Haesale dintho tseo re di dumelang di thehilwe Bibeleng. Ka hoo ha re ntse re utlwisisa Mangolo haholwanyane, ntho eo e etsa hore re etse diphetoho dinthong tseo re di dumelang. a

 Diphetoho tseo di dumellana le molaomotheo wa Bibele o hlahang ho Diproverbia 4:​18, e reng: “Tsela ya ba lokileng e tshwana le mahlasedi a meso ao kganya ya ona e ntseng e eketseha ho fihlela hara mpa ya motshehare.” Ha letsatsi le tjhaba, le hlahisa kganya butlebutle ho fihlela dintho di bonahala ka ho hlaka. Ka tsela e tshwanang, hanyane ka hanyane Modimo o re thusa ho utlwisisa dithuto tsa Bibele ka nako e nepahetseng. (1 Petrose 1:​10-​12) Feela jwalo ka ha Bibele e boletse, hona jwale “nakong ya bofelo” Modimo o senola dintho ka potlako.​—⁠Daniele 12:⁠4.

 Diphetoho tsena ha di a lokela ho re makatsa kapa ho re ferekanya. Barapedi ba Modimo ba mehleng ya pele le bona ho ne ho ena le dintho tseo ba neng ba sa di utlwisise hantle mme ba ile ba lokela ho etsa diphetoho.

•   Moshe o ile a iketsa molopolli wa setjhaba sa Iseraele dilemo tse 40 pele Modimo a mo fa mosebetsi oo.​—⁠Diketso 7:​23-​25, 30, 35.

•   Baapostola ba ne ba sa utlwisise boprofeta bo boletsweng esale pele hore Mesia o ne a tla bolawa a be a tsoswe.​—⁠Esaia 53:​8-​12; Matheu 16:​21-​23.

•   Nakong e fetileng Bakreste ba bang ba ne ba sa utlwisise hantle hore na “letsatsi la Jehova” le tla fihla neng.​—⁠2 Bathesalonika 2:​1, 2.

 Ha nako e ntse e eya Modimo o ile a ba thusa hore ba utlwisise dintho hantle mme re rapella hore a tswele pele ho re thusa ka tsela e tshwanang.​—⁠Jakobo 1:⁠5.