, lebitso le halalelang e leng Jehova le hlaha ka makgetlo a 7 216 ho akarelletsa a 237 a hlahang Mangolong a Segerike a Bakreste.

Phetolelo ya Lefatshe le Letjha e hatiswa ke Watch Tower Bible and Tract Society e leng mokgatlo o molaong wa Dipaki Tsa Jehova. Dipaki Tsa Jehova di se di abile Dibibele lefatsheng lohle ka dilemo tse fetang 100. Phetolelo ya pele ya Bibele ya Senyesemane e ile ya lokollwa ke Komiti ya Phetolelo ya Bibele ya Lefatshe le Letjha pakeng tsa selemo sa 1950 le 1960. Ditho tsa komiti eo di ile tsa kopa hore di se ke tsa tsejwa le ka mora hore di hlokahale hobane di ne di sa batle ho iphumanela botumo.​—1 Bakorinthe 10:31.

Ka 2008, Sehlopha se Busang sa Dipaki Tsa Jehova se ile sa kgetha sehlopha sa bara ba bo rona ho theha Komiti ya Phetolelo ya Bibele ya Lefatshe le Letjha. Komiti ena e ile ya qala ho ntlafatsa Bibele ya Senyesemane hanghang e nahanne ka diphetoho tse bileng teng puong ya Senyesemane ho tloha esale ho lokollwa kgatiso ya pele. Komiti ena e ne e le hlokolosi haholo ha e ne e araba dipotso tse fetang 70 000 tsa bafetoledi ba Phetolelo ya Lefatshe le Letjha ka dipuo tse fetang 120.

Ho ile ha kgethwa sehlopha sa Bakreste ba sebetsang ka thata hore e be bafetoledi. Ho hlokomelehile hore ha bafetoledi ba sebetsa e le sehlopha, phetolelo ya bona e ba ya boleng bo hodimo ho feta ha ba sebetsa ka bonngwe. (Diproverbia 11:14) Bafetoledi bana ba se ba ntse ba ena le boiphihlelo ka ha ba fetolela dingolwa tse ding tsa Dipaki Tsa Jehova. Sehlopha sena sa bafetoledi se ile sa kwetlisetswa ho fetolela Bibele le ho sebedisa mananeo a khompiyutha a etseditsweng ho fetolela Bibele.

Dipatlisiso tse entsweng tsa mantswe a sebedisitsweng ka Bibeleng di kentswe khompiyutheng e le ho nolofaletsa bafetoledi. Ba ile ba thuswa ke Lefapha la Ditshebeletso Tsa Phetolelo le New York, Amerika. Sehlopha se Busang sa Dipaki Tsa Jehova se tataisa mosebetsi wa ho fetolela Bibele se sebedisa Komiti ya Bongodi. Empa ha e le hantle mosebetsi wa phetolelo o etswa jwang?

Sehlopha sa bafetoledi se lokela ho fetolela Bibele (1) e nepahetseng empa e utlwisiswa ke batho bohle, (2)  e fetoletseng mantswe a mang a bohlokwa ka tsela e tshwanang le (3)  e fetisang molaetsa o tshwanang le wa ha e ne e ngolwa ka hohlehohle. See se kgoneha jwang? Nahana ka Bibele e qetang ho lokollwa. Bafetoledi ba qala pele ka ho sheba mantswe a Sesotho a tshwanang le a sebedisitsweng Bibeleng ya nakong e fetileng ya Sesotho sa Lesotho ya Phetolelo ya Lefatshe le Letjha. Lenaneo la khompiyutha le bitswang Watchtower Translation System le hlahisa mantswe a Bibele a amanang, le a nang le moelelo o tshwanang. Le boetse le hlahisa mantswe a Segerike le a Seheberu e le hore bafetoledi ba ka bona hore na mantswe ao a ne a fetoletswe jwang dibakeng tse ding ka Bibeleng. Lenaneo lena la Watchtower Translation System le thusa bafetoledi haholo hore ba shebe mantswe a Sesotho a nang le moelelo o tshwanang. Ho phaella moo, ha bafetoledi ba fetolela temana e nngwe le e nngwe, ba leka ka hohle ho sebedisa mantswe a Sesotho ao batho ba a utlwisisang ha bonolo.

Ho hlakile hore phetolelo ha se ho fetolela lentswe ka lentswe. Ho etsa bonnete ba hore mantswe ao re a sebedisang a Sesotho a fetisa moelelo o nepahetseng wa Lentswe la Modimo ke mosebetsi o mongata. Ho hlakile hore ho fetolela Bibele ena e ne e le mosebetsi o boima. Kgatiso ya Sesotho ya Phetolelo ya Lefatshe le Letjha e fetisa Lentswe la Modimo ka tsela e tshwanang le ha le ne le ngolwa qalong empa e le ka tsela e hlakileng le e tla etsa hore motho a le bale ha bonolo.

Re o kgothalletsa hore o ipalle Phetolelo ya Lefatshe le Letjha. O ka e bala Inthaneteng kapa ho JW Library app kapa wa e kopa ho Dipaki Tsa Jehova. O ka e bala ka letswalo le kgutsitseng o kgodisehile hore molaetsa wa Modimo o fetisitswe ka tsela e nepahetseng ka puo ya hao.

Selelekela sa Lentswe la Modimo: Se hlahisa ditemana tsa Bibele tse arabang dipotso tse 20 tsa dithuto tsa motheo tsa Bibele